Uwuhrẹ 20

Ikereakere Nọ A Rẹ Fodẹ Ziezi

Eme o gwọlọ nọ who re ru?

Ruẹrẹ iroro enọ e be gaviezọ k’owhẹ na kpahe re who te ti se ikereakere na.

FIKIEME U JE WUZOU?

Emamọ ẹfodẹ ikereakere o sai fiobọhọ kẹ ogbotu ra wo otoriẹ uzedhe otofa oware nọ ikere na e ta.

IKEREAKERE na họ otọhotọ ovuẹ nọ a rẹ jọ iwuhrẹ ukoko mai kẹ. Ikere Ebaibol na e tẹ jẹ rọ eria nọ a rẹ tẹrovi evaọ eme nọ ma rẹ jọ usiuwoma ta. Ghele na, epanọ enana i re fiba ẹmeọta mai te o roma hwa epanọ ma fodẹ e rae woma te.

O gwọlọ vi ikereakere na nọ whọ rẹ fodẹ je zizie ohwo re o sei lele owhẹ ọvo. Whọ tẹ be fodẹ ikereakere, daoma le eware ivẹ t’obọ: (1) Kpare isiuru, gbe (2) tẹrovi ẹjiroro nọ who bi ro se oria na. A rẹ sae rọ idhere sa-sa nyate ute nana.

Nọ Onọ. Onana o rẹ mai w’iruo otẹrọnọ ogbotu ra ọ riẹ uyo onọ na ha. Daoma kpọ onọ na evaọ edhere nọ o rẹ lẹliẹ ahwo roro. Jesu o ru onana. Okenọ otu Farisi na a nya bru ei ziọ etẹmpol na jẹ jọ ẹgbede dawo otoriẹ Ikereakere riẹ, Jesu ọ tẹ nọ ae inọ: “Ẹvẹ wha roro kpahe Kristi na? Ọmọ ono ọ rọ?” A tẹ ta kẹe nọ: “Ọmọ Devidi.” Jesu ọ tẹ nọ inọ: “Kẹvẹ Devidi ọ jẹ jọ eva Ẹzi se i Olori”? Ọ tẹ jọ etenẹ wariẹ Olezi 110:1. Otu Farisi na a te fibo. Dede na, ogbotu na a kezọ kẹ Jesu avọ isiuru.—Mat. 22:41-46.

Evaọ iruo odibọgba na, whọ rẹ sae rehọ enọ emuhọ wọhọ enana ruiruo: “Mẹ avọ owhẹ ma wo odẹ-oma. Kọ Ọghẹnẹ o wo odẹ-oma? Ma rẹ sae ruẹ uyo na eva Olezi 83:18.” “Kọ ahwo-akpọ kpobi a ti wo egọmeti ọvo ẹdẹjọ? Muẹrohọ epanọ a kuyo nana eva Daniẹl 2:44.” “Kọ Ebaibol na ọ ghinẹ ta kpahe iyero nọ e rọ edẹ mai na? Wawo eme nọ ọ ta eva 2 Timoti 3:1-5 kugbe iyero nọ whọ riẹ kpahe na.” “Kọ uye-oruẹ gbe uwhu i ti kuhọ ẹdẹjọ? A rẹ sae ruẹ uyo Ebaibol na eva Eviavia 21:4, 5.”

Evaọ ẹmeọta, enọ nọ who re ro ruiruo avọ ona nọ whọ rẹ rọ fodẹ ikereakere na o sae fi ọwhọ họ ogbotu ra oma rọ ubiẹro okpokpọ rri ikere na, makọ enọ a riẹ no vẹre. Kọ a te tọlọ Ebaibol rai? Oyena o roma hwa sọ onọ nọ whọ nọ na o rrọ isiuru kẹ ae. Ogbotu na ọ tẹ maki wo isiuru kpahe uzoẹme ra na, iroro rai e rẹ sae kọ evaọ okenọ who te bi se ikere nọ a yo unuẹse buobu no. Re whọ whaha oyena, u re woma re who roro kpahe ẹme na ziezi re who ru ẹme ra siuru.

