Uzou 1

“Uyoyou Ọghẹnẹ Ona”

“Uyoyou Ọghẹnẹ ona, nnọ ma re koko ijaje riẹ. Whaọ ijaje riẹ erọ owha ogbẹgbẹdẹ hẹ.”—1 JỌN 5:3.

1, 2. Eme ọ lẹliẹ owhẹ you Jihova Ọghẹnẹ?

KỌ WHO you Ọghẹnẹ? Otẹrọnọ whọ rehọ uzuazọ ra mudhe kẹ Jihova Ọghẹnẹ no, whọ rẹ rehọ ẹgba ra kpobi kuyo nọ Ee—yọ who yo gba! U gine fo re ma you Jihova. Ma you Ọghẹnẹ keme uyoyou nọ o dhesẹ kẹ omai o da omai ẹro. Enẹ Ebaibol e ta riẹ: “Ma you [Jihova] keme ọye ọ kaki you omai.”—1 Jọn 4:19.

² Jihova ọ kaki you omai. Ọ kẹ omai otọakpọ uwowoma. Ọ be kẹ omai eware kpobi nọ ma gwọlọ. (Matiu 5:43-48) Mai wuzou, o bi ru ẹgwọlọ abọ-ẹzi mai kẹ omai. Ọ kẹ omai Ebaibol na. U te no ere no, o zizie omai inọ ma lẹ sei jẹ kẹ omai imuẹro inọ o ti yo elẹ mai, gbe nnọ ọ te kẹ omai ẹzi ọfuafo riẹ re o fi obọ họ kẹ omai. (Olezi 65:2; Luk 11:13) Mai tube wuzou, o vi Ọmọ ọghaghae riẹ ze re ọ ta omai no igbo uzioraha gbe uwhu. Uyoyou nọ Jihova o dhesẹ kẹ omai o rro kẹhẹ!—Jọn 3:16; Ahwo Rom 5:8.

3. (a) Re ma daji uyoyou Ọghẹnẹ, eme o gwọlọ mi omai? (b) Onọ ulogbo vẹ u fo nnọ ma re roro kpahe, kọ diẹse a jẹ ruẹ uyo na?

³ Jihova ọ gwọlọ re ma wo erere no uyoyou riẹ ze bẹdẹ bẹdẹ. Rekọ sọ ma ti wo erere no uyoyou riẹ ze hayo ma ti wo ho, obọ mai o rrọ. Ebaibol e tuduhọ omai awọ nọ: “Yọre oma rai eva uyoyou Ọghẹnẹ . . . [avọ irẹro] uzuazọ ebẹdẹ bẹdẹ.” (Jud 21) Ẹme na “yọre oma rai” u dhesẹ inọ re ma sae daji uyoyou Ọghẹnẹ, o gwọlọ iruo mi omai. Ma re ru oware nọ u re dhesẹ inọ ma you rie. Fikiere, onọ jọ nọ u wuzou nọ u fo nọ ma re roro kpahe họ, ‘Ẹvẹ mẹ sai ro dhesẹ inọ me you Ọghẹnẹ?’ A rẹ ruẹ uyo na evaọ ileta nọ Jọn ukọ na o kere: “Uyoyou Ọghẹnẹ ona, nnọ ma re koko ijaje riẹ. Whaọ ijaje riẹ erọ owha ogbẹgbẹdẹ hẹ.” (1 Jọn 5:3) U fo re ma roma totọ kiẹ otofa eme nana riwi ziezi, keme ma gwọlọ dhesẹ kẹ Ọghẹnẹ mai inọ ma you rie gaga.

“UYOYOU ỌGHẸNẸ ONA”

4, 5. (a) Eme họ otofa ẹme na “uyoyou Ọghẹnẹ”? (b) Dhesẹ epanọ uyoyou kẹ Jihova u ro muhọ ẹrro evaọ udu ra.

