Uwuhrẹ 49

Uvi Ẹjiroro Nọ A Rẹ Kẹ

Eme o gwọlọ nọ who re ru?

Kẹ imuẹro nọ e rẹ veva rọ tha ẹme nọ whọ ta kpobi uke.

FIKIEME U JE WUZOU?

Enọ e be gaviezọ k’owhẹ a te rọwo hayo j’owọ kpahe ẹme nọ whọ ta ha ajokpanọ u mu rai ẹro nnọ ẹme nọ whọ ta na uzẹme.

WHỌ tẹ be t’ẹme, enọ e be gaviezọ k’owhẹ a wo udu nọ a rẹ rọ nọ inọ: “Fikieme oyena o jẹ rọ uzẹme? Didi imuẹro e riẹ inọ ẹme nọ ohwo na ọ be ta na a rẹ rọwo iẹe?” Wọhọ owuhrẹ, who wo owha-iruo nọ whọ rẹ rọ za enọ itieye na hayo fiobọhọ kẹ enọ e be gaviezọ k’owhẹ duku iyo na. Ẹme na ọ tẹ r’oja kẹ ovuẹ ra gaga, ruẹ nọ whọ kẹ enọ e be gaviezọ k’owhẹ ẹjiroro ọgaga nọ a rẹ rọ rọwo ẹme na. Onana u re fiobọhọ nọ whọ jẹ rọ ẹme ra tẹzẹ amọfa.

Pọl ukọ na ọ rehọ ẹme riẹ tẹzẹ ahwo. Ẹkwoma eme iroro egbagba, iroro-ejẹ areghẹ, gbe ẹtẹzẹ, ọ daoma nwene iroro enọ ọ t’ẹme kẹ. O fi uvi oriruo h’otọ k’omai. (Iruẹru 18:4; 19:8) Dede na, eketa jọ e rẹ rọ ẹtẹzẹ su ahwo thọ. (Mat. 27:20; Iruẹru 14:19; Kọl. 2:4) A sae rehọ eme atanọ mu ẹme na họ, rehọ eme rai no eria nọ e rọ uzẹme he ze, vravro nọ o wo otọ họ, r’obọ nẹ eme nọ e wọso eriwo rai, hayo a vẹ rọ eme nọ i re duobọte iroro ahwo na ọvo ro ruru uzẹme ẹme na. Ma rẹ yọroma re ma whaha iruemu itieye na kpobi.

U re w’Owọ no Ẹme Ọghẹnẹ ze Ziezi. Oware nọ ma bi wuhrẹ o rẹ jọ ẹme obọ mai hi. Ma rẹ daoma ghale oware nọ ma wuhrẹ no Ebaibol ze kugbe amọfa. Evaọ onana, ma wo obufihọ ulogbo no ebe utu ọrigbo nọ o wo ẹrọwọ avọ areghẹ na ze no. Ebe nana e rẹ tuduhọ omai awọ re ma roma totọ kiẹ Ikereakere na riwi. Kẹsena ma vẹ kpọ iroro amọfa kpohọ Ebaibol na, orọnikọ re ma dhesẹ kẹ amọfa nọ omai o gba ha, rekọ avọ isiuru omarokpotọ re ma ru ai ruẹ oware nọ Ebaibol na ọ ta k’omobọ rai. Ma rọwo kugbe Jesu Kristi, ọnọ ọ ta evaọ olẹ se Ọsẹ riẹ nọ: “Ẹme ra uzẹme.” (Jọn 17:17) Udu-esuo ofa o riẹ nọ u kpehru vi Jihova Ọghẹnẹ hẹ, Ọnọma odhiwu gbe otọakpọ na. Epanọ ẹjiroro nọ ma kẹ u wo iroro te o roma hwa Ẹme riẹ nọ u re no ze.

Ẹsejọ whọ rẹ sae t’ẹme kẹ ahwo nọ a riẹ kpahe Ebaibol na tere he hayo enọ e jẹ riẹ rehọ wọhọ Ẹme Ọghẹnẹ hẹ. Who re dhesẹ uvi orimuo kpahe oke gbe oghẹrẹ nọ whọ rẹ rọ rehọ ikere Ebaibol ziọ ẹme na. Rekọ whọ rẹ daoma kpọ iroro rai kpohọ ehri udu ovuẹ oyena ababọ oke oraha wọhọ epanọ o lọhọ te kpobi.

