Uwuhrẹ 42

Ẹme Nọ Ọ Rẹ Kẹ Ogbotu Ra Eriareẹ

Eme o gwọlọ nọ who re ru?

Rehọ eriariẹ kẹ ahwo na evaọ edhere nọ u re ro duobọte iroro rai nọ o rẹ lẹliẹ ahwo na fi’uzou inọ a wuhrẹ oware uwoma jọ.

FIKIEME U JE WUZOU?

Whọ tẹ be ta eware nọ ahwo a riẹ no ọvo kẹ ae, a te gaviezọ k’owhẹ kri hi.

RE WHO ru ẹme ra re ọ kẹ ogbotu ra erere, who re ru vi uzoẹme na nọ whọ rẹ ta kpahe ọvo. Nọ oma ra nọ: ‘Fikieme u je fo re ogbotu nana o yo uzoẹme nana? Eme mẹ te ta nọ o te lẹliẹ ogbotu na riẹ nọ a ghine wo erere no ovuẹ na ze?’

Evaọ isukulu na, nọ a tẹ k’owhẹ ẹme re who dhesẹ epanọ a re se isẹri kẹ omọfa, ọnọ o wo uwou na họ ogbotu ra. Hayo o sae jọ nọ ukoko na kpobi whọ be t’ẹme kẹ.

Eware nọ Ogbotu Ra Ọ Riẹ. Nọ oma ra nọ, ‘Eme ogbotu na ọ riẹ kpahe uzoẹme na?’ Oyena u re dhesẹ oria nọ who re jo mu ẹme na họ. Whọ tẹ be t’ẹme kẹ ukoko nọ Ileleikristi buobu nọ e kpako e rrọ, whọ ta ehruehru ẹme na ọvo ho, onọ ibuobu rai a riẹ no. Bọ fihọ ehru eme enana. Dede na, otẹrọnọ ahwo isiuru ekpokpọ buobu a rrọ ogbotu na re, who re roro kpahe ẹgwọlọ eko ahwo ivẹ na.

Nwene ovẹrẹ ẹmeọta ra lele oware nọ ogbotu ra ọ riẹ no. Whọ tẹ be fodẹ eme jọ nọ ibuobu e riẹ ziezi, whọ sae kaunu te enana ọvo. Rekọ rehọ ẹrera t’ẹme nọ ọ rọ ẹme ọkpokpọ kẹ ibuobu enọ e be gaviezọ k’owhẹ na re ẹme na o vẹ ai ẹro ziezi.

Oware nọ O rẹ Kẹ Eriariẹ. Oware nọ o rẹ kẹ eriariẹ orọnikọ o rẹ nwane jọ ẹme ọkpokpọ họ. U wo oghẹrẹ nọ iruẹme jọ a rẹ ta izẹme jọ nọ ahwo a riẹ no vẹre evaọ edhere ọlọlọhọ nọ ibuobu evaọ ogbotu na a re ro wo otoriẹ riẹ vevẹ vi epanọ a riẹ riẹe vẹre.

Evaọ iruo odibọgba na, u te he re whọ fodẹ ẹme usi jọ ọvo ro dhesẹ nnọ ma be rria edẹ urere na. Rọ Ebaibol na dhesẹ otofa oware nọ o via na. Onana o te ghinẹ kẹ ọnọ o wo uwou na eriariẹ. Epọvo na re, nọ whọ tẹ be fodẹ eme jọ kpahe uzi emama hayo kpahe okakọ hayo arao, ute ra orọnikọ re whọ ta uzẹme otokiẹ-eriariẹ igbunu jọ nọ ọnọ o wo uwou na o ri yo ẹdọvo ho ho. Ukpoye, ute ra o rẹ jọ re who ku imuẹro emama kugbe eme nọ e rọ Ebaibol na ro dhesẹ nọ Ọnọma jọ ọ riẹ nọ o you omai. Onana u ti fiobọhọ kẹ ọnọ o wo uwou na ruẹ ẹme na no ofẹ ofa ze.

Re whọ ta kpahe uzoẹme nọ ogbotu na o yo ẹsibuobu no o sae jọ use-abọ. Rekọ re whọ jọ emamọ owuhrẹ, u fo re who wuhrẹ epanọ who re ro ru onana ziezi. Ẹvẹ whọ sai ro ru ei?