⁴ “Uyoyou Ọghẹnẹ”—eme Jọn ukọ na o wo họ iroro nọ o kere eme nana? Orọnikọ eme nana i dhesẹ uyoyou nọ Ọghẹnẹ o wo kẹ omai hi rekọ uyoyou nọ ma wo kẹe. Kọ whọ sae kareghẹhọ okenọ uyoyou kẹ Jihova u ro muhọ ẹrro evaọ udu ra?

⁵ Dai roro kpemu kpohọ okenọ whọ kake rọ riẹ uzẹme na kpahe Jihova gbe ẹjiroro riẹ, nọ who ro mu ẹrọwọ họ ewo. Oke yena who wuhrẹ inọ dede nọ a yẹ owhẹ wọhọ ọrahauzi nọ o wo usu kugbe Ọghẹnẹ hẹ, Jihova ọ rehọ ẹkwoma Kristi rovie edhere kẹ owhẹ re whọ sai wo ẹgbagba nọ Adamu o kufiẹ je wo uzuazọ ebẹdẹ bẹdẹ. (Matiu 20:28; Ahwo Rom 5:12, 18) Whọ tẹ te riẹ epanọ oware nọ Jihova o ru o gbẹdẹ te nọ o ro vi Ọmọ ọghaghae riẹ ze ti whu kẹ owhẹ. Oware nọ Ọghẹnẹ o ru na u duobọte owhẹ udu, who te muọ Ọghẹnẹ nọ o dhesẹ uyoyou ulogbo utioye kẹ owhẹ na họ eyou.—1 Jọn 4:9, 10.

6. Ẹvẹ a re ro dhesẹ uvi uyoyou, kọ eme uyoyou kẹ Ọghẹnẹ o wọ owhẹ ru?

⁶ Oyena yọ emuhọ gheghe ọrọ uvi uyoyou kẹ Jihova. Orọnikọ ugbunu ọvo ohwo ọ rẹ rọ ta nnọ o wo uyoyou hu. Uvi uyoyou kẹ Ọghẹnẹ u vi unu gheghe nọ a rẹ rọ ta nọ, “Me you Jihova.” Wọhọ ẹrọwọ, iruo a re ro dhesẹ uvi uyoyou via. (Jemis 2:26) Ma re dhesẹ uyoyou mai via ẹkwoma eruo oware nọ o rẹ were ohwo nọ ma be ta nọ ma you na. Fikiere, nọ uyoyou kẹ Jihova o rro ziezi no evaọ udu ra, who te wo isiuru nọ who re ro yeri uzuazọ nọ o rẹ were Ọsẹ obọ odhiwu ra. Kọ whẹ yọ Osẹri Jihova nọ ọ họ-ame no? Otẹrọ ere, kiyọ uyoyou udidi nana gbe omaurokpotọ kẹ Jihova i ru owhẹ jiroro nọ e mai wuzou na evaọ uzuazọ ra. Whọ rehọ oma ra mudhe kẹ Jihova re who ru oreva riẹ, whọ tẹ rehọ ame-ọhọ dhesẹ omaromudhe ra na via. (Ahwo Rom 14:7, 8) Re whọ sai ru eyaa nọ whọ ya kẹ Jihova na gba, o gwọlọ nọ who re ru oware ofa nọ Jọn ọ ta.

“MA RE KOKO IJAJE RIẸ”

7. Evẹ họ ijaje Ọghẹnẹ jọ, kọ eme o gwọlọ re ma koko ai?

⁷ Jọn o dhesẹ oware nọ uyoyou kẹ Ọghẹnẹ u dhesẹ: “Ma re koko ijaje riẹ.” Eme họ ijaje Ọghẹnẹ? Jihova ọ rehọ ẹkwoma Ebaibol na kẹ omai ijaje jọ nọ ọ fodẹ gbiae. Wọhọ oriruo, ọ ghọ iruemu wọhọ idieda-thomawa, ọfariẹ-ogbe, ẹdhọgọ, ujitho, gbe ọrueta. (1 Ahwo Kọrint 5:11; 6:18; 10:14; Ahwo Ẹfẹsọs 4:28; Ahwo Kọlọsi 3:9) Ekoko ijaje Ọghẹnẹ o gwọlọ inọ ma re lele itee uruemu ivevẹ nọ e rrọ Ebaibol na.