Kọ who re ku ei họ nnọ who te se ẹme jọ no ikereakere na ze ọvo ahwo na a te nwane rọwo ẹme na? O nwane rọ ere he. O rẹ sae gwọlọ nọ whọ rẹ kpọ iroro ahwo na kpohọ eme nọ e wariẹ e riẹ họ ro dhesẹ nọ ikereakere na e ghinẹ tha ẹme nọ whọ be ta na uke. Otẹrọnọ whọ be rehọ ehri-uzi jọ no ikereakere jọ ze ọvo yọ eme nọ e wariẹ e riẹ họ na e t’ẹme kpahe uzoẹme oyena ha, o gwọlọ nọ who re dhesẹ ẹme na haro viere. O sae gwọlọ nọ who re se ikereakere efa nọ i w’obọ kpahe ẹme na re ẹme na ọ vọ ogbotu ra eva inọ ẹme nọ whọ be ta o ghine no Ikereakere na ze.

Who fi eme obọ ra ba oware nọ ikereakere na e ta ha. Roma totọ sei. Ikere na e sae t’ẹme kẹkẹe kpahe uzoẹme nọ whọ be t’ẹme kpahe na. Ghele na, re ẹme ra o nwene iroro ahwo na, u fo re enọ e be gaviezọ k’owhẹ a jọ eva riẹ ruẹ oware nọ whọ be ta nọ u dhesẹ na.

Rehọ Eme Efa nọ E Rọwo Kugbei Rọ Thae Uke. Ẹsejọ, o sai fiobọhọ re whọ rehọ imuẹro no eria efa nọ a re fievahọ ze ro fiobọhọ kẹ ahwo wo ovuhumuo kpahe uvi ẹjiroro Ikereakere na.

Wọhọ oriruo, whọ sae riobọhọ idedeghe na ro dhesẹ nọ Ọnọma ọ rrọ. Whọ sae riobọhọ izi emama, wọhọ ẹgbẹdẹ, jẹ rehọ iẹe dhesẹ nọ izi itieye na i dhesẹ nọ Ọkizi ọ rrọ. Iroro nọ whọ rọ via e te jọ gbagba otẹrọnọ e rọwo kugbe oware nọ Ẹme Ọghẹnẹ ọ ta. (Job 38:31-33; Ol. 19:1; 104:24; Rom 1:20) Imuẹro itieye na i re fiobọhọ keme i re dhesẹ nọ ẹme nọ Ebaibol na ọ ta ọ rọwo kugbe uzẹme eware nọ a rẹ ruẹ.

Kọ whọ be daoma fiobọhọ kẹ ohwo jọ vuhumu nnọ Ebaibol na Ẹme Ọghẹnẹ o ghinẹ rrọ? Whọ rẹ sae wariẹ eme ewena-isukulu ro dhesẹ nọ ere o rrọ, kọ oyena u re ru ẹme na jọ uzẹme? Ahwo nọ a wo adhẹẹ kẹ ewena-isukulu itieye na ọvo eme itieye na i re fiobọhọ kẹ. Kọ whọ sae rehọ otokiẹ-eriariẹ ro dhesẹ nọ Ebaibol na yọ uzẹme? Whọ tẹ rehọ eme ekiotọ-eriariẹ nọ e gba ha wọhọ udu ẹme ra, yọ whọ be bọ fihọ otọhotọ udedeghe. Evaọ abọdekọ riẹ, nọ whọ tẹ rọ Ẹme Ọghẹnẹ muhọ jẹ riobọhọ ọkiẹvia otokiẹ-eriariẹ ro dhesẹ ẹgbagba Ebaibol na, yọ whọ be bọ ẹjiroro ra fihọ emamọ otọhotọ.

