Uwuhrẹ 12

Omarọtẹme Gbe Eriwo Ovao

Eme o gwọlọ nọ who re ru?

Rehọ ẹkpare abọ, ẹkoko, hayo oma na kpobi dhesẹ iroro, hayo uruemu.

Rehọ ibiaro gbe unu na gbe ẹjẹlẹ uzou na fiẹgba họ ẹme nọ whọ be ta je ro dhesẹ oma-iroro.

FIKIEME U JE WUZOU?

Omarọtẹme gbe eriwo ovao i re fi ẹgba nọ a rẹ ruẹ gbe ọwhọ họ ẹme ra. E rẹ sae kpare iroro ra jẹ lẹliẹ uvo ra jọ sasasa.

AHWO eria jọ a rẹ roma t’ẹme vi efa. Ghele na, enwenọ ohwo kpobi o re nwene ovao hayo go oma rọ t’ẹme. Onana o rọ uzẹme okenọ who te bi lele omọfa t’ẹme gheghe gbe okenọ whọ tẹ be jọ ogbotu t’ẹme.

Omarọtẹme o jọ abọjọ ẹkoma ẹmeọta Jesu gbe ilele ọsosuọ riẹ. Evaọ okejọ, ohwo jọ ọ n’iyẹrẹ kẹ Jesu nọ oni gbe inievo riẹ a gwọlọ t’ẹme kẹe. Jesu ọ tẹ kuyo nọ: “Onohọ oni mẹ jegbe amono họ imoni mẹ?” Kẹsena Ebaibol na o te fibae nọ: “Ọ tẹ riẹ abọ riẹ ri ilele riẹ ọ tẹ ta nọ, ‘Ri oni mẹ gbe imoni mẹ!’ ” (Mat. 12:48, 49, ẹjẹlẹ ibieme na ọmai.) Fiba eria efa, Ebaibol na o dhesẹ eva Iruẹru 12:17 gbe 13:16 inọ Pita avọ Pọl ikọ na a rehọ oma t’ẹme.

Orọnikọ uvo na ọvo a rẹ rọ ta iroro ohwo ho rekọ te ẹkwoma omarọtẹme gbe eriwo ovao. Nọ a gbẹ rehọ enana ruiruo ziezi hi o sai dhesẹ nọ ọnọ ọ be t’ẹme na ọ kare osegboja. Rekọ nọ a tẹ gua ona ẹmeọta enana kugbe ziezi, o rẹ lẹliẹ ẹme woma viere. Makọ ifonu whọ be jọ t’ẹme, whọ tẹ rọ omarọtẹme avọ eriwo ovao ruiruo ziezi, uvo ra u ti dhesẹ epanọ ẹme ra o wuzou te gbe iroro obeva ra kpahe ẹme nọ whọ be ta na via viere. Fikiere, makọ whọ be t’ẹme no uzou ze hayo who bi se, makọ ogbotu ra o bi rri owhẹ hayo a bi rri Ebaibol na, omarọtẹme gbe eriwo ovao i w’uzou.

Who re si omarọtẹme hayo eriwo ovao ra no obe ze he. Who wuhrẹ epanọ a rẹ hwẹ hayo epanọ a rẹ dheva ha. Omarọtẹme u re dhesẹ iroro nọ e rọ owhẹ eva. Epanọ omarọtẹme ra o roma via dẹdẹdẹ te, ere u re woma te re.

Omarọtẹme o rọ abava: orọ edhesẹ gbe orọ ẹgba-ofihọ. Omarọtẹme edhesẹ u re dhesẹ owojẹ hayo dhesẹ oria. Evaọ isukulu na, nọ who te bi ruiruo kpahe omarọtẹme, who nuhu oma ẹsiẹvo hayo isiava ọvo ho. Roma t’ẹme evaọ oma ẹme na kpobi. O tẹ rrọ bẹbẹ k’owhẹ re who ru onana, o sai fiobọhọ re whọ gwọlọ eme nọ i dhesẹ ofẹ, ugbo, ẹruọ, oria, hayo udogbe. Rekọ evaọ ẹsibuobu, oware nọ u fo nọ who re ru kpobi họ who re duomahọ ẹme ra, whọ ruawa kpahe eme nọ whọ be ta ha, rekọ ta je ru eware wọhọ epanọ who re ru kẹdẹ kẹdẹ. Udu u te kie ohwo vi, omarọtẹme o rẹ nyaze.

Omarọtẹme ẹgba-ofihọ u re dhesẹ iroro eva gbe imuẹro. I re kpoka họ, kẹ ẹgba, jẹ kẹ ẹme ogaga. Omarọtẹme ẹgba-ofihọ u wuzou. Rekọ, yọroma! Omarọtẹme ẹgba-ofihọ o sae kọ ruọ uzou. Whọ tẹ be rọ oghẹrẹ oma ovo na rọ t’ẹme ẹsikpobi, kọ oye ahwo a re muẹrohọ ukpenọ u re ru ẹme ra woma viere. Ọsẹro isukulu ra o te dhesẹ nọ who wo ẹbẹbẹ ọnana, whọ tẹrovi omarọtẹme edhesẹ na ọvo tao. U te kri no omojọ, wariẹ zihe kpohọ omarọtẹme ọ ẹgba-ofihọ.