8, 9. Ẹvẹ ma sae rọ riẹ oware nọ o rẹ were Jihova evaọ eware nọ Ebaibol e jọ fodẹ uzi jọ gbiae he? Kẹ oriruo.

⁸ Rekọ re ma ru Jihova eva were, orọnikọ ijaje riẹ nọ ọ fodẹ gbiae ọvo ma re koko ho. Jihova ọ rehọ izi gba omai hi evaọ kabọ kabọ uzuazọ mai. Fikiere, ma rẹ sae nyaku iyero buobu kẹdẹ kẹdẹ enọ Ebaibol e fodẹ ijaje jọ dẹẹ kpahe he. O tẹ via ere, ẹvẹ ma sae rọ riẹ oware nọ o te were Jihova? Ma rẹ jọ Ebaibol na ruẹ oghẹrẹ nọ Ọghẹnẹ o re rri eware. Nọ ma te se Ebaibol na, ma rẹ riẹ eware nọ e rẹ were Jihova gbe enọ e rẹ dhae eva. (Olezi 97:10; Itẹ 6:16-19) Ma vẹ te riẹ oghẹrẹ iruemu nọ e rẹ were iẹe. Epanọ ma wuhrẹ kpahe oghẹrẹ nọ Jihova ọ rrọ gbe idhere riẹ te, ere ma te kuvẹ te re iroro riẹ e kpọ iroro-ejẹ gbe owojẹ mai. Fikiere, otẹrọnọ uyero jọ o r’otọ nọ uvumọ uzi Ebaibol jọ dẹẹ o ta ẹme kpahe he, ma rẹ sae riẹ oware nọ “oreva Ọnowo na o rọ” ghele.—Ahwo Ẹfẹsọs 5:17.

⁹ Wọhọ oriruo, Ebaibol e k’omai uzi jọ gbiae he onọ o ta nọ ma rri ighe etẹlivisiọne jọ họ nọ a re jo dhesẹ ozighi hayo ọfariẹ-ogbe. Kọ ma ginẹ gwọlọ ugogo uzi jọ nọ o rẹ ta k’omai inọ ma re riwi eware itieye na ha? Ma riẹ oghẹrẹ nọ Jihova ọ rehọ eware itieye na. Ebaibol na e ta k’omai vevẹ nọ: “Ẹzi [Jihova] o mukpahe ọnọ o you igbruku (hayo, ozighi).” (Olezi 11:5) O tẹ jẹ ta nọ: “Ọghẹnẹ o re ti guẹdhọ ibruẹhwae gbe igberedia.” (Ahwo Hibru 13:4) Ma te roro ziezi kpahe eme yena, ma rẹ sae ruẹ vevẹ oware nọ oreva Jihova o rrọ. Fikiere ma rẹ keria rri oghẹrẹ eware nọ Ọghẹnẹ ọ ghọ họ. Ma riẹ inọ eva e rẹ were Jihova nọ ma tẹ whaha eware etọtọ nọ akpọ nana ọ be rọ viẹ ahwo họ, enọ a bi se eware-ẹkeriotọ gheghe na.a

10, 11. Fikieme ma jẹ salọ inọ ma re yoẹme kẹ Jihova, kọ ẹvẹ ma re yoẹme kẹe te?

