Uwuhrẹ 18

Ebaibol Erọkẹ Uyo

Eme o gwọlọ nọ who re ru?

Rehọ Ebaibol na ruiruo ziezi evaọ okenọ whọ tẹ be kuyo.

FIKIEME U JE WUZOU?

Uwou nọ a vi omai họ re ma “vuẹ ovuẹ ẹme na.” Jesu o fi oriruo na h’otọ nọ ọ ta nọ: “Eme nọ mẹ ta kẹ owhai o rọ nọ udu obọ mẹ hẹ.”—2 Tim. 4:2; Jọn 14:10.

OKENỌ a tẹ nọ omai kpahe eware nọ ma rọwo, edhere uzuazọ mai, eriwo mai kpahe eviavia ọgbọna, ẹruore mai kẹ obaro, ma rẹ daoma rehọ Ebaibol na rọ kuyo. Fikieme? Fikinọ o rọ Ẹme Ọghẹnẹ. Ebaibol na ma si eware nọ ma rọwo no ze. Ma re si edhere uzuazọ mai no Ebaibol na ze. O rẹ kpọ eriwo mai kpahe eware nọ e be via evaọ akpọ na. Ẹruore mai kẹ obaro u wo owọ gaga fihọ eyaa Ebaibol nọ a kẹ ẹgba na.—2 Tim. 3:16, 17.

Ma riẹ kpahe owha-iruo nọ u lele odẹ mai na ziezi. Mai yọ Isẹri Jihova. (Aiz. 43:12) Fikiere ma rẹ za enọ, orọnikọ no ereghẹ-ididi ahwo-akpọ ze he, rekọ rono oware nọ Jihova ọ ta evaọ Ẹme riẹ nọ ọ kẹ ẹgba ze. Uzẹme, wọhọ omomọvo ma wo eriwo sa-sa kpahe eware, rekọ ma rẹ kuvẹ kẹ Ẹme Ọghẹnẹ re o kpọ eriwo mai keme u mu omai ẹro inọ uzẹme na o rọ. Dede na, Ebaibol na ọ k’omai uvẹ nọ ma rẹ rọ salọ onọ u je omai evaọ eme buobu. Ukpenọ ma rẹ gba onọ o were omai họ amọfa, o rọ isiuru mai re ma wuhrẹ amọfa ehri-izi nọ e rọ Ikereakere na, ma vẹ rọ ere kẹ enọ e be gaviezọ k’omai na uvẹ re a dhesẹ ufuoma ẹsalọ ọvona nọ ma be reawere riẹ na. Wọhọ Pọl ukọ na, ma be gwọlọ ‘rọ ahwo ziọ ẹmeoyo fiki orọwọ.’—Rom 16:26.

A dhesẹ Jesu Kristi eva Eviavia 3:14 wọhọ “oruọzewọ gbe oseisẹri uzẹme na.” Ẹvẹ ọ rọ za enọ je yeri kugbe iyero nọ a ro ze rie? Ẹsejọ ẹkwoma etadhesẹ nọ e rẹ lẹliẹ ahwo roro. Eva oke ofa ẹkwoma enọ nọ ọ rẹ nọ ọnọ ọ n’onọ na kpahe otoriẹ riẹ orọ ikereakere na. Ẹsibuobu ẹkwoma ẹwariẹ ikereakere, se eme jọ no ai ze, hayo t’ẹme fodẹ ae. (Mat. 4:3-10; 12:1-8; Luk 10:25-28; 17:32) Evaọ ikpe-udhusoi ọsosuọ na, a jẹ hai fi iko-ebe Ikereakere họ iwou-egagọ. Uvumọ imuẹro e riẹ hẹ inọ Jesu o wo iko obọ riẹ, rekọ ọ riẹ Ikereakere na ziezi yọ ọ rẹ riobọ kpohọ ae ẹsibuobu nọ o te bi wuhrẹ amọfa. (Luk 24:27, 44-47) Uzẹme ọ ghinẹ ta inọ o te bi wuhrẹ ahwo o re wuhrẹ orọ obọ riẹ hẹ. Ọ ta eme nọ ọ jọ unu Ọsẹ riẹ yo.—Jọn 8:26.