Re whọ riẹ epanọ whọ rẹ rọ omarọtẹme ọ ẹgba-ofihọ ruiruo te gbe oghẹrẹ omarọtẹme nọ u fo, muẹrohọ iroro ahwo nọ whọ be t’ẹme kẹ na. Obọ nọ whọ rẹ riẹ họ ogbotu na o sae lẹliẹ ai jọ wahawaha. Evaọ eria jọ, nọ ọzae ọ tẹ rọ oghẹrẹ oma jọ t’ẹme, wọhọ okenọ o te fi obọ họ unu riẹ ro dhesẹ oware nọ u gbe rie unu, a re rri onana wọhọ uruemu aye. Evaọ abọjọ akpọ na, a re rri rie yoyoma re aye ọ hae r’abọ t’ẹme. Fikiere evaọ eria eyena, inievo-emetẹ a rẹ rọ eriwo ovao ro ruiruo ziezi. Yọ abọ nọ a re veghe gaga rọ t’ẹme kẹ umutho ahwo a re rri rie fihọ oware ezaro evaọ enwenọ abọ akpọ na kpobi.

Nọ who bi wo eriariẹ je kiudu vi viere evaọ ẹmeọta na, omarọtẹme ọ ẹgba-ofihọ ra kpobi u ti dhesẹ iroro obeva ra, dhesẹ imuẹro gbe oruọzewọ ra. I ti fi otofa ba ẹmeọta ra.

Eriwo Ovao Ra. Vi abọfa oma na, ovao ra u re dhesẹ iroro nọ e rọ owhẹ eva. Ibiaro ra, oghẹrẹ nọ unu ra o rrọ, oghẹrẹ nọ whọ jẹlẹ uzou ra, aikpobi i wo ẹkabọ rai. Ababọ ẹme nọ o re no owhẹ unu ze, ovao ra o sai dhesẹ ababọ osegboja, oware otọtọ, ereghe, igbunu, hayo evawere. Eriwo ovao otiọye na o te lele ẹmeunu ra, o rẹ kẹ otoriẹ nọ a rẹ ruẹ gbe orọ ọwhọ-eva. Ọnọma na o fi iriẹ buobu họ ovao ra—bu vi iriẹ 30. Enwenọ abọvo rai i re ruiruo evaọ okenọ unu ra o tẹ rọ ohwohwẹ.

Whọ tẹ make rọ eplatfọmo hayo whọ rọ usiuwoma ota, whọ be daoma ghale ovuẹ isiuru kugbe ahwo, onọ u re ru idu rai ghọghọ. Ovao nọ o rọ ohwohwẹ u re dhesẹ oyena via. Evaọ abọdekọ riẹ, ovao ra o tẹ rọ kpimẹ, onana o sae kpare avro kpahe oruọzewọ ra.

Maero, nọ ovao o tẹ rọ ohwohwẹ o rẹ ta kẹ amọfa inọ who you rai. Oyena o mai wuzou nẹnẹ na nọ ozọ erara u re mu ahwo na. Unu ohwohwẹ ra o sai ru udu kie ahwo vi je ru ae gaviezọ kẹ ẹme nọ whọ be ta viere.

EWARE NỌ A RẸ KAREGHẸHỌ

Omarọtẹme gbe eriwo ovao nọ e rẹ mai ruiruo i re no obeva ze. Muẹrohọ oware nọ amọfa a bi ru, rekọ whọ daoma raro kele owojẹ rai kpobi hi.

Wuhrẹ obe ẹme ra bẹsenọ whọ rẹ riẹe ziezi no. Jọ u duobọte owhẹ, rue riẹ, jẹ rehọ uvo ra, abọ ra, gbe ovao ra ro dhesẹ iẹe via.

ORIA IRUO: (1) Se Emuhọ 6:13-22. Evaọ eme obọ ra, dhesẹ ebabọ okọ na gbe ekokohọ erao na. Whọ daezọ eme ibuobu na kpobi hi; thakpe ta ẹme nọ whọ kareghẹhọ. Fi omarọtẹme edhesẹ họ iruo. Ta kẹ ohwo jọ re o rri owhẹ re ọ kpahe ẹme fihọ iẹe. (2) T’ẹme epaọ ẹsenọ who bi se isẹri kẹ ohwo jọ kpahe Uvie Ọghẹnẹ gbe eghale nọ o te wha ze. Ruẹ nọ eriwo ovao ra u dhesẹ epanọ o ghinẹ rrọ owhẹ oma kpahe oware nọ who bi dhesẹ na.