Uwuhrẹ 7

Ẹgba-ofihọ Igogo Eme

Eme o gwọlọ nọ who re ru?

Okenọ who te bi se do via, fiẹgba họ igogo eme nọ e rọ oria nọ who bi se na, orọnikọ evaọ uhie-eme jọ ọvo ho.

FIKIEME U JE WUZOU?

O te lọhọ re a mae kareghẹhọ ovuẹ ra otẹrọnọ who fiẹgba họ igogo eme na.

EMAMỌ osisase o re rri vrẹ uhie-eme na, tubẹ vrẹ edhe-ẹme nọ o jọ roma via dede. Nọ o te bi se, ọ rẹ kareghẹhọ igogo ẹjiroro nọ e rọ oma oria na soso. Onana u re kpomahọ ẹgba nọ o re fihọ eme.

Ohwo o gbe lele edhere nana ha, ẹme riẹ ọ rẹ jọ dokpodokpo. A rẹ sae riẹ eme nọ e mai wuzou evaọ ẹme riẹ hẹ. O te ku ẹme na họ no, o rẹ jọ bẹbẹ re a kareghẹhọ oware jọ nọ u wuzou.

Ẹro nọ a re muhọ otọ ziezi ro fi ẹgba họ igogo ẹjiroro ẹme u re fiobọhọ gaga ru isase ikuigbe Ebaibol woma. Ẹgba-ofihọ otiọye na o sai fi awere họ isase idhe-eme eva obe uwuhrẹ Ebaibol hayo eva ewuhrẹ ukoko. Yọ o rẹ mai tube wuzou evaọ okenọ ohwo o te bi ru ẹme nọ a re se ọvo, wọhọ epanọ o rẹ jọ ẹsejọ evaọ ikokohọ ilogbo mai na.

Epanọ A re Ru Ei. Evaọ isukulu na, a sae ta k’owhẹ re who se oria jọ no Ebaibol na ze. Eme who re fiẹgba họ? Otẹrọnọ ugogo ẹjiroro jọ hayo oware jọ nọ u wuzou o rọ oria nọ whọ gwọlọ se na, u re wuzou re who ru ei via.

Oria nọ who bi ti se na o tẹ make rọ eme-ọketa hayo ẹmeọta gheghe, eme itẹ hayo ikuigbe, ogbotu ra o ti wo erere otẹrọnọ whọ riẹ riẹe se. (2 Tim. 3:16, 17) Re who ru onana who re roro kpahe oria nọ who bi ti se na gbe ogbotu ra.

Otẹrọnọ who ti se do via no obe jọ ze evaọ uwuhrẹ Ebaibol hayo evaọ ewuhrẹ ukoko, ugogo ẹjiroro vẹ u fo nọ who re fiẹgba họ? Rehọ iyo enọ nọ e rọ oria na wọhọ igogo ẹjiroro oria na. Je fiẹgba họ eme nọ i w’obọ kpahe uzoẹme-osese ibiẹme ikpokpoko nọ e rọ obehru oria na.

U kiehọ họ re who kere eme kpobi nọ whọ gwọlọ ro ru ẹme evaọ ukoko fihọ obe. Dede na, evaọ ẹsejọ, a rẹ ruẹrẹ eme ọ ikokohọ ilogbo na jọ họ kẹ ese ọvo re a sae ta eme na oghẹrẹ ovona evaọ ikokohọ na kpobi. Re ọ sai fiẹgba họ igogo ẹjiroro ẹme na evaọ ẹme otiọye na, oruẹme na ọ rẹ kake roma totọ roro kpahe obe ẹme na. Eme họ igogo eme na? Ọ rẹ sai vuhu enana. Orọnikọ eme nọ o roro nọ i siuru ọvo họ igogo eme na ha. Igogo eme na họ igogo ẹjiroro nọ i ru ẹme na via. Ẹsejọ uhie-eme okpẹkpẹe orọ ugogo ẹjiroro jọ evaọ obe ẹme na o rẹ jọ emuhọ ikuigbe hayo owọ-ẹme iroro jọ. Ẹsibuobu, a rẹ t’ẹme nọ o wo ẹgba evaọ okenọ a te dhesẹ eme nọ e tha riẹ uke no. Nọ o te vuhu igogo eme nana no, oruẹme na o re kpoka họ ae evaọ obe-ẹme riẹ. Enana e rẹ jọ buobu hu, ẹsejọhọ e rẹ jọ ene hayo isoi. Ofariẹ o re wuhrẹ ese riẹ evaọ edhere nọ ogbotu na ọ sai ro vuhu igogo ẹjiroro ẹme na. Enana họ eme nọ e mae viodẹ evaọ ẹme na. A te se ẹme na avọ emamọ ẹgba-ofihọ, o rẹ jọ lọlọhọ re a kareghẹhọ igogo ẹjiroro ẹme na. Oyena o rẹ jọ ute oruẹme na.

Idhere buobu e riẹ nọ oruẹme na o re ro fiẹgba họ ẹme na evaọ edhere nọ o re fiobọhọ kẹ ogbotu na vuhu igogo eme na. Ọ rẹ sai g’uvo kpehru, ta ẹme na vẹrẹ hayo kpẹlẹ, ru ẹme na wo urirẹ, hayo rọ oma dhesẹ ẹme na, gbe efa buobu.

EWARE NỌ A RẸ KAREGHẸHỌ

Kiẹ obe na riwi re who vuhu igogo ẹjiroro nọ i ru ẹme na via. Kpoka họ ae.

Okenọ who te bi se do via, g’uvo ra kpehru, ta ẹme na vẹrẹ hayo kpẹlẹ, hayo ru ẹme na wo urirẹ, wọhọ epanọ u fo, re who ru igogo ẹjiroro ẹme na lahwe.

ORIA IRUO: Salọ idhe-ẹme isoi no uzoẹme Uwou-Eroro nọ a bi ti wuhrẹ ze. Siusi fihọ iyo enọ idhe-ẹme na. Se idhe-ẹme na do via evaọ edhere nọ o rẹ rọ lọhọ re ọnọ ọ be gaviezọ o vuhu iyo na lọlọhọ.