Ekiakiẹ i ti fiobọhọ. Ukpenọ whọ rẹ wariẹ eme nọ e ruọ owhẹ uzou ọvo, rehọ ekwakwa ekiakiẹ nọ a jọ ẹwẹ-obe avọ 33 rite 38 t’ẹme te na ruiruo. Roro kpahe ẹjiroro nọ a jọ etẹe kẹ kpahe itee nọ i fo nọ who re le t’obọ na. Evaọ ekiakiẹ ra, whọ sae ruẹ nọ oware ikuigbe jọ nọ a riẹ tere he u w’obọ kpahe uzoẹme ra dẹẹ. Hayo whọ sae nyaku ẹme ọkpokpọ jọ evaọ usi na nọ o kẹ oriruo ẹme nọ whọ gwọlọ ta kpahe na.

Nọ whọ be kiẹ ẹme na riwi na, kiẹ iroro ra ẹkwoma eroro kpahe enọ wọhọ eme? fikieme? okevẹ? diẹse? ono? gbe oghẹrẹ vẹ? Wọhọ oriruo: Fikieme onana o jẹ rrọ uzẹme? Ẹvẹ mẹ sai ro dhesẹ iẹe? Erọwọ odode vẹ i ru rie bẹbẹ kẹ ejọ re a wo otoriẹ uzẹme Ebaibol nana? Fikieme u ro wuzou? Ẹvẹ onana o sai ro kpomahọ uzuazọ ohwo? Didi oriruo o dhesẹ erere efihiruo riẹ? Eme uzẹme Ebaibol nana u dhesẹ kpahe ekwakwa-oma Jihova? Wọhọ epanọ ẹme nọ whọ be ta kpahe ọ rrọ, whọ sae nọ inọ: Okevẹ onana o rọ via? Ẹvẹ ma sai ro fi ẹme nana h’iruo nẹnẹ? Whọ sai tube ru ẹme ra jọ jajaja ẹkwoma ẹnọ gbe ẹkẹ iyo enọ na jọ nọ whọ be ta ẹme ra na.

Ẹme ra ọ sae gwọlọ nọ who se ikereakere nọ ogbotu ra ọ riẹ. Eme whọ rẹ sai ru re who ru ahwo wuhrẹ eware efa no ikere na ze? Whọ thakpi se ai ọvo ho; ru ai vẹ.

Ẹmeọta kpahe ikere nọ a riẹ o rẹ kẹ erere viere otẹrọnọ whọ f’otọ abọ sa-sa ikere na, salọ abọ nọ o kie kpahe uzoẹme ẹme ra na via je ru ai vẹ. Rehọ oriruo ikere jọ wọhọ Maeka 6:8 evaọ New World Translation. Eme họ “uvi-ẹdhoguo”? Ute uvi-ẹdhoguo ono a be ta kpahe na? Ẹvẹ whọ rẹ sai dhesẹ otofa ẹme na “dhesẹ uvi-ẹdhoguo”? Hayo “re a you ẹwo”? Eme họ ababọ-omorro? Ẹvẹ whọ sae rọ rehọ ẹme na t’ẹme kẹ ọkpako? Rekọ, eme nọ whọ te ta e rẹ rọwo kugbe uzoẹme ra, ute ra, ogbotu ra, gbe unuoke nọ who wo.

Otofa olọlọhọ orọ eme u re fiobọhọ. Rọkẹ ahwo jọ, u re gbe ai unu u ve je rovie ai aro re a riẹ otofa “uvie” nọ a jọ Matiu 6:10 t’ẹme te na. Nọ a tẹ tubẹ kareghẹhọ Oleleikristi nọ ọ gọ kri no otofa ubiẹme jọ o sae lẹliẹe wo otoriẹ oware nọ oria na o be ta viere. Onana u re vevẹ nọ ma te se 2 Pita 1:5-8 jẹ fotọ ekwakwa sa-sa nọ a jọ awọ yena fodẹ na: ẹrọwọ, ọtẹruo, eriariẹ, oma-oriẹsuo, ithihakọ, omarọkẹ Ọghẹnẹ, arodawẹ oniọvo, gbe uyoyou. Nọ a tẹ ta eme ivẹ nọ otofa rai i dina thoma evaọ oria ovona, otofa rai nọ whọ rẹ kẹ o sai fiobọhọ hẹriẹ ọjọ no ọdekọ. Oyena o rọ ere kpahe eme wọhọ areghẹ, eriariẹ, orimuo, gbe otoriẹ, wọhọ epanọ e rọ Itẹ 2:1-6 na.