¹⁰ Ugogo ẹjiroro vẹ o be lẹliẹ omai koko ijaje Ọghẹnẹ? Fikieme ma jẹ gwọlọ inọ ma re ru oware nọ o rẹ were Ọghẹnẹ kẹdẹ kẹdẹ? Orọnikọ re ma ruẹse whaha uye hayo ebẹbẹ nọ i re te enọ i bi veghe uzou kẹ oreva Ọghẹnẹ ma bi ro ru ere he. (Ahwo Galesha 6:7) Ukpoye, ma rri ẹmeoyo kẹ Jihova wọhọ uvẹ oghaghae nọ ma re ro dhesẹ inọ ma you rie. Wọhọ epanọ ọmọ ọ rẹ daoma wo ọjẹrehọ ọsẹ riẹ na, ere ma gwọlọ wo ọjẹrehọ Jihova. (Olezi 5:12) Ọye họ Ọsẹ mai, yọ ma you rie. Oware nọ o rẹ mae k’omai evawere họ re ma riẹ inọ ma bi yeri uzuazọ nọ o be lẹliẹ omai “wo aruoriwo no obọ ỌNOWO na tha.”—Itẹ 12:2.

¹¹ Fikiere orọnikọ ma re yoẹme kẹ Ọghẹnẹ avọ ẹgo ho; yọ orọnọ evaọ umutho eware jọ ọvo ma re jo yoẹme kẹe he.b Orọnikọ okenọ uzi jọ u kiehọ omai oma ọvo ma rẹ salọ nnọ ma re koko iei hi hayo nọ o jẹ rrọ bẹbẹ ma vẹ siẹe ba ekoko. Ukpoye, ma re ‘yoẹme no eva ze.’ (Ahwo Rom 6:17) Ma rẹ jọ wọhọ ọso-ilezi na, ọnọ o kere nọ: “Ijaje ra nọ ome you, e rẹ were omẹ eva.” (Olezi 119:47) Ẹhẹ, o rẹ were omai re ma yoẹme kẹ Jihova. Ma riẹ inọ o te ohwo nọ ma rẹ rehọ eva mai kpobi yoẹme kẹ, yọ ere Jihova ọ ginẹ gwọlọ. (Iziewariẹ 12:32) Ma gwọlọ inọ epanọ Ebaibol e ta kpahe Noa na ere Jihova ọ rẹ ta kpahe omai re. Rọ kpahe ọzae ẹrọwọ yena, ọnọ o dhesẹ inọ o you Ọghẹnẹ ẹkwoma ẹme nọ o yo kẹe evaọ ikpe buobu na, Ebaibol e ta nọ: “Noa o te ru onana; jegbe eware kpobi nọ Ọghẹnẹ ọ ta kẹ e.”—Emuhọ 6:22.

12. Ẹvẹ ẹmeoyo mai ọ rẹ jọ nọ o jẹ wha evawere se Jihova?

¹² Ma te bi yoẹme kẹ Jihova no eva ze, ẹvẹ o rẹ jariẹ oma? Ebaibol e ta nnọ u re ru ei “eva were.” (Itẹ 27:11) Kọ ẹmeoyo mai o rẹ ginẹ wha evawere se Olori Osu ehrugbakpọ na? Ee, yọ orọnikọ gheghe o rọ rrọ ere he! Jihova ọ ma omai avọ ufuoma ẹsalọ. Onana u dhesẹ inọ ma wo uvẹ nọ ma rẹ rọ salọ oware nọ ma gwọlọ ru; ma rẹ sae salọ inọ ma gwọlọ yoẹme kẹ Ọghẹnẹ, hayo inọ ma gwọlọ veghe uzou kẹe. (Iziewariẹ 30:15, 16, 19, 20) U te no omai eva ze inọ ma re yoẹme kẹ Jihova, yọ otẹrọnọ udu nọ o vọ avọ uyoyou o wọ omai ru ere, ma ti ru eva were Ọsẹ obọ odhiwu mai gaga. (Itẹ 11:20) Yọ edhere uzuazọ nọ ọ mai woma kpobi ma be salọ re na.

