UWOU-EBE ITANẸTE Uwou-Eroro
UWOU-EBE ITANẸTE
Uwou-Eroro
Isoko
Ọ
  • Ẹ
  • ẹ
  • Ọ
  • ọ
  • EBAIBOL
  • EBE GBE EWARE EFA
  • IWUHRẸ
  • be uwuhrẹ 6 ẹwẹ. 101-104
  • Emamọ Ẹgba-Ofihọ Ẹme

Ọnana o wo ividio ho.

Eva e dha owhẹ hẹ, ividio na ọ rọwo kporo ho.

  • Emamọ Ẹgba-Ofihọ Ẹme
  • Wo Erere No Ewuhrẹ Ọ Isukulu Odibọgba Esuo-Ọghẹnẹ Ze
  • Onọ O Wọhọ E Riẹ
  • Ikereakere Nọ A Re Se Avọ Emamọ Ẹgba-ofihọ
    Wo Erere No Ewuhrẹ Ọ Isukulu Odibọgba Esuo-Ọghẹnẹ Ze
  • Ẹgba-ofihọ Igogo Eme
    Wo Erere No Ewuhrẹ Ọ Isukulu Odibọgba Esuo-Ọghẹnẹ Ze
Wo Erere No Ewuhrẹ Ọ Isukulu Odibọgba Esuo-Ọghẹnẹ Ze
be uwuhrẹ 6 ẹwẹ. 101-104

Uwuhrẹ 6

Emamọ Ẹgba-Ofihọ Ẹme

Eme o gwọlọ nọ who re ru?

Fiẹgba họ eme evaọ edhere nọ enọ e be gaviezọ na a re ro wo otoriẹ eme na lọlọhọ.

FIKIEME U JE WUZOU?

Ẹgba nọ a fihọ ẹme ta ziezi u re fiobọhọ kẹ oruẹme na kru iroro ogbotu na jẹ tẹzẹ ae hayo kẹ ae ajọwha.

NỌ WHỌ tẹ be t’ẹme hayo se do via, orọnikọ who re se ibieme na kpobi gbagba ọvo ho rekọ u wuzou re who fiẹgba họ igogo eme nọ i wuzou ẹme na evaọ edhere nọ e rẹ rọ jọ vevẹ.

Emamọ ẹgba-ofihọ ẹme o gwọlọ vi eme jọ nọ a re se avọ ẹgba ọvo. A re fiẹgba họ ugogo eme nọ i fo na hrọ. Who te fiẹgba họ eria nọ u fo ho, otofa ẹme nọ whọ be ta na u gbe ti vẹ kẹ ogbotu ra ha, iroro rai i ve ti reghe kpohọ eware efa no. Dede nọ ẹme na o ti woma, ẹme nọ a jo fiẹgba họ eria nọ i fo ho ọ rẹ kẹ ogbotu na ajọwha tere he.

A re fiẹgba họ ẹme viere evaọ idhere buobu, ẹsejọ a rẹ gua ae kugbe: ẹkwoma uvo nọ a rẹ kpare, ẹkwoma uvo nọ a re nwene, ẹkwoma eme nọ a re kele, ẹkwoma izudhe taure a tẹ te t’ẹme na hayo a tẹ t’ẹme na no (hayo ivẹ na), gbe ẹkwoma oma-orọtẹme hayo enwene ovao. Evaọ evẹrẹ jọ, a rẹ sai go uvo kpotọ hayo kpehru ro fiẹgba họ ẹme. Roro kpahe ẹme na gbe uyero na rọ riẹ onọ o te mai fo.

Whọ tẹ be jiroro eme nọ who re fiẹgba họ, roro kpahe enana. (1) Evaọ uhie-ẹme kpobi, eme nọ a re fiẹgba họ i re dhesẹ oma via orọnikọ ẹkwoma uhie-ẹme na kpobi ọvo ho rekọ ẹkwoma eme nọ e ware riẹ họ. (2) A sae rọ ẹgba-ofihọ dhesẹ emuhọ ogha ẹme ọkpokpọ, makọ ugogo ẹme jọ hayo enwene gheghe ọrọ owọ iroro-ejẹ. O sai je si iroro kpohọ ekuhọ iroro-ejẹ. (3) Oruẹme ọ sai fiẹgba họ ẹme ro dhesẹ epanọ ẹme na ọ riẹe oma. (4) A sai je fiẹgba họ ẹme ro dhesẹ igogo eme nọ e rọ ẹme na.