Nọ whọ tẹ jiroro kpahe ikere jọ ọvo dede o sae kẹ ogbotu ra erere. Evaọ oke ọsosuọ, u re gbe ahwo buobu unu nọ a te muẹrohọ inọ Emuhọ 2:7 evaọ efafa Ebaibol jọ, o ta nọ Adamu yọ ẹwẹ nọ ọ rrọ uzuazọ gbe nnọ wọhọ epanọ Izikiẹl 18:4 o ta, ẹwẹ o re whu. Okejọ o jariẹ nọ Jesu o ro ru akpọ gbe ahwo Sadusi unu nọ ọ t’ẹme kpahe Ọnyano 3:6, onọ a ta nọ a rọwo, ọ tẹ rehọ iẹe ta kpahe ẹkparomatha iwhuowhu na.—Luk 20:37, 38.

Ẹsejọ u re fi elo họ ẹme re ohwo ọ riobọhọ eme nọ e wariẹ ikereakere họ, eware nọ i w’obọ kpahe ekere ẹme na, ọ vẹ jẹ fodẹ ohwo nọ ọ be t’ẹme na hayo ọnọ ọ be gaviezọ na. Ahwo Farisi na a riẹ Olezi 110 ziezi. Ghele na, Jesu o si iroro rai kpohọ oware ulogbo jọ nọ o rọ owọ ọsosuọ na. Ọ nọ inọ: “ ‘Ẹvẹ wha roro kpahe Kristi na? Ọmọ ono ọ rọ?’ A tẹ ta kẹ e nọ, ‘Ọmọ Devidi.’ Ọ tẹ ta kẹ ae nọ, ‘Kẹvẹ Devidi ọ jẹ jọ eva Ẹzi se i Olori, a nọ, “Ọnowo na ọ ta kẹ Olori mẹ nọ, keria obọze mẹ, bẹsenọ me re ru ewegrẹ ra họ otọ-awọ ra”? Re Devidi o te se i Olori, kẹvẹ ọ rẹ rọ jọ ọmọ riẹ?’ ” (Mat. 22:41-45) Whọ tẹ be rọ Ikereakere na jiroro wọhọ epanọ Jesu o ru na, who ti fiobọhọ k’ahwo romatotọ se Ẹme Ọghẹnẹ viere.

Okenọ oruẹme ọ tẹ be fodẹ oke nọ a ro kere obe Ebaibol jọ hayo oke nọ oware jọ o rọ via, u re fo re o je dhesẹ iyero nọ e jariẹ eva oke oyena. Evaọ edhere ọyena, epanọ obe hayo oware oyena u wuzou te u ve ti vẹ ogbotu na ẹro viere.

Re a rọ ẹme jọ wawo ọfa o sai fiobọhọ ru ẹme nọ whọ be ta kẹ eriariẹ viere. Whọ sae rehọ eriwo jọ nọ ọ d’otọ fia wawo ẹme nọ Ebaibol na ọ ta kpahe ẹme ọvona. Hayo whọ sae rehọ ikuigbe Ebaibol ivẹ nọ e rrọ oghẹrẹ ovona wawo ohwohwo. Kọ ẹhẹriẹ ọ riẹ? Fikieme? Eme ma wuhrẹ no ai ze? Enẹ oruo o sae lẹliẹ enọ e be gaviezọ k’owhẹ rọ ubiẹro ofa rri ẹme na.