Fodẹ Ẹbẹbẹ Jọ. Whọ rẹ sae fodẹ ẹbẹbẹ jọ whọ vẹ kpọ iroro kpohọ ikereakere nọ e ta kpahe ifue na. Whọ lẹliẹ ogbotu na rẹro vi oware nọ a ti duku hu. Ẹsibuobu abọjọ kakao ifue na ọvo ikereakere na i re dhesẹ. Dede na, whọ sae nọ ogbotu na re a roro kpahe ọkpọvio nọ ọ kẹ kpahe eyerikugbe ẹbẹbẹ na nọ who bi se ikere na.

Evaọ edhere ọvona, whọ sae fodẹ ehri-uzi uruemu ohwo Ọghẹnẹ jọ, whọ vẹ rọ ikuigbe Ebaibol jọ dhesẹ areghẹ elele riẹ. Otẹrọnọ ikereakere jọ i wo igogo eme ivẹ (hayo bu viere) nọ i w’obọ kpahe ẹme nọ a be ta na, iruẹme jọ a rẹ ta kẹ ogbotu na re a muẹrohọ enana. Otẹrọnọ oware jọ o rrọ bẹbẹ gaga kẹ ogbotu jọ, whọ rẹ sae jaja iroro rai ẹkwoma efihotọ ẹjiroro sa-sa kẹsena whọ vẹ kuvẹ re ikere na avọ efihiruo riẹ e k’uyo na.

Fodẹ Ebaibol na Wọhọ Udu Na. Whọ tẹ kpare isiuru fihọ uzoẹme ra jẹ fodẹ eriwo ọvo hayo ivẹ kpahe abọ riẹ jọ no, whọ rẹ sae fodẹ ikereakere jọ enẹ: “Muẹrohọ oware nọ Ẹme Ọghẹnẹ ọ ta kpahe ẹme na.” Onana u re dhesẹ oware nọ oria nọ who bi ti se na u ro wo udu.

Jihova ọ rehọ ahwo wọhọ Jọn, Luk, Pọl, gbe Pita kere abọjọ Ebaibol na. Rekọ ikere-ebe gheghe a rrọ; Jihova họ Ọnoweme na. Maero evaọ okenọ ma tẹ be t’ẹme kugbe ahwo nọ a rọ emọ-uwuhrẹ Ikereakere Efuafo na ha, ẹfodẹ ikere inọ “Pita o kere nọ” hayo “Pọl ọ ta nọ” u re wo ẹgba ọvona wọhọ ẹfodẹ ikere na wọhọ ẹme Ọghẹnẹ hẹ. O rọ oware nọ a re muẹrohọ inọ evaọ unuẹse jọ, Jihova ọ hrẹ Jerimaya re o muọ ewhowho riẹ họ inọ: “Wha gaviezọ kẹ eme ỌNOWO na.” (Jeri. 7:2; 17:20; 19:3; 22:2) Makọ ma rehọ odẹ Jihova ro muọ ikereakere họ ẹfodẹ hayo ma rehọ e riẹ muhọ họ, re ma te ti ku ẹmeọta mai họ, ma rẹ daoma riobọhọ nnọ oware nọ o rọ Ebaibol na yọ ẹme riẹ.