Re a sae rọ ẹgba-ofihọ ẹme ro ruiruo evaọ idhere enana, oruẹme hayo osisase ẹgbede o re wo otoriẹ obe na ziezi ọ vẹ jẹ gwọlọ gaga nọ ogbotu riẹ a riẹ otọ riẹ. Kpahe ohrẹ nọ a kẹ evaọ edẹ Ẹzra, Nehemaya 8:8 o ta nọ: “A te se obe na, ro no obe Izi Ọghẹnẹ ze vevẹ; a te dhesẹ iẹ ziezi, fikiere ahwo na a tẹ riẹ otọ isase na vevẹ.” O rọ vevẹ inọ enọ i se jẹ f’otọ Uzi Ọghẹnẹ evaọ oke oyena a riẹ epanọ u wuzou te re a fiobọhọ kẹ ogbotu rai wo otoriẹ ẹme nọ a bi se na, re o daruọ ae oma, je fi ei h’iruo.

Oware nọ O Sae Wha Ẹbẹbẹ Ze. Ahwo buobu a re ru ẹme rai vẹ evaọ ẹmeọta ekẹdẹ kẹdẹ. Rekọ, okenọ a te bi se ẹme nọ omọfa o kere, iroro-ejẹ eme nọ a re fiẹgba họ o vẹ jọ use-abọ. Ifue na họ ewo otoriẹ obe na. Oyena o gwọlọ ewuhrẹ omarototọ ọrọ eme nọ a kere na. Fikiere otẹrọnọ a ta kẹ owhẹ re who se oria jọ eva ewuhrẹ ukoko, whọ rẹ ruẹrẹ oma họ ziezi.

Ahwo jọ a rẹ rehọ oware nọ a re se “ẹgba-ofihọ unọjọ u tọjọ “ro ruiruo viukpọ ẹgba-ofihọ ẹme. A te te oria jọ a ve fiẹgba họ eme jọ makọ u fo hayo u fo ho. Amọfa a re fiẹgba họ eme nọ i do sasasa, ẹsejọ tube fiẹgba họ eme ọwhẹgbe. Okenọ ẹgba-ofihọ na o gbe fiba eruvẹ ẹme na ha, u ve zihe ruọ ẹkoma ohwo, ẹme na o gbe siuru hu.

Evaọ omodawọ re a fiẹgba họ ẹme, iruẹme jọ e rẹ kpare uvo rai kpehru evaọ edhere nọ o re ru ogbotu na roro nọ ọ be whọku ai. Oyena o rẹ kake wha emamọ iyẹrẹ ze he. Ẹgba-ofihọ ẹme o gbe no eva ze he, o sai dhesẹ kẹ ogbotu na nọ o bi rri rai vo. Ẹvẹ o rẹ mai woma te re a nyate udu rai ẹkwoma uyoyou je fiobọhọ kẹ ai ruẹ nọ ẹme nọ a be ta na o no Ikereakere ze je wo iroro!

Epanọ A re Ro Ru Woma Viere. Ẹsibuobu ohwo nọ o wo ẹbẹbẹ ẹgba-ofihọ ẹme ọ rẹ riẹ kpahe iẹe he. U re fo re omọfa ọ rehọ iẹe kpọe ozọ. U te fo re who ru ẹnyaharo evaọ abọ nana, ọsẹro isukulu ra o ti fiobọhọ k’owhẹ. Ofariẹ, yare obufihọ mi omọfa nọ ọ rẹ riẹme ta. Ta kẹe re ọ gaviezọ k’owhẹ ziezi evaọ isase gbe ẹmeọta ra re ọ jẹ kẹ ẹjiroro kpahe ẹnyaharo.

