Uwuhrẹ 13

Ovao Okpare

Eme o gwọlọ nọ who re ru?

Rri ahwo nọ whọ be t’ẹme kẹ na, daoma re ibiaro ra avọ erai e ruẹ ohwohwo otẹrọnọ o rrọ oware uyoma evaọ oria ra ha. Ruẹ omomọvo, orọnikọ ogbotu na gheghe he.

FIKIEME U JE WUZOU?

Evaọ eria buobu, a rẹ rehọ ibiaro nọ a rẹ tọvi ohwo wọhọ isiuru rọkẹ ohwo nọ whọ be t’ẹme kẹ na. A re je rri rie wọhọ edhesẹ inọ whọ be t’ẹme na avọ imuẹro.

IBIARO mai i re dhesẹ uruemu gbe ọwhọ-eva. E rẹ sai dhesẹ igbunu hayo ozodhẹ. E sai dhesẹ ohrọoriọ hayo uyoyou. Eva ẹsejọ, e sai dhesẹ avro hayo dhesẹ uweri via. Ọkpọkuọzae jọ ọ ta kpahe ahwo orẹwho riẹ, enọ uye o bẹ gaga no, inọ: “Ibiaro ma rẹ rọ t’ẹme.”

Amọfa a sai roro oware jọ kpahe omai gbe ẹme nọ ma be ta fiki obonọ ibiaro mai e rrọ. Evaọ eria buobu, ahwo a rẹ mai fievahọ ohwo nọ o re rri rai aro whẹtiẹwhẹtiẹ. Evaọ abọdekọ riẹ, a rẹ sae vro oruọzewọ gbe ete ohwo nọ o bi rri awọ riẹ hayo oware ofa jọ ukpenọ o re rri ohwo nọ ọ be t’ẹme kẹ na. Evaọ eria efa jọ a re rri ibiaro nọ a rẹ tọvi ohwo gaga wọhọ oheri, ofumuo, hayo ohwo ose-abọ. Onana o mae rrọ ere evaọ okenọ whọ tẹ be t’ẹme kẹ ohwo nọ o wo ẹba sa hayo kẹ oletu hayo okpohwo ọfa. Yọ evaọ eria jọ, otẹrọnọ ọmaha o bi rri ọkpako ovao nọ ọ tẹ be t’ẹme, a re rri onana wọhọ orivo.

Ghele na, evaọ oria nọ o rẹ jọ dheva ha, nọ who te bi rri ohwo ibiaro evaọ okenọ whọ be t’ẹme nọ o wuzou kẹe o sai fiẹgba họ ẹme nọ whọ be ta na. A rẹ sai rri rie wọhọ nọ ẹme na o mu ohwo nọ ọ be t’ẹme na ẹro ziezi. Muẹrohọ epanọ Jesu ọ rọ kuyo evaọ okenọ oware jọ u gbe ilele riẹ unu nọ a rọ ta nọ: “Ono a rẹ sai siwẹ?” Ebaibol na ọ niyẹrẹ nọ: “Jesu o te riwi ai ọ jẹ ta kẹ ae nọ, ‘Onana o rẹ bẹbẹ kẹ ahwo, rekọ eware kpobi e rẹ lọlọhọ eva obọ Ọghẹnẹ.’ ” (Mat. 19:25, 26, ẹjẹlẹ ibieme na ọmai.) Ikereakere na i te je dhesẹ nọ Pọl ukọ na o je muẹrohọ owojẹ enọ e jọ ogbotu riẹ. Evaọ okejọ ọzae jọ nọ ọ ko no eva ze ọ jọ etẹe nọ Pọl ọ jẹ t’ẹme. Iruẹru 14:9, 10 o ta nọ: “Ọ tẹ kezọ ẹme nọ Pọl ọ be ta; nọ Pọl, ọ te ta ẹro mu ei, ọ jẹ ruẹ nọ o wo orọwọ nọ a rero rue i oma ga, ọ tẹ va ta nọ, ‘Rehọ awọ ra dikihẹ kpomavi.’ ” (Ẹjẹlẹ ibieme na ọmai.)

Ezọhọfihọ Rọkẹ Usiuwoma Ota. Evaọ okenọ whọ tẹ be ta usiuwoma, wo oma owhẹwhẹtiẹ avọ oma osasa nọ whọ be nyabru ahwo na. Oria nọ u je fo, rehọ enọ nọ e rẹ kpare iroro muọ ẹmeọta họ kpahe oware nọ u re si ahwo nọ whọ be t’ẹme kẹ na urru. Nọ who bi ru ere na, daoma rri ohwo na ibiaro—hayo o tẹ kawo rri rie ovao evaọ edhere adhẹẹ gbe ẹwo. Unu ohwohwẹ evaọ ovao ohwo nọ ibiaro riẹ i dhesẹ oghọghọ obeva u re siuru gaga. Oghẹrẹ ovao utioye na o sae ta kẹ ohwo na oghẹrẹ ohwo nọ whọ rrọ u ve je fiobọhọ kẹe kiudu vi nọ whọ be t’ẹme na.

