Unuovẹvẹ Rono Oke Nọ U Kpemu Ze

Jihova ọ te kẹ ahwo oyoma uvẹ re a raha Aparadase he. Egbẹnyusu riẹ ọvo e te rria etẹe. Kọ eme ọ te via kẹ ahwo oyoma? Re ma riẹ uyo na, roro kpahe ikuigbe uzẹme erọ Noa na. Noa ọ rria ikpe udhusoi akuakpe buobu nọ i kpemu no. Ọ jọ emamọ ohwo nọ ọ jẹ daoma ẹsikpobi re o ru oreva Jihova. Rekọ amọfa nọ a jọ otọakpọ na a je ru eware iyoma. Fikiere Jihova ọ tẹ ta kẹ Noa nnọ Ọ be te rehọ ẹvo ze te rọ raha ahwo omuomu kpobi no. Ọ ta kẹ Noa nọ o ku okọ re tei te uviuwou riẹ a seba ewhu evaọ oke nọ Ẹvo na ọ tẹ ze.​—Emuhọ 6:9-18.

Noa avọ uviuwou riẹ a ku okọ na. Noa ọ vẹvẹ ahwo unu nnọ Ẹvo na ọ be tha, rekọ a kezọ kẹe he. A ruabọhọ eyoma oruo. Nọ okọ na u reno, Noa o te su erao ruọ okọ na, tei te uviuwou riẹ a tẹ rueva riẹ re. Kẹsena Jihova ọ tẹ rehọ okposo ze. Oso ọ rrọ te edẹ 40 gbe aso 40. Ame na o te ku otọakpọ na soso.​—Emuhọ 7:7-12.

Ahwo omuomu na a whu, rekọ a siwi Noa avọ uviuwou riẹ. Jihova o siwi rai no Ẹvo na omakọkọ ruọ otọakpọ nọ a si emuemu no. (Emuhọ 7:22, 23) Ebaibol na ọ ta nọ oke o be wariẹ tha nọ Jihova ọ te rọ raha enọ e rọwo ru oware ogbagba ha. A te raha ahwo owoma ha. A te rria bẹdẹ bẹdẹ evaọ otọakpọ Aparadase.​—2 Pita 2:5, 6, 9.

Nẹnẹ na ahwo buobu a bi ru eware iyoma. Akpọ na ọ vọ avọ ebẹbẹ. Jihova o bi vi Isẹri riẹ n’oke ruoke re a vẹvẹ ahwo na unu, ghele na ibuobu e be gaviezọ kẹ ẹme Jihova ha. A gwọlọ nwene idhere rai hi. A gwọlọ jẹ oware nọ Ọghẹnẹ ọ ta kpahe oware ogbagba gbe othọthọ rehọ họ. Kọ eme ọ ta via kẹ ahwo nana? Kọ a ti nwene ẹdẹjọ? Ibuobu i ti nwene he. Oke o be tha nọ a te rọ raha ahwo omuomu yọ a te gbẹ wariẹ rria uzuazọ vievie he.​—Olezi 92:7.

A te raha otọakpọ na ha; a ti ru ei fihọ aparadase. Ahwo nọ a zihe ruọ egbẹnyusu Ọghẹnẹ a te rria bẹdẹ bẹdẹ evaọ Aparadase nọ ọ te jọ otọakpọ na.​—Olezi 37:29.