A tẹ k’owhẹ ẹme re whọ ta kpahe abọjọ odibọgba Ileleikristi na, whọ sai ru ẹme ra woma viere ẹkwoma orukpẹre ẹme na nọ who re ro muhọ. Fodẹ oware nọ a re ru, oware nọ u je fo nọ a ru ei, gbe epanọ u ro w’obọ kpahe itee mai wọhọ Isẹri Jihova. Kẹsena whọ vẹ fodẹ oria, oke, gbe oghẹrẹ nọ a re ro ru iruo na.

Kọ ẹvẹ otẹrọnọ ẹme ra ọ gwọlọ ẹta kpahe “eware ididi Ọghẹnẹ” jọ? (1 Kọr. 2:10) Whọ tẹ rehọ eruvẹ abọjọ uzoẹme na ro muhọ, ẹme na o ti vẹ ahwo ẹro viere. Yọ whọ tẹ dhẹ ẹme na kpobi duwu evaọ ekuhọ ra, ogbotu ra o ti wo iroro edẹro inọ a ghine wuhrẹ oware jọ.

Ohrẹ Kpahe Ẹrria Uzuazọ Oleleikristi. Ogbotu ra o ti wo erere viere nọ who te fiobọhọ kẹ ae ruẹ epanọ ovuẹ nọ o rrọ ẹme ra u ro kpomahọ izuazọ rai. Nọ who bi se ikereakere nọ e rrọ ẹme ra na, nọ oma ra nọ, ‘Fikieme a jẹ rawo ẹme na evaọ Ikereakere na rite edẹ mai na?’ (Rom 15:4; 1 Kọr. 10:11) Roro kpahe iyero uzuazọ nọ enọ e rọ ogbotu ra a be rẹriẹ ovao ku. Rọ ehrẹ gbe ehri-izi nọ e rọ Ikereakere na rri iyero na. Evaọ ẹme ra, jiroro kpahe Ikereakere na ro dhesẹ epanọ e rẹ sai ro fiobọhọ kẹ ohwo rọ areghẹ yerikugbe iyero eyena. Whọ t’ẹme na ehruehru hu. Ta kpahe uzedhe iruemu gbe owojẹ jọ.

Evaọ emuhọ, rehọ iroro-ejẹ ọvo hayo ivẹ nọ e rọ obehru na ruiruo evaọ ẹme jọ nọ whọ be ruẹrẹhọ. Nọ who bi wo eriariẹ na, fi efa h’iruo. Whọ te ruẹ nọ ogbotu na ọ te hai rẹro ẹme nọ who ti ru oke ofa, avọ evaifihọ inọ a ti yo ẹme jọ nọ ọ te ghinẹ kẹ ae erere.

EPANỌ A RE RO RU EI

Roro kpahe oware nọ ogbotu ra ọ riẹ kpahe uzoẹme ra na no vẹre.

Roro kpahe epanọ who ti ru ẹme na kpata te—ta eme nọ a riẹ no vẹre kpata, rọ ẹmẹrera ta eme ekpokpọ.

Whọ thakpe t’eme na ọvo ho; t’ẹme kpahe otofa hayo erere rai.

Kiẹ iroro ra ẹkwoma ẹnọ inọ: Eme? Fikieme? Okevẹ? Diẹse? Ono? Oghẹrẹ vẹ?

Rehọ oke jiroro kpahe Ikereakere na; fiẹgba họ igogo abọjọ ikere na.

Rehọ ẹwawọ ithatho gbe ohẹriẹ nọ o rrọ eware ro ruiruo

Kẹ orukpẹre ẹme na kpobi.

Dhesẹ epanọ a rẹ rọ rehọ ovuẹ na ruiruo ro ku ebẹbẹ họ jẹ jiroro.

ORIA IRUO: (1) Ru ekiakiẹ re whọ ruẹ abọjọ nọ ọ rẹ kẹ eriariẹ evaọ ikereakere nọ a riẹ ziezi, wọhọ Matiu 24:14 hayo Jọn 17:3. (2) Se Itẹ 8:30, 31 gbe Jọn 5:20. Ẹvẹ eroro kpahe usu nọ o rrọ udevie Jihova Ọghẹnẹ avọ Kristi Jesu, wọhọ epanọ a jọ awọ Ebaibol nana dhesẹ na, u re ro fiobọhọ k’ohwẹ rọ ikere eyena fiobọhọ kẹ uviuwou?