Ẹromuhọ oghẹrẹ nọ ovao ohwo na o rrọ, evaọ oria nọ u jo fo, o sai dhesẹ k’owhẹ epanọ uyero na o re riẹ oma. Otẹrọnọ eva e be dha ohwo na hayo o ghine wo isiuru hu, whọ rẹ sae rue riẹ. O gbe bi wo otoriẹ ẹme na ha, whọ rẹ sae rue riẹ. Otẹrọnọ ẹme na ọ bẹ riẹ no, whọ rẹ sae riẹ. Otẹrọnọ o wo isiuru ziezi, u re je dhesẹ oma via re. Edhesẹ ibiaro riẹ o sae ta k’owhẹ inọ who ru ẹme na vẹrẹ omojọ, inọ whọ daoma viere ru ei w’obọ evaọ ẹme na, inọ who ku ẹme na họ hayo, o tẹ lọhọ, who ru odhesẹvia ọrọ epanọ ma re ru uwuhrẹ Ebaibol.

Makọ whọ rọ isẹri-ise ẹgbede hayo who bi ru uwuhrẹ Ebaibol, daoma rọ oma adhẹẹ rri ohwo nọ who bi lele t’ẹme na. Rekọ whọ b’aro sae he keme oyena o sae lẹliẹe jọ wahawaha. (2 Iv. 8:11) Rekọ evaọ edhere ogbẹnyusu, hai rri ohwo na ovao ẹsikpobi. Evaọ ekwotọ buobu, onana u re dhesẹ isiuru oruọzewọ. Dede na, otẹrọnọ who bi se no Ebaibol hayo obe ofa jọ ze, who re fi ẹro họ obe na. Rekọ re who fiẹgba họ ẹme jọ, u re fo re who rri ohwo na, rekọ evaọ ubroke. Whọ tẹ kpare ovao otiẹse, o rẹ jẹ lẹliẹ owhẹ riẹ epanọ oware nọ who bi se na o re riẹ oma.

Otẹrọnọ omovuọ o be jọ owhẹ kpare ovao rri amọfa ha evaọ oke ọsosuọ, o b’owhẹ hẹ. Avọ ewuhrẹ, ovao nọ whọ rẹ kpare ro rri ahwo o te reria owhẹ obọ, yọ u ti fiba ẹriẹruo ọrọ ẹmeọta-kugbe amọfa ra.

Evaọ Okenọ Whọ Tẹ be k’Ovuẹ. Ebaibol na ọ ta k’omai nọ taure Jesu o te ti mu Ovuẹ obọ Ugbehru riẹ họ, “ọ tẹ kpare aro ri ilele riẹ.” (Luk 6:20) Wuhrẹ no oriruo riẹ ze. Otẹrọnọ whọ be te t’ẹme kẹ ogbotu, rẹriẹ ovao ku ai re who dhizu evaọ emaharo jọ re who te mu ẹme họ ẹta. Evaọ eria buobu, onana u dhesẹ nọ whọ rẹ kpare ovao rri ejọ evaọ ogbotu na. Ẹmẹhẹrẹ ọnana ọ sai fiobọhọ k’owhẹ fi ozodhẹ ọsosuọ kparobọ. U re je fiobọhọ kẹ ogbotu na ruẹrẹ oma họ kẹ oware nọ ovao ra u dhesẹ kpobi. Fibae, ere oruo o rẹ lẹliẹ ogbotu na kpọ oma vi jẹ ruẹrẹ oma họ re a k’owhẹ iroro rai.

Evaọ etoke ẹme ra, rri ogbotu na. Who rri ẹko ahwo na kpobi ọvo ho. Daoma rri omomọvo evaọ ogbotu na. Evaọ enwene oria kpobi, a rẹ gwọlọ nọ ohwo nọ ọ be t’ẹme evaọ ẹgbede ọ rẹ dina rri ogbotu na.

Eriwi ogbotu ra o gwọlọ vi ogbotu na nọ who re rri wariẹ ọvo. Fi ẹro họ ohwo jọ evaọ ogbotu na, u te fo, ta uhie-ẹme ọsoso kẹ ohwo na. Kẹsena who ve rri omọfa whọ vẹ ta uhie-ẹme ọvo hayo ivẹ kẹe. Who rri omọvo jọ krẹkri te epanọ oma u re ro tu ei hi, yọ whọ tẹrovi umutho ahwo jọ ọvo evaọ ogbotu na soso ho. Hai rri ogbotu na wariẹ evaọ edhere nana, rekọ nọ whọ be t’ẹme kẹ ohwo jọ na, ghinẹ t’ẹme kẹ ohwo na re whọ ruẹ epanọ ọ te rehọ ẹme na re who te bru omọfa.

