UWUHRẸ AVỌ 4
Epanọ Whọ Sai Ro Wuhrẹ Kpahe Ọghẹnẹ
Whọ rẹ sai wuhrẹ kpahe Jihova ẹkwoma ese Ebaibol na. Evaọ oke krẹkri nọ u kpemu no Ọghẹnẹ ọ salọ ahwo-akpọ jọ re a kere iroro riẹ fihọ otọ. A re se ikere eyena nọ Ebaibol na. Nẹnẹ na ma re wuhrẹ kpahe Ọghẹnẹ ẹkwoma ese Ebaibol na. Fikinọ ẹme hayo ovuẹ Jihova họ oware nọ o rrọ Ebaibol na, a re je sei nọ Ẹme Ọghẹnẹ. Ma rẹ sae rọwo ẹme nọ Ebaibol na ọ ta keme Jihova ọ rẹ ta ọrue he. “Ọghẹnẹ ọ sae ta erue [he].” (Ahwo Hibru 6:18) Uzẹme na o rrọ evaọ Ẹme Ọghẹnẹ.—Jọn 17:17.
Ebaibol na yọ ovo jọ evaọ udevie ekẹ eghaghae Ọghẹnẹ nọ ọ k’omai. O wọhọ ileta nọ ọsẹ oyoyou o vi se emọ riẹ. O ta kpahe eyaa Ọghẹnẹ nọ o ti ro nwene otọakpọ na fihọ oria igbunu nọ a rẹ rria—aparadase. O ta k’omai kpahe oware nọ o ru no evaọ oke nọ u kpemu, oware nọ o bi ru enẹna, gbe oware nọ o ti ru evaọ obaro rọkẹ emọ ẹrọwọ riẹ. U re je fiobọhọ k’omai ku ebẹbẹ mai họ je duku evawere.—2 Timoti 3:16, 17.
Isẹri Jihova yọ egbẹnyusu Ọghẹnẹ; a ti fiobọhọ k’owhẹ wo otoriẹ oware nọ Ebaibol na o wuhrẹ. Ta kẹ ae nnọ whọ gwọlọ wuhrẹ Ebaibol na. A re mi ugho fihọ onana ha. (Matiu 10:8) Fibae, whọ rẹ sai kpohọ iwuhrẹ Ileleikristi. A re ru ai evaọ eria egagọ nọ a re se Egwa Uvie. Who te bi kpohọ iwuhrẹ Ileleikristi, whọ te rro vẹrẹvẹrẹ evaọ eriariẹ ra kpahe Ọghẹnẹ.
Whọ sai wuhrẹ kpahe Ọghẹnẹ rono eware nọ o ru no ze. Wọhọ oriruo, Ebaibol na ọ ta nọ: “Ọghẹnẹ ọ ma odhiwu gbe akpọ.” (Emuhọ 1:1) Okenọ Jihova ọ rọ ma “odhiwu” na, ọ ma ọre. Kọ eme oyena o ta k’omai kpahe Ọghẹnẹ? O ta k’omai nnọ Jihova o wo ogaga ulogbo. Ọye ọvo ọ rẹ sai ru oware nọ o ga te ọre na. O tẹ jẹ ta k’omai nnọ Jihova o wo areghẹ, keme o gwọlọ areghẹ re a sae ma ọre na, onọ o rẹ kẹ ẹroro gbe elo yọ o re fu hu.
Emama Jihova i dhesẹ nnọ o you omai. Roro kpahe oghẹrẹ ibi-ire sa-sa nọ e rrọ otọakpọ na kpobi. Jihova ọ hẹ sae k’omai oghẹrẹ ubi-ure ovuọvo—hayo tubẹ siọ omai ba ẹkẹ dede. Ukpoye, Jihova ọ k’omai eghẹrẹ ibi-ire buobu avọ oghoghẹrẹ oma, ẹruọ, ekọlọ, gbe awere. Onana u dhesẹ nnọ Jihova yọ Ọghẹnẹ orọnikọ ọnọ ọ rrọ yoyou ọvo ho rekọ ọnọ o re ruọghọ jẹ vọ avọ iroro gbe ẹwo.—Olezi 104:24.