Wọhọ emuhọ, ọkohrẹ ra ọ sae jiroro nọ whọ rehọ uzoẹme jọ evaọ Uwou-Eroro Na ro wuhrẹ. Ababọ avro ọ te ta k’owhẹ re whọ kiẹ uhie-eme kpobi riwi re whọ riẹ eme nọ i fo nọ a re fiẹgba họ re otofa ẹme na o jọ vevẹ. Ọ sae kareghẹhọ owhẹ re who muẹrohọ eme nọ a kere jẹlẹ ziezi. Kareghẹhọ nọ eme nọ e rọ uhie-ẹme e rẹ nya kugbe ohwohwo. Ẹsibuobu, a re fiẹgba họ ekru eme, orọnikọ ubiẹme ovo ho. Evaọ evẹrẹ jọ, a rẹ sae tuduhọ emọ-isukulu awọ re o muẹrohọ oware nọ oka nọ a kpehọ u dhesẹ kpahe ẹgba-ofihọ.

Wọhọ owojẹ ofa evaọ ewuhrẹ eme nọ a re fiẹgba họ, ọkohrẹ ra ọ sae tuduhọ owhẹ awọ re who roro kpahe oria nọ o kẹre vi uhie-ẹme. Eme họ ugogo ẹjiroro ẹme nọ ọ rọ edhe-ẹme na? Ẹvẹ oyena u re ro kpomahọ ẹme nọ whọ rẹ jọ uhie-ẹme kpobi fiẹgba họ? Rri uzoẹme uwuhrẹ na gbe uzoẹme-osese ikpokpoko nọ e rọ obe na. Didi abọ onana u wo kpahe eme nọ whọ rẹ salọ nọ who re fiẹgba họ? Enana kpobi yọ eware nọ a re roro kpahe. Rekọ yọroma re whọ se ẹgba ba efihọ eme bu ga hrọ.

Makọ who bi ti ru ẹme n’uzou ze hayo who bi se, ọkohrẹ ra ọ sae jẹ tuduhọ owhẹ awọ re whọ kuvẹ re oghẹrẹ ẹjiroro ra na o kpomahọ ẹgba-ofihọ ẹme ra. U fo re whọ riẹ oria nọ owọ ẹjiroro na u jo kuhọ hayo oria nọ ẹme na ọ jọ nwene no ẹjiroro obọdẹ jọ ruọ ọfa. O te were ogbotu na eva otẹrọnọ ẹme ra o fiobọhọ kẹ ae vuhu eria enana mu. A rẹ sai ru onana ẹkwoma ẹgba nọ a re fihọ eme wọhọ orọ ọsosuọ, ofariẹ, orọ urere, oye jabọ, gbe avọ iroro.

Ọkohrẹ ra ọ sae jẹ kpọ iroro ra kpohọ eme nọ whọ gwọlọ nwene uvo kẹ. Re who ru onana whọ sai fiẹgba họ eme wọhọ gaga, riẹriẹriẹ, vievie, ababọ iroro, u wuzou, gbe ẹsikpobi. Ere nọ who re ru o sai kpomahọ epanọ ẹme nọ whọ be ta o re duobọhọ ogbotu ra te. Ma te ta kpahe onana viere evaọ Uwuhrẹ avọ 11, “Ẹsasa gbe Oma-Iroro.”

Re who ru ẹnyaharo evaọ ẹgba-ofihọ ẹme ra, a te jẹ tuduhọ owhẹ awọ re igogo eme nọ whọ gwọlọ nọ ogbotu ra ọ kareghẹhọ e jọ owhẹ iroro vevẹ. Ma te t’ẹme kpahe onana viere evaọ abọ isase ẹgbede evaọ Uwuhrẹ avọ 7, “Ẹgba-Ofihọ Igogo Eme,” jẹ kpahe ofẹ ẹmeọta evaọ Uwuhrẹ avọ 37, “Eruvẹ Igogo Eme.”