“IJAJE RIẸ ERỌ OWHA OGBẸGBẸDẸ HẸ”

13, 14. Fikieme ma sae rọ ta inọ “ijaje [Ọghẹnẹ] erọ owha ogbẹgbẹdẹ hẹ,” kọ oriruo vẹ whọ sai ro dhesẹ iẹe?

¹³ Jọn ukọ na ọ ta ẹme jọ kpahe itee Jihova nọ o rẹ bọ omai ga ziezi: “Ijaje riẹ erọ owha ogbẹgbẹdẹ hẹ.” Itee Jihova e rẹ rọ uye bẹ omai hi. Izi riẹ e ga hrọ họ kẹ ahwo-akpọ sebaẹgba.

¹⁴ Ma rẹ sae rehọ oriruo nana dhesẹ ẹme na. Ogbẹnyusu ọkpekpe ra jọ ọ ta nọ who fi obọ họ kẹe kwa kpohọ uwou ofa. O wo ewha buobu nọ ọ gwọlọ wọ. Ewha na jọ e rrọ vovori, fikiere omọvo ọ rẹ sae wọ ai lọlọhọ, rekọ ewha efa jọ e rrọ gbẹgbẹdẹ, fikiere imava e rẹ wọ ae. Ogbẹnyusu ra o te dhesẹ ewha nọ ọ gwọlọ nọ whọ wọ k’owhẹ. Kọ ọ te ta nọ whọ wọ ewha nọ ọ riẹ nọ e gbẹdẹ hrọ k’owhẹ? Ijo. Orọnikọ ewha nọ ọ riẹ nọ e te bẹ owhẹ ẹwọ ọ te k’owhẹ hẹ. Epọvo na re, Ọghẹnẹ oyoyou mai ọnọ ọ rrọ wowou ọ rẹ ta kẹ omai hi inọ ma koko ijaje nọ e ga vi omai. (Iziewariẹ 30:11-14) Ọ rẹ ta kẹ omai vievie he inọ ma wọ owha ogbẹgbẹdẹ utioye na. Jihova ọ riẹ utho ẹgba mai, keme “ọ riẹ epanọ a rọ ma omai; ọ be kareghẹhọ nọ mai ẹkpẹ gheghe.”—Olezi 103:14.

15. Fikieme o jẹ sai mu omai ẹro inọ ijaje Jihova e rrọ rọkẹ ewoma mai?

¹⁵ Ijaje Jihova e rrọ ewha egbẹgbẹdẹ vievie he; e rrọ rọkẹ ewoma mai. (Aizaya 48:17) Fiki onana Mosis ọ rọ ta kẹ emọ Izrẹl nọ: ‘ỌNOWO o te juzi kẹ omai re ma koko ijaje nana, re ma dhozọ ỌNOWO Ọghẹnẹ mai fiki ewoma mai kẹse kẹse, re ọ ruẹse sẹro uzuazọ mai, wọhọ epanọ o rọ nẹnẹ na.’ (Iziewariẹ 6:24) O rẹ sai mu omai ẹro re inọ fikinọ Jihova ọ gwọlọ re eware i woma k’omai bẹdẹ bẹdẹ ọ rọ kẹ omai izi riẹ. U gbe omai unu hu inọ ere izi Ọghẹnẹ e rrọ. Jihova yọ Ọghẹnẹ nọ o wo areghẹ nọ o wo umuo ho. (Ahwo Rom 11:33) Fikiere ọ riẹ oware nọ o mai woma k’omai. Jihova ọ tẹ jẹ rrọ ehri uyoyou. (1 Jọn 4:8) Uyoyou, onọ o rrọ ẹkoma riẹ, u re dhesẹ oma via evaọ eme kpobi nọ ọ rẹ ta gbe eware kpobi nọ o re ru. A rẹ ruẹ uyoyou evaọ izi kpobi nọ o fihọ kẹ idibo riẹ.

