Aparadase Ọ Kẹle No!

Eware iyoma nọ e rrọ otọakpọ via enẹna i dhesẹ nnọ Aparadase ọ kẹle no. Ebaibol na ọ ta nọ ma te ruẹ etoke imuozọ taure Aparadase na ọ tẹ te nyaze. Ma be rria etoke otiọye na enẹna! Eware jọ nọ Ebaibol na ọ ta nọ e te via ena:

Emo ilogbo. “Orẹwho o rẹ te kpare bru orẹwho, uvie o rẹ te kpare bru uvie.” (Matiu 24:7) Eruẹaruẹ nana i rugba no. No anwọ ukpe ọ 1914 ze, a fi emo akpọ soso ivẹ gbe emo esese buobu no. Ima ahwo buobu a jarae whu no.

Eyao nọ e be vaha. “Eyao e rẹ te jọ no oria ruọ oria.” (Luk 21:11, NW) Kọ onana u rugba no? Ẹhẹ. Ọta, ẹyao udu, owọre, uliaro, AIDS, gbe eyao efa i kpe ima ahwo buobu no.

Ababọ emuore. Wariẹ otọakpọ na soso họ ahwo jọ a riẹ nọ a wo emu nọ o re te ai re he. Ohọo u bi kpe ima ahwo buobu whu k’ukpe k’ukpe. Onana yọ oka ofa nọ u dhesẹ nnọ Aparadase na ọ kẹle no. Ebaibol na ọ ta nọ: “Ohọo u re ti muẹ.”​—Mak 13:8.

Etọ-inuho. “Otọ u re ti nuhẹ eva egheghẹrẹ eria.” (Matiu 24:7) Onana u rugba no re evaọ oke mai na. Ahwo nọ a bu vi ima ọvo a whu no evaọ etọ-inuho anwọ 1914 ze.

Ahwo omuomu. Ahwo a re ti “you igho” je “you oma-obọrai.” A te jọ “enọ i yowọ enu-awere siọ Ọghẹnẹ ba.” Emọ i ti “yo ẹme e nọ i yẹ rai hi.” (2 Timoti 3:1-5) Kọ whọ rọwo nnọ ahwo buobu a rrọ ere nẹnẹ? A wo adhẹẹ kẹ Ọghẹnẹ hẹ, yọ a rẹ wha ukpokpoma se enọ e be daoma wuhrẹ kpahe Ọghẹnẹ.

Egbulegbu. “Umuomu o rẹ te jọ buobu” re. (Matiu 24:12) Ababọ avro whọ te rọwo nnọ egbulegbu ọ ga vi epanọ o jọ evaọ ikpe jọ nọ e vrẹ no na. Ahwo evaọ oria kpobi a rrọ awa inọ a ti tho ai, wha ae re, hayo nwa ae oma.

Eware enana kpobi i dhesẹ nnọ Uvie Ọghẹnẹ o kẹle no. Ebaibol na ọ ta nọ: “Nọ wha ruẹ eware enana nọ i biti ruẹ, wha riẹ nọ uvie Ọghẹnẹ o kẹle ino.” (Luk 21:31) Eme họ Uvie Ọghẹnẹ? Oye họ egọmeti obọ odhiwu Ọghẹnẹ nọ o te rehọ Aparadase ziọ otọakpọ nana. Uvie Ọghẹnẹ u ti nwene ẹta egọmeti ohwo-akpọ.​—Daniẹl 2:44.