Ru Ẹro Ra Lọhọ
1 Evaọ ovuẹ obọ ugbehru riẹ na, Jesu o si iroro kpohọ okpomahọ ologbo nọ ibiaro ẹwoho mai e rẹ sai wo evaọ edhere uzuazọ mai kpobi. Ọ ta nọ: “Fikiere ẹro ra o te woma, oma ra ososo u re lo; rekọ ẹro ra o te yoma, oma ra ososo u re biẹ.” (Mat. 6:22, 23) Ubiẹro olọlọhọ họ onọ o rẹ tọ vi edhere ọvo—eruo oreva Ọghẹnẹ—nọ u re reghe he fiki awa-ọruọ nọ o fo ho kpahe eware abọ-iwo. (Mat. 6:19-21, 24-33) Eme ọ rẹ sai fiobọhọ kẹ omai yọrọ ẹro ọlọlọhọ?
2 Ẹgwọlọ Wo Evevọwẹ: Uviuwou ohwo nọ a rẹ gwọlọ kẹ ziezi yọ owha iruo nọ Ikereakere na e kẹ. (1 Tim. 5:8) Rekọ onana u du gwọlọ nọ ma rẹ họre kiti kata kẹ onọ o mai woma gbe onọ u kieze kpobi hi. (Itẹ 27:20; 30:8, 9) Ukpoye, Ikereakere na e ta udu họ omai awọ nọ ma wo edẹro kẹ “emuore gbe emuẹgọ,” eware nọ e roja evaọ uzuazọ. (1 Tim. 6:8; Hib. 13:5, 6) Uthubro nana nọ ma re ru lele o rẹ sai fi obọ họ kẹ omai tọ ẹro mai vi emamọ edhere.
3 O rẹ jọ oware areghẹ re ma whaha esa nọ ma rẹ re fiki eware nọ e roja ha gbe ekwakwa hayo ilale eware nọ e rẹ rehọ oke gbe iroro ohwo. (1 Tim. 6:9, 10) Ẹvẹ ma sai ro ru onana? Nọ ma te bi roro kpahe owọ jọ nọ ma rẹ jẹ, u fo re ma fi oware na họ olẹ je roro kpahe iẹe ziezi jọ u ti kpomahọ iruẹru abọ-ẹzi mai. Gbaemu re whọ rọ eware abọ-ẹzi karo evaọ uzuazọ ra.—Fil. 1:10; 4:6, 7.
4 Ru Edhere Uzuazọ Ra Lọhọ: Oware ofa nọ u re fiobọhọ kẹ omai whaha isiuru eware abọ-iwo họ, ma rẹ daoma ru edhere uzuazọ mai lọhọ. Oniọvo-ọmọzae jọ nọ o muẹrohọ nọ uviuwou riẹ o rẹ sai yeri utho-uzuazọ ababọ ekwakwa abọ-iwo buobu ọ ta nọ: “Enẹna mẹ rẹ sae jọ ukoko na ruiruo kẹ inievo mẹ ziezi. U mu omẹ ẹro inọ Jihova ọ rẹ ghale idibo riẹ kpobi nọ e rọ egagọ uzẹme karo kẹ isiuru omobọ rai.” Kọ whọ sae reawere eghale ilogbo ẹkwoma uzuazọ ra nọ who re ru lọhọ?
5 Re ma whaha okpomahọ Setan, akpọ isiuru ekwakwa-efe riẹ, gbe sebaẹgba mai, o gwọlọ omodawọ ikẹse kẹse. Ukpenọ ma rẹ kẹ ibiaro mai uvẹ re i reghe kpenẹ avọ enẹ, joma tọ ae vi oreva Ọghẹnẹ uruo gbe ẹruore ọghaghae mai ọrọ uzuazọ ibẹdẹ bẹdẹ.—Itẹ 4:25; 2 Kọr. 4:18.
[Study Questions]
1. Eme u dhesẹ re a wo ẹro ọlọlọhọ, kọ fikieme onana o jẹ roja?
2. Didi eriwo kpahe eware abọ-iwo Ẹme Ọghẹnẹ ọ ta udu họ omai awọ nọ ma wo?
3. Eme ọ rẹ sai fi obọ họ kẹ omai whaha ewha egbẹgbẹdẹ nọ ma re si fihọ omobọ mai?
4. Fikieme ma jẹ gwọlọ idhere nọ ma re ro ru uzuazọ mai lọhọ?
5. Fikieme o jẹ gwọlọ omodawọ ikẹse kẹse re ma ru ẹro mai lọhọ?