Whọ tẹ be daoma ru ẹnyaharo evaọ odibọgba ra, muẹrohọ epanọ who re se ikereakere ziezi. Ru ei fihọ uruemu re whọ hae nọ oma ra nọ, ‘Fikieme me je bi se ikere nana?’ Rọkẹ owuhrẹ, re whọ ta ẹme na ziezi ọvo u te he. Makọ ese ikere na avọ iroro ọvo u te he. Whọ tẹ be kẹ uyo onọ ohwo hayo who bi wuhrẹ ugogo uzẹme jọ, u re woma re whọ jọ ikereakere na fiẹgba họ eme nọ e tha oware nọ whọ be ta kpahe na uke. Ogbẹrọ ere he, ẹme na o ti vẹ kẹ ohwo nọ who bi se ikere na kẹ na ha.

Nọ orọnọ ẹgba-ofihọ ẹme o gwọlọ ẹgba ọfa nọ a re fiba eme jọ na, oruẹme ọkpokpọ ọ sai fiẹgba họ eme eyena ga hrọ. Oware nọ u re noi ze họ o rẹ wọhọ ohwo nọ o bi wuhrẹ ekporo okwakwa ikporakporo jọ. Rekọ, avọ ewuhrẹ, “edo” ole na o re ti kiehọ abọ “ikporakporo” nọ e rẹ were oma.

Who te wuhrẹ igogo uwuhrẹ na jọ no, who re ti wo erere ẹkwoma ẹromuhọ iruẹme nọ i wo ona. Kẹle na whọ vẹ te riẹ oware nọ who re ru gba ẹkwoma ẹgba-ofihọ oghẹrẹ sa-sa. Yọ whọ te ruẹ ewoma ẹgba-ofihọ evaọ idhere sa-sa re ẹme nọ whọ be ta na ọ ruẹsi vẹ. Emamọ ẹgba-ofihọ ẹme ọ te lẹliẹ ewoma isase gbe ẹmeọta ra nyaharo gaga.

Who wuhrẹ eware ehruehru ọvo kpahe ẹgba-ofihọ họ. Re whọ sae t’ẹme ziezi, gbẹ hae rehọ iẹe ruiruo bẹsenọ ẹgba-ofihọ ẹme ọ rẹ reria owhẹ obọ je do ziezi evaọ ezọ amọfa.

EPANỌ A RE RO RU EI

Wuhrẹ evuhumu eme gbe ekru eme nọ i wuzou evaọ uhie-ẹme. Daoma vuhu onana mu no eme nọ e wariẹ e riẹ họ na ze.

Daoma rehọ ẹgba-ofihọ dhesẹ (1) enwene iroro gbe (2) epanọ ẹme nọ whọ be ta ọ rọ owhẹ oma.

Who te bi se ikereakere, ru ei fihọ uruemu re who fiẹgba họ eme nọ e tha ẹjiroro nọ who ro se ikere na uke dẹẹ.

ORIA IRUO: (1) Salọ ikereakere ivẹ nọ whọ rẹ jọ usiuwoma se gaga. Riẹ oware nọ whọ be gwọlọ rọ ikere ọvuọvo dhesẹ. Se ikere na do via evaọ edhere nọ who re ro fiẹgba họ eme hayo ekru eme nọ e tha igogo eme na uke. (2) Wuhrẹ Ahwo Hibru 1:1-14. Fikieme a je fiẹgba họ eme na “eruẹaro” (owọ 1), “Ọmọ” (owọ avọ 2), “ikọ odhiwu” (owọ 4), gbe “ukọ-odhiwu” (owọ 5) re a ro dhesẹ owọ iroro-ejẹ nọ o rọ uzou nana? Wuhrẹ ese uzou na avọ ẹgba-ofihọ eme nọ e rẹ lẹliẹ owọ iroro na romavia vevẹ.

    Ebe Isoko Kpobi (1992-2025)
    Noi No
    Rueva
    • Isoko
    • Vi Ei Se Omọfa
    • Ru Ei Fihọ Oghẹrẹ nọ O Were Owhẹ
    • Copyright © 2025 Watch Tower Bible and Tract Society of Pennsylvania
    • Izi Kpahe Eroruiruo Evuẹ Na
    • Izi Oria Evuẹ Omobọ Ra
    • Esẹtini Oria Evuẹ Omobọ Ra
    • JW.ORG
    • Rueva
    Vi Ei Se Omọfa