Who re fi ebe ra họ agbada oruẹme na, kru ae họ obọ, hayo fi ae họ evaọ Ebaibol ra re evaọ okenọ whọ tẹ jẹlẹ ẹro ọvo yọ whọ ruẹ e rai no. Otẹrọnọ o gwọlọ nọ who re go uzou ra kpobi re whọ tẹ ruẹ ebe ra, koyehọ ovao okpare rri ogbotu na o te lọhọ họ. Who re roro kpahe unuẹse nọ who re rri ebe ra gbe okenọ who re ro ru ei. Who te bi rri ebe ra nọ whọ be nyate ekuhọ ẹme no, orọnikọ oghẹrẹ nọ ogbotu na ọ be rehọ ẹme na ọvo whọ te ruẹ hẹ hẹ rekọ awere ẹme ra o ti vru kufiẹ. Epọvo na re, nọ who te bi rri ebe ra kẹse kẹse, whọ te gbẹ ruẹ ogbotu ra ha.

Who te gbolo obọro se ohwo, who re rri re whọ ruẹ sọ ọ ja riẹ. Ẹjiroro kpobi evaọ ẹme ra yọ ‘egbolo’ oware se ogbotu na. Oware nọ u re dhesẹ nọ a ‘ja’ riẹ no o sae jọ uyo nọ a kẹ—uzou nọ a fi, unu ohwohwẹ, ẹro nọ a tọvi owhẹ. Whọ tẹ be kpare ovao ziezi, onana u re fiobọhọ kẹ owhẹ imuẹro inọ a be “ja” eme ra rehọ.

A tẹ k’owhẹ ẹme re who se kẹ ukoko na, kọ whọ rẹ daoma rri ogbotu na evaọ etoke isase ra? Otẹrọnọ ogbotu na o bi lele owhẹ evaọ isase Ebaibol na, ibuobu rai e te riẹ hẹ sọ whọ be kpare ovao hayo whọ kpare ovao ha. Rekọ erri ogbotu ra o sai fiobọhọ fiẹgba họ isase ra keme o te lẹliẹ owhẹ riẹ oghẹrẹ nọ a bi ru. Yọ rọkẹ ahwo kpobi evaọ ogbotu na nọ a bi rri Ebaibol rai hi, gbe enọ iroro rai i bi ghoro, ovao oruẹme na nọ a rẹ ruẹ o te rehọ iroro rai zihe ziọ oware nọ a bi se na. Dede na, whọ sae te kpare ovao krẹkri hi, yọ u fo re who rri ehru evaọ edhere nọ ọ rẹ lẹliẹ owhẹ jẹhọ evaọ isase ra ha. Fikiere, o rẹ mai woma re who kru Ebaibol ra h’obọ re whọ jẹ kpọ uzou ra vi, orọnikọ who re gb’uzou h’otọ họ.

Ẹsejọ, a rẹ sai se ekpako re a jọ okokohọ ologbo t’ẹme nọ a re se ọvo. Onana uruo ziezi o gwọlọ eriariẹ, emamọ omaruẹrẹhọ, gbe emamọ ewuhrẹ. Uzẹme, ẹme nọ a re se no obe ze ọvo o rẹ lẹliẹ ovao okpare dina kao. Rekọ otẹrọnọ oruẹme na ọ ruẹrẹ oma kpahe ziezi, ọ rẹ sai riwi ogbotu riẹ n’oke ruoke ababọ evru no oria nọ ọ rọ evaọ obe na. Ere oruo u ti fiobọhọ kru iroro ogbotu na je ru ai wo erere vọvọ no uthubro obọdẹ abọ-ẹzi nọ ọ be kẹ na ze.

EWARE NỌ A RẸ KAREGHẸHỌ

Jọ ẹkoma ra, whẹtiẹwhẹtiẹ, ghine wo isiuru kẹ enọ whọ be t’ẹme kẹ na.

Okenọ who te bi se, kru obe na h’obọ jẹ kpọ uzou ra dikihẹ re whọ sae jẹlẹ ẹro ra ọvo, orọnikọ uzou ra ha.

ORIA IRUO: Evaọ ẹmeọta ikẹdẹ kẹdẹ kugbe uviuwou gbe egbẹnyusu, daoma nyaharo evaọ ovao ra okpare ro rri amọfa, ru ere evaọ edhere nọ o rẹ wọso uruemu okegbe na ha.