Kọ Who Wo Ẹro Ọlọlọhọ?
1. Eme u dhesẹ re ohwo o wo ẹro ọlọlọhọ?
1 Oware nọ ma tẹrovi u re kpomahọ uruemu mai. Eme ọ Jesu na i fo kẹhẹ inọ: “Ukpẹ oma na ẹro. Fikiere ẹro ra o te woma, oma ra ososo u re lo”! (Mat. 6:22) Ma te wo ẹro ọlọlọhọ ma te rehọ eruo oreva Ọghẹnẹ karo. Ma te rehọ Uvie na karo, yọ ma te kuvẹ hẹ re eware abọ-iwo e whaha omai usiuwoma ota.
2. Eme o rẹ sai kpomahọ iroro mai, kọ eme u re fi obọ họ k’omai?
2 U Fo nọ Ma Kiẹ Oma Mai Riwi: Ekwakwa ekpokpọ nọ a bi dhesẹ hayo whowho gbe eware nọ amọfa a wo e sai kpomahọ iroro mai. Taure ma te ti ru hayo dẹ oware jọ nọ o rẹ sai mi omai oke buobu, igho buobu hayo ẹgba gaga, u re woma re ma roro kpahe oware nọ o te rehọ mi omai, ma rẹ nọ oma mai inọ, ‘Kọ onana u ti fi obọ họ k’omẹ gọ Jihova ziezi manikọ u ti si omẹ kpemu?’ (Luk 14:28; Fil. 1:9-11) N’oke t’oke, u fo nọ ma re roro kpahe epanọ ma sai gbe ro ru uzuazọ mai lọhọ re ma sai wobọ ziezi evaọ odibọgba na.—2 Kọr. 13:5; Ẹf. 5:10.
3. Eme ma wuhrẹ mi oniọvo-ọmọtẹ jọ nọ o ru inwene re ọ sai ru uzuazọ riẹ lọhọ?
3 Nọ oniọvo-ọmọtẹ jọ o mu iruo ọkobaro oke-kpobi họ, ọ jiroro nọ ọ rẹ daji iruo riẹ nọ e rẹ rehọ okpẹdẹ soso, dede nọ ọ hẹ sae jọ iruo ubroke wo ugho rẹrote oma riẹ. Uwhremu na ọ ta nọ: “Uvumọ ohwo ọ rẹ sae gbodibo kẹ ilori ivẹ hẹ. Me te siobọno eware nọ e rrọ isiuru gheghe k’omẹ, rekọ mẹ tẹ tẹrovi enọ e ginẹ roja k’omẹ. Me vuhumu inọ ekwakwa akpọ na i re kru ekiekpo ho, yọ me te bi le ai me ti kpe oma mẹ kufiẹ gheghe.” Uyero riẹ o kẹ riẹ uvẹ ru inwene nọ ọ sai ro ru uzuazọ riẹ lọhọ, ọ tẹ gwọlọ iruo efa nọ i fi obọ họ kẹe ruabọhọ iruo ọkobaro na.
4. Fikieme o jẹ roja enẹna re ma wo ẹro ọlọlọhọ?
4 Fiki etoke nọ ma rrọ na, o roja gaga re ma ru ẹro mai lọhọ. Kẹdẹ kẹdẹ ma bi si kẹle urere akpọ nana gbe emuhọ akpọ ọkpokpọ Ọghẹnẹ. (1 Kọr. 7:29, 31) Ma tẹ tẹrovi iruo usiuwoma ota na, ma ti siwi oma mai gbe enọ e gaviezọ k’omai.—1 Tim. 4:16.