Uwuhrẹ 19

Uduotahawọ Re A Rọ Ebaibol Ruiruo

Eme o gwọlọ nọ who re ru?

Tuduhọ ogbotu ra awọ re a rovie Ebaibol rai nọ who te bi se ikere na.

FIKIEME U JE WUZOU?

Oware nọ ohwo ọ rehọ ibiaro obọriẹ ruẹ, maero evaọ Ebaibol obọriẹ, u re duobọte i gaga.

ISIURU mai họ re ma kpọ iroro ahwo kpobi kpohọ Ẹme Ọghẹnẹ, Ebaibol na. Obe ofuafo oyena họ ehri ovuẹ nọ ma bi whowho na, yọ ma gwọlọ re ahwo a riẹ nọ orọnikọ ẹme obọ mai ma be ta ha rekọ onọ u no obọ Ọghẹnẹ ze. U fo re ahwo a fievahọ Ebaibol na.

Evaọ Iruo Odibọgba Na. Evaọ okenọ whọ tẹ be ruẹrẹ oma kpahe kẹ iruo odibọgba na, salọ ikereakere ọvo jọ hayo bu viere nọ whọ te ghale kugbe ahwo nọ a gwọlọ kezọ. Whọ tẹ tubẹ jiroro nọ whọ gwọlọ raha ubroke jọ ro fi obe nọ a kere no Ebaibol ze h’ada, o rẹ kẹ erere ẹsikpobi re a se ikere Ebaibol jọ nọ o fo. Ebaibol na o wo ẹgba ologbo nọ o rẹ rọ kpọ ahwo nọ a wọhọ igodẹ vi ẹme kpobi nọ ma rẹ rọ unu ta. Oria nọ o jọ lọhọ re who se Ebaibol na ha, whọ sae t’ẹme noi ze. Evaọ ikpe-udhusoi ọsosuọ na, iko Ikereakere i bu tere he. Ghele na, Jesu avọ ikọ riẹ a wariẹ eme no Ikereakere na ze gaga. Ma rẹ daoma fi ikereakere h’uzou re re ma rehọ ai ruiruo ziezi evaọ odibọgba na, ẹsejọ ma rẹ wariẹ eme na ọvo.

Oke nọ whọ rẹ sai se no Ebaibol na ze, kru rie re ọnọ o wo uwou na ọ sai rri lele owhẹ nọ who bi se na. Otẹrọnọ ọnọ o wo uwou na o bi rri Ebaibol obọ riẹ lele owhẹ, ọkpahefihọ riẹ kẹ eme nọ o se na o rẹ mai woma.

Ghele na, who re vuhumu inọ efefafa Ebaibol jọ a nwene Ẹme Ọghẹnẹ no. Eme rai kpobi e sae nwane rọwo kugbe eme nọ e jọ evẹrẹ ọsosuọ Ebaibol na ha. Efafa ọgbọna buobu a si odẹ oma Ọghẹnẹ no, ruru oware nọ ikere ẹvẹrẹ ọsosuọ na e ta kpahe uyero iwhuowhu na, je ruru oware nọ Ebaibol na ọ ta kpahe ẹjiroro Ọghẹnẹ kẹ otọakpọ na. Re whọ sai dhesẹ oware nọ o romavia na kẹ ohwo, u re fo re whọ rehọ ugogo ikere jọ wawo ohwohwo rono Ebaibol sa-sa ze hayo rono efafa ọsosuọ jọ evaọ ẹvẹrẹ ọvona ze. Evaọ izoẹme buobu, obe Reasoning From the Scriptures na o kẹ owawo oghẹrẹ nọ efafa buobu e rehọ igogo eme ikere jọ ruiruo. Ohwo kpobi nọ o you uzẹme ọ te kẹ uyere fiki eriariẹ uzẹme na.

Evaọ Iwuhrẹ Ukoko. A rẹ tuduhọ ahwo kpobi awọ re a rehọ Ebaibol rai ruiruo evaọ iwuhrẹ ukoko. Onana o rẹ wha ewoma ze evaọ idhere buobu. U re fiobọhọ fi iroro ogbotu na họ ẹme nọ a be ta na. O rẹ lẹliẹ ahwo ruẹ ovuẹ nọ oruẹme na ọ be ta na. Yọ u re dhesẹ kẹ ahwo ọkpokpọ nọ a wo isiuru inọ ghinọ Ebaibol na họ ehri eware nọ ma rọwo.

Sọ enọ e rọ ogbotu ra a ti ghine lele isase Ikereakere ra evaọ Ebaibol obọ rai o roma hwa uduotahawọ nọ whọ kẹ rai. Uzizie ovavo yọ edhere jọ nọ ọ mai woma.

Obọ ra o rọ, oruẹme na, re whọ jiroro ikere nọ whọ gwọlọ fiẹgba họ ẹkwoma ogbotu na nọ whọ rẹ ta kẹ re a rovie ai. O rẹ mai woma re who se ikereakere nọ i ti fiobọhọ k’owhẹ fielo họ igogo eme ra. Kẹsena, oke o tẹ riẹ, whọ sai se ikere efa nọ e tha ẹme ra na uke.

Dede na, ẹfodẹ ikere na ọvo hayo ezizie ogbotu na re a rovie ikereakere rai u te he. Otẹrọnọ who se ikere jọ je bi kpohọ ọfa yọ ogbotu ra ọ te tubẹ ruẹ ọrọ ọsosuọ na ha, ehoo ọ rẹ ro ae oma a vẹ siọ Ebaibol rai ba erovie. Muẹrohọ ai. Ibuobu e tẹ ruẹ oria na no, sei.

Roro kparo. Kake fodẹ oria ikereakere na omoke jọ taure who te sei. Onana o rẹ whaha unuoke nọ whọ rẹ raha rọ hẹrẹ ogbotu na re a ruẹ oria na. Dede nọ u ti ru eme nọ whọ te ta dina kawo evaọ okenọ whọ tẹ kẹ ogbotu na uvẹ re a rovie kpohọ ikereakere na, irere nọ i re noi ze e ghare tere.

EPANỌ A RE RO RU EI

Dhesẹ oria ikere na kẹ ọnọ o wo uwou na nọ who bi se no Ebaibol na ze na, hayo zizie ei re o rri Ebaibol riẹ lele owhẹ.

Whọ tẹ be jọ ukoko na t’ẹme, zizie ogbotu na re a rovie kpohọ ugogo ikereakere na, whọ vẹ kẹ ai uvẹ nọ u te re a ru ere.

ORIA IRUO: Evaọ izihebro, dawo enana: (1) Rehọ Ebaibol ra kẹ ọnọ o wo uwou na, re whọ nọe sọ ọ te gwọlọ se owọ Ebaibol na nọ who rovie fihọ no na. (2) Nọ ọnọ o wo uwou na sọ ọ gwọlọ tọlọ Ebaibol riẹ re o se ugogo ikereakere jọ.