Dhesẹ Uyoyou Ra Rọkẹ Ọghẹnẹ Via

Re who kru ogbẹnyusu, o gwọlọ nọ who re lele iei t’ẹme. Whọ rẹ kezọ kẹe, ọ vẹ jẹ kezọ k’owhẹ. Whọ rẹ jẹ ta eme iwoma kpahe ogbẹnyusu ra na kẹ amọfa. Epọvo na o rrọ kpahe ogbẹnyusu Ọghẹnẹ nọ a rẹ jọ. Roro kpahe ẹme nọ Ebaibol na ọ ta kpahe onana:

T’ẹme kẹ Jihova kẹse kẹse evaọ olẹ. “Wha hẹ lẹ kẹse kẹse.”​—Ahwo Rom 12:12.

Se Ẹme Ọghẹnẹ, Ebaibol na. “Ọghẹnẹ o gie ẹwolo ku ikereakere na kpobi, re e jọ erere rọ kẹ ewuhrẹ gbe ozọ-usio, avọ ọkpọvio.”​—2 Timoti 3:16.

Wuhrẹ amọfa kpahe Ọghẹnẹ. “Fikiere wha [ru ilele] ahwo erẹwho kpobi, . . . wha wuhrẹ ai, re a ru eware kpobi nọ mẹ vuẹ owhai.”​—Matiu 28:19, 20.

Sikẹle egbẹnyusu Ọghẹnẹ. “Ọnọ ọ nya lele ahwo owareghẹ o re wo areghẹ.”—Itẹ 13:20.

Kpohọ iwuhrẹ eva Ọgwa Uvie na. “Jọ mai ohwo o he roro epanọ ọ rẹrọ jaja ọrivẹ riẹ oma, re o wo uyoyou, je ru iruo ezi kpobi . . . ta udu họ [ohwohwo] awọ.”​—Ahwo Hibru 10:24, 25.

Fiobọhọ tha iruo Uvie na uke. “Ohwo [ọ rẹ kẹ] wọhọ epanọ o roro evaọ eva riẹ, o jọ o rọ obọ okẹkẹ hẹ hayo ọgbahọ họ, keme Ọghẹnẹ o re you ohwo nọ ọ rẹ kẹ okẹ-evawere.”​—2 Ahwo Kọrint 9:7.