Makọ oware nọ whọ be gwọlọ dhesẹ kpobi, kẹ imuẹro nọ e rẹ veva. Epanọ imuẹro nọ whọ rẹ kẹ i re bu te o roma hwa ogbotu ra. Wọhọ oriruo, whọ tẹ be t’ẹme kpahe edẹ urere na wọhọ epanọ o rọ 2 Timoti 3:1-5 na, whọ rẹ sai s’iroro ogbotu ra kpohọ iyẹrẹ usi jọ nọ a riẹ ziezi nọ u dhesẹ nọ ahwo “a wo eva egaga.” Oriruo ọvo ọyena ọ sai te ro dhesẹ nọ abọ nana ọrọ oka edẹ urere na o bi rugba enẹna.

Ẹwawọ eware ivẹ nọ i wo ekwakwa nọ i thoma o sai fiobọhọ. Ẹwawọ na ọvo ọ sai dhesẹ ẹme na vẹ hẹ; a rẹ rehọ ẹgbagba riẹ wawo oware nọ Ebaibol na ọ ta. Rekọ ẹwawọ na ọ sai fiobọhọ kẹ ohwo ruẹ areghẹ nọ ọ rọ ẹme na. Wọhọ oriruo, whọ sae rehọ ẹwawọ otiọye na ro dhesẹ nọ Uvie Ọghẹnẹ yọ egọmeti. Whọ sai dhesẹ nọ wọhọ egọmeti ohwo-akpọ, Uvie Ọghẹnẹ u wo isu, enọ e rọ otọ esuo na, izi, ogbẹgwae ẹdhoguo, gbe ọruẹrẹfihotọ ewuhrẹ.

A rẹ sae rehọ eware nọ e ghinẹ via ro dhesẹ areghẹ efihiruo ohrẹ Ebaibol na. A rẹ sae jẹ rehọ eware nọ e via kẹ omobọ ohwo ro dhesẹ ẹme nọ ohwo ọ be ta vevẹ. Wọhọ oriruo, nọ who te bi dhesẹ epanọ u wuzou te re a se je wuhrẹ Ebaibol na kẹ ohwo, whọ rẹ sai dhesẹ epanọ ere oruo u ro ru uzuazọ ra woma no. Re ọ tuduhọ inievo riẹ awọ, Pita ukọ na ọ fodẹ ẹrẹriẹ na, onọ ọye omariẹ ọ rọ ẹro ruẹ. (2 Pita 1:16-18) Pọl omariẹ ọ fodẹ eware nọ ọ rọ ẹro ruẹ re. (2 Kọr. 1:8-10; 12:7-9) Dede na, ọthobọ whọ rẹ rọ fodẹ eware nọ e via k’owhẹ re whọ siọ iroro ba esi bru oma ra.

Nọ o rrọ nọ ahwo a wo ohẹriẹ fiki ọvuọ oghẹrẹ uyere-akpọ gbe iroro rai na, imuẹro nọ i re ru ohwo jọ rọwo ẹme e rẹ sae vọ omọfa jọ eva ha. Fikiere, roro kpahe eriwo enọ e be gaviezọ k’owhẹ re whọ riẹ iroro-ejẹ nọ who re ro ru ẹme vẹ gbe epanọ whọ te tae. Itẹ 16:23 o ta nọ: “Iroro ohwo nọ o wo areghẹ i re ru eme riẹ kiẹrẹe, ọ rẹ jẹ ta eme nọ e rẹ dhẹruọ ahwo oma.”

EPANỌ A RE RO RU EI

Ukpenọ who re d’enu t’ẹme na ọvo, kẹ imuẹro nọ e rẹ veva rọ tha ẹme nọ o wuzou uke.

Rehọ eme ra no Ikereakere na ze.

Fodẹ eme imuẹro nọ e rọwo kugbe ẹjiroro ra gbe ẹme na nọ i fo ẹgwọlọ ogbotu ra.

ORIA IRUO: (1) Rovie kpohọ uzoẹme na “Jesu Kristi” evaọ obe ọ Reasoning From the Scriptures na. Muẹrohọ epanọ a rọ za enọ na ẹkwoma Ebaibol na nọ a fi ẹgba họ. (2) Kiẹ abọ emuhọ ọrọ izoeme nọ e rọ ukere Uwou-Eroro Na hayo Awake! riwi. Salọ igogo eme sa-sa nọ a ru vẹ. Kpoka họ igogo ikereakere na je kpoka họ eme nọ e rọwo kugbe imuẹro na.