Isiuru mai họ re ma lele oriruo Jesu. Ma ri yo urru Ọghẹnẹ nọ ọ t’ẹme he, wọhọ epaọ Jesu. Rekọ Ebaibol na yọ Ẹme Ọghẹnẹ. Ma tẹ rehọ iẹe k’iyo, ma rẹ whaha iroro nọ ma re si bru omobọ mai. Ma re dhesẹ nọ ukpenọ ma fodẹ eriwo ohwo-akpọ sebaẹgba, ma gba riẹ mu gaga re ma kẹ Ọghẹnẹ uvẹ ta onọ o rọ uzẹme.—Jọn 7:18; Rom 3:4.

Dede na, isiuru mai orọnikọ re ma rehọ Ebaibol na ruiruo ọvo ho rekọ re ma rehọ iẹe ruiruo evaọ edhere nọ o rẹ mae jọ erere kẹ ọnọ ọ be gaviezọ k’omai na. Ma gwọlọ re ọ gaviezọ k’omai ziezi. Wọhọ epanọ uruemu ohwo na o rọ, whọ rẹ sae rọ Ebaibol ziọ ẹme na ẹkwoma ẹta inọ: “Kọ whọ gbẹ rọwo inọ oware nọ Ọghẹnẹ ọ ta họ onọ u ghine muẹme?” Hayo whọ sae ta nọ: “Kọ whọ riẹ nọ Ebaibol na ọ t’ẹme kpahe uzedhe onọ oyena?” Who te bi lele ohwo nọ o wo adhẹẹ kẹ Ebaibol na ha t’ẹme, whọ sae rehọ edhere ọfa mu ẹme na họ. Whọ sae ta nọ: “Jọ mẹ ghale eruẹaruẹ anwae nana kugbe owhẹ.” Hayo whọ sae ta nọ: “Enẹ obe nọ a mae ghale bu no evaọ ikuigbe ohwo-akpọ o ta . . . “

Ẹsejọ, whọ sae salọ re whọ wariẹ ikere jọ ọvo. Ghele na, evaọ oria nọ o jọ lọhọ, o rẹ mai woma re ma rovie Ebaibol na je se eme nọ ọ ta. Dhesẹ ikereakere na kẹ ohwo na evaọ Ebaibol obọriẹ evaọ oria nọ o jọ lọhọ. Eroruiruo Ebaibol na evaọ edhere nana u re duobọte ahwo gaga.—Hib. 4:12.

Ekpako Ileleikristi a wo owha-iruo obọdẹ nọ a rẹ rọ rehọ Ebaibol na ro ruiruo evaọ okenọ a be za enọ. Ovo jọ evaọ itee nọ a rẹ rọ jọ ọkpako họ oniọvo na ọ rẹ “yọrọ uzẹme eme nọ o wuhrẹ whawha, re ọ sae rehọ emamọ uwuhrẹ wuhrẹ ahwo.” (Tait. 1:9) Ohwo ukoko na jọ ọ sae jiroro ilogbo jọ kpahe uzuazọ evaọ okenọ ọkpako jọ ọ tẹ kẹe ohrẹ no. Ẹvẹ u wuzou te inọ ohrẹ riẹ u re no Ikereakere na ze! Oriruo ọkpako evaọ enẹ oruo o sai kpomahọ amọfa buobu evaọ ona uwuhrẹ rai.

EPANỌ WHỌ SAI RO WO ONA VIERE

Se Ebaibol na kẹdẹ kẹdẹ. Wo emamọ omaa orọ uwuhrẹ omobọ ra.

Ru ei fihọ uruemu re who fi ikereakere ba uyo ra evaọ iwuhrẹ ukoko.

Okenọ whọ tẹ rẹriẹ ovao ku enọ hayo iyero, taure whọ tẹ te k’uyo hayo jiroro, nọ oma ra nọ, ‘Eme Ebaibol na ọ ta?’

Whọ gbẹ riẹ oware nọ Ebaibol na ọ ta kpahe ẹme jọ họ, who g’enu hayo kẹ eriwo obọra ha. Ta nọ whọ te kiẹ kpahe iẹe.

ORIA IRUO: Rehọ onọ ovo hayo ivẹ jọ nọ a n’owhẹ no (1) evaọ usiuwoma, (2) kpahe ẹme jọ nọ a niyẹrẹ kpahe kẹle evaọ usi na, gbe (3) kpahe omaduhọ iruẹru jọ nọ e viodẹ. Rọkẹ ọvuọvo, o tẹ kawo salọ ikereakere ọvojọ nọ u fo nọ a sae rọ k’uyo riẹ.