Roro Kpahe Eme nọ E Wariẹ E Riẹ Họ. Who re roro kpahe eme nọ e wariẹ e riẹ họ evaọ okenọ whọ tẹ be jiroro epanọ whọ rẹ rọ fodẹ ikereakere. Ẹsejọ whọ rẹ sae nwane fodẹ eme nọ e wariẹ e riẹ họ; ghele na, ẹsejọ eme nọ e wariẹ e riẹ họ i re kpomahọ ẹme nọ whọ be ta na. Wọhọ oriruo, kọ whọ rẹ rehọ edhere ọvona fodẹ eme ọ Job ohwo nọ ọ dhozọ Ọghẹnẹ na wọhọ epanọ whọ rẹ fodẹ ẹme jọ nọ enọ e rọ ẹghẹ te sasa iẹe oma na a ta? Luk họ ọnọ o kere obe Iruẹru, rekọ usu ahwo nọ ọ wariẹ eme rai họ Jemis, Pita, Pọl, Filip, Stivin, gbe enjẹle, jegbe Gamaliẹl gbe ahwo Ju efa nọ e jọ Ileleikristi hi. Ono whọ rẹ ta nọ ọ ta eme nọ whọ be wariẹ na? Wọhọ oriruo, kareghẹhọ nnọ orọnikọ Devidi họ ọnọ o kere ilezi na kpobi hi, yọ orọnikọ Solomọn họ ọnọ o kere obe Itẹ na kpobi hi. O rẹ jẹ kẹ erere re ma riẹ ohwo nọ ọnọ o kere Ebaibol na ọ be ta kpahe gbe uzoẹme nọ ọ jẹ ta kpahe.

Rehọ Ovuẹ Eriariẹ-Obemu Ruiruo. Onana o rẹ mai w’ẹgba otẹrọnọ whọ sai dhesẹ nọ iyero nọ e jọ oke ikuigbe Ebaibol na i tho enọ whọ be ta kpahe na. Evaọ eria efa ovuẹ nọ u w’obọ kpahe ẹme na o r’oja re ohwo o wo otoriẹ ikere jọ. Wọhọ oriruo, nọ who te bi se Ahwo Hibru 9:12, 24 evaọ ẹmeọta kpahe ẹtanigbo na, whọ rẹ sae ruẹ nọ o r’oja re whọ kake ta kpahe ubrukpẹ obeva orọ uwou-udhu na, onọ ikereakere na i dhesẹ nọ u dikihẹ kẹ oria nọ Jesu ọ rueva evaọ okenọ o tovrẹ kpohọ odhiwu. Rekọ whọ kẹ evuẹ nọ i w’obọ kpahe ẹme na bu hrọ họ te epanọ i re ro ruru ikere nọ whọ be fodẹ na.

Re whọ nyaharo evaọ edhere nọ whọ rẹ rọ fodẹ ikereakere, muẹrohọ oware nọ iruẹme nọ i wo ona a re ru. Muẹrohọ idhere sa-sa nọ a re ro ru ei. Kiẹ ewoma idhere sa-sa nana riwi. Evaọ omaruẹrẹhọ kẹ ẹme ra, riẹ igogo ikereakere na, je roro gaga kpahe oware nọ ikere ọvuọvo o ti rugba. M’omaa ẹme-emuhọ kẹ ikere na ọvuọvo re whọ sae rehọ iẹe fi ajọwha họ ahwo na oma ziezi. Uwhremu na, ru ona na kẹre te ikere nọ who ti ro ruiruo kpobi. Nọ abọ ẹmeọta ra nana ọ be nyaharo na, who ti fiẹrohọ Ẹme Ọghẹnẹ viere.

EPANỌ A RE RO RU EI

Whọ tẹ be salọ ẹmeọta nọ ọ rẹ kpare isiuru, roro kpahe oware nọ ogbotu ra ọ riẹ no vẹre gbe epanọ uzoẹme na o re rae oma.

Jọ u mu owhẹ ẹro nọ whọ riẹ oware nọ ikere ọvuọvo o ti rugba, whọ vẹ jọ eme-emuhọ ra dhesẹ iẹe.

ORIA IRUO: Salọ ikereakere jọ nọ whọ riẹ nọ whọ sai ro ruiruo ziezi evaọ ẹkwotọ ra. M’omaa (1) onọ hayo ẹbẹbẹ nọ whọ rẹ fodẹ rọ kpare isiuru ọnọ o wo uwou na gbe (2) epanọ whọ te rọ tẹrovi ẹjiroro nọ who ro se ikere na.