16. Ghelọ eware iyoma akpọ ogbekuo nana avọ sebaẹgba mai, ẹvẹ ma sai ro yeri uzuazọ ẹmeoyo?

¹⁶ Orọnikọ onana u dhesẹ inọ o nwane rrọ lọlọhọ họ re a yoẹme kẹ Ọghẹnẹ. O gwọlọ nọ ma re mugba kẹ eware iyoma erọ akpọ ogbekuo nana nọ “ọ rọ obọ ogaga oyoma na.” (1 Jọn 5:19) Ma rẹ jẹ dadamu kẹ sebaẹgba mai, onọ o rẹ wọ omai gwọlọ raha izi Ọghẹnẹ. (Ahwo Rom 7:21-25) Rekọ ma te you Ọghẹnẹ ma rẹ sae kparobọ. Jihova ọ rẹ ghale enọ e be rehọ ẹmeoyo dhesẹ inọ a you rie. Ọ rẹ rehọ ẹzi ọfuafo riẹ kẹ “enọ i biyo ẹme riẹ.” (Iruẹru Ikọ Na 5:32) Ẹzi na o re fi obọ họ k’omai mọ ibi iwoma, koyehọ ekwakwa-aghae nọ i re fi obọ họ kẹ omai yere uzuazọ ẹmeoyo.—Ahwo Galesha 5:22, 23.

17, 18. (a) Eme ma te jọ obe nana ta kpahe, yọ ma bi ru ere na, eme u fo nọ ma rẹ kareghẹhọ? (b) Eme ma te ta kpahe evaọ uzoẹme nọ o rrọ aro na?

¹⁷ Ma te jọ obe nana t’ẹme kpahe izi gbe itee uruemu erọ Jihova gbe abọfa sa-sa ọrọ oreva riẹ. Nọ ma bi ru ere na, eware jọ nọ e roja e riẹ nọ i fo nọ ma rẹ kareghẹhọ. Joma kareghẹhọ inọ Jihova ọ rẹ gb’omai họ re ma koko izi riẹ hẹ; ọ gwọlọ re ma yoẹme kẹe no udu mai ze. Jọ o thọrọ omai ẹro ho inọ Jihova ọ gwọlọ nọ ma yeri oghẹrẹ uzuazọ nọ o rẹ wha eghale se omai enẹna, je su kpohọ uzuazọ ebẹdẹ bẹdẹ evaọ obaro. Yọ joma rehọ ẹmeoyo mai wọhọ uvẹ oghaghae nọ ma re ro dhesẹ kẹ Jihova inọ ma you rie gaga.

¹⁸ Re ma sae riẹ oware nọ u woma gbe onọ u yoma, Jihova ọ k’omai obroziẹ-iroro. Rekọ, re obroziẹ-iroro mai o kpọ omai ziezi, u fo inọ ma re wuhrẹ iẹe, wọhọ epanọ uzoẹme nọ o rrọ aro na u ti dhesẹ.

[Oruvẹ-obotọ]

ẸVẸ WHỌ TE K’UYO?

▪ Oghẹrẹ ẹmeoyo vẹ Jihova o rẹro riẹ mi enọ e be gọe, kọ ẹvẹ onana o rọ rrọ rọkẹ ewoma mai?—Iziewariẹ 5:28-33.

▪ Ẹvẹ ẹmeoyo mai ọ rrọ Jihova oja te? —1 Samuẹle 15:22, 23.

▪ Eme ma rẹ sai wuhrẹ mi Jesu evaọ ẹmeoyo kẹ Ọghẹnẹ?—Jọn 8:29.

▪ Fikieme u je fo re ma yoẹme kẹ Jihova?—Eviavia 4:11.

[Uwoho nọ e rrọ ẹwẹ-obe avọ 4]

[Uwoho nọ e rrọ ẹwẹ-obe avọ 6]

Omarọkẹ gbe ame-ọhọ yọ emuhọ ọrọ uzuazọ ẹmeoyo kẹ Jihova