Re Who Kru Ogbẹnyusu, Whọ Rẹ Jọ Ogbẹnyusu Hrọ

Usu u re no uyoyou ze. Epanọ who wuhrẹ kpahe Jihova te, ere uyoyou ra kẹe o rẹ rro te re. Nọ uyoyou ra rọkẹ Ọghẹnẹ o be rro na, isiuru ra re whọ gọe e rẹ rro re. Onana o rẹ wọ owhẹ jọ olele Jesu Kristi. (Matiu 28:19) Ẹkwoma omakugbe uviuwou evawere Isẹri Jihova, whọ rẹ sae jọ usu Ọghẹnẹ bẹdẹ bẹdẹ. Kọ eme who re ru hrọ?

Who re dhesẹ uyoyou ra rọkẹ Ọghẹnẹ via hrọ ẹkwoma ẹmeoyo ọrọ izi riẹ. “Uyoyou Ọghẹnẹ ona, nnọ ma re koko ijaje riẹ. Whaọ ijaje riẹ erọ owha ogbẹgbẹdẹ hẹ.”​—1 Jọn 5:3.

Fi oware nọ who wuhrẹ họ iruo. Jesu o gbiku jọ nọ e kẹ oriruo onana. Ọzae owareghẹ jọ ọ bọ uwou riẹ họ ehru utho. Ọzae ogheghẹ jọ ọ tẹ bọ oriẹ họ ehru uwẹkpẹ. Okenọ okposo ọ rrọ ze, uwou nọ a bọ fihọ utho na u kie he, rekọ uwou nọ a bọ fihọ uwẹkpẹ na u te kie avọ ọraha ologbo. Jesu ọ ta nnọ enọ i yo iwuhrẹ riẹ je koko ai a wọhọ ọzae owareghẹ nọ ọ bọ uwou riẹ fihọ utho na. Rekọ enọ e kezọ kẹ iwuhrẹ riẹ rekọ a koko eme na ha a wọhọ ọzae ogheghẹ nọ ọ bọ uwou riẹ fihọ ehru uwẹkpẹ na. Ọzae vẹ whọ gwọlọ jọ wọhọ?​—Matiu 7:24-27.

Omaromudhe. Onana u dhesẹ nnọ whọ rẹ nya bru Jihova evaọ olẹ jẹ ta kẹe inọ whọ gwọlọ ru oreva riẹ bẹdẹ bẹdẹ. Oreva Ọghẹnẹ uruo u re dhesẹ nnọ whẹ yọ olele Jesu Kristi jọ.​—Matiu 11:29.

Ame-ọhọ. “Jọ a họ owhẹ ame, re a fa eyoma ra fiẹ, re who he se odẹ riẹ.”​—Iruẹru 22:16.

Duomahọ egagọ Ọghẹnẹ vọvọ. “Rehọ [evawere ru] iruo kpobi nọ i te owhẹ, wọhọ ẹsenọ who bi ru ai kẹ Ọnowo na, orọnikọ ahwo ho.”​—Ahwo Kọlọsi 3:23.