Dhesẹ Uvi Isiuru—Ẹkwoma Ovao Ahwo nọ Who re Rri
1 Nọ ma tẹ be ta usiuwoma evaọ ẹgbede je no uwou ruọ uwou, ẹsibuobu ma re ri ovao ahwo taure ma te mu ẹme họ ẹta. Evaọ umutho oke yena, ma sae rọ ẹkwoma oghẹrẹ nọ ahwo a ru ovao rai rọ riẹ epanọ ẹnyaze mai ọ rọ ae oma gbe uyero nọ a rrọ evaọ oke yena. Epọvo na re, a sae j’oma mai ruẹ oware jọ vuhumu re. Enẹ aye jọ ọ ta kpahe iweze Osẹri jọ: “Udu udhedhẹ riẹ họ oware nọ mẹ kareghẹhọ evaọ ovao owhẹwhẹtiẹ riẹ. O kpare isiuru mẹ.” Onana u rovie edhere kẹ aye na nọ ọ rọ gaviezọ kẹ emamọ usi na.
2 Ovao amọfa nọ ma re rri yọ uvi edhere nọ u re su kpohọ isẹri-ise nọ ma tẹ be ta usiuwoma evaọ iyẹrẹ hayo evaọ eria ẹgbede efa. Oniọvo-ọmọzae jọ o re rri ovao ahwo nọ a be nya no aro riẹ ze kẹle iẹe. Nọ o te rri ovao ahwo na, ọ vẹ hwẹ kẹsena ọ vẹ rehọ emagazini rọ kẹ ae. Fiki edhere nana nọ o bi ro ruiruo, o bi wo omawere ẹmeọta-kugbe ọsasa je fi ebe buobu họ ada.
3 Vuhu Epanọ Eware E Rrọ Amọfa Oma: Ovao ahwo nọ ma re rri u ti fiobọhọ k’omai vuhu epanọ eware e rrọ amọfa oma. Wọhọ oriruo, otẹrọnọ o rrọ bẹbẹ kẹ ohwo jọ re o wo otoriẹ oware nọ ma be ta hayo nọ ọ gbẹ rọwo kugbei hi, u re dhesẹ oma via evaọ ovao riẹ. Otẹrọnọ o wo uvẹ hẹ hayo ẹmeọta na ọ bẹ riẹ no, ma re vuhu iei mu ẹkwoma ẹromuhọ oghẹrẹ nọ ovao riẹ o rrọ. Kẹsena ma vẹ rọ ere kpọ ẹme mai hayo ru ei kpẹre. Ẹromuhọ epanọ eware e rrọ amọfa oma yọ obọdẹ edhere nọ ma re ro dhesẹ uvi isiuru nọ ma wo kpahe ae.
4 Onọ U No Eva ze avọ Imuẹro: Evaọ iruemu-ewho buobu, ovao ohwo nọ who re rri nọ whọ tẹ be t’ẹme kẹe yọ imuẹro inọ ẹme nọ whọ be ta na o mu owhẹ ẹro. Muẹrohọ epanọ Jesu ọ rọ kpahe ẹme nọ ilele riẹ a nọe nọ: “Ono a rẹ sai siwẹ?” Ebaibol na e nẹ iyẹrẹ nọ: ‘Jesu o te riwi ai ovao, ọ jẹ ta kẹ ae nọ, “Onana o rẹ bẹbẹ kẹ ahwo, rekọ eware kpobi e rẹ lọlọhọ eva obọ Ọghẹnẹ.” ’ (Mat. 19:25, 26) Ababọ avro imuẹro nọ a ruẹ evaọ ovao Jesu u ru ẹme riẹ na muẹro viere. Evaọ edhere ọvona, ovao amọfa nọ ma re rri u ti fiobọhọ k’omai vuẹ ovuẹ Uvie na ziezi avọ imuẹro.—2 Kọr. 2:17; 1 Tẹs. 1:5.