Omaa Okpokpọ orọ Ẹdẹ Okokohọ Obọdẹ

Oghẹrẹ nọ a ma ubiẹro na u gbunu gaga. (Ol. 139:14) Ghele na, o rẹ sae tọvi eware ivẹ eva oke ovona ha. Onana o rrọ ere evaọ eriwo gheghe dẹẹ gbe eva abọ ẹwoho. Re ma sae yọrọ eriwo ọliọliọ ọrọ abọ-ẹzi, o gwọlọ nọ ma rẹ tọ ẹro mai vi eruo oreva Ọghẹnẹ. Fiki eware nọ i re reghe hayo si iroro ohwo rehọ nọ i bi dhe evievihọ eva akpọ Setan, u woma kẹhẹ inọ ọruẹrẹfihotọ ẹdẹ okokohọ obọdẹ ọrọ 2006 o ti ru uzoẹme nana vẹ “Ru Ẹro Ra Lọhọ”!—Mat. 6:22.

Eme ma rẹ sai ru re ma wo eghale Jihova? (Itẹ 10:22) A te kuyo onọ nana evaọ abọ nọ o wo uzoẹme na “Eghale I re Te Omai nọ Ma te Ru Ẹro Mai Lọhọ.” Ekiẹriwo nọ a ti ru i ti fielo họ epanọ ma re ro wo erere no efihiruo ehri-izi Ikereakere na ze. Ẹme ọsosuọ oruẹme ọrara na, “Jo Ma Ru Ẹro Mai Lọhọ Evaọ Akpọ Omuomu Nana,” o te vẹvẹ omai unu kpahe eware nọ e rẹ sae lẹliẹ uzuazọ mai jọ kpakre kpakre jẹ rọ ere whaha omai ẹnyaharo abọ-ẹzi. Ma ti je wuhrẹ oware nọ “abọ owoma” nọ a rẹ ha o kẹre te.—Luk 10:42.

Ẹvẹ esẹgbini gbe amọfa a sae rọ tuduhọ izoge Ileleikristi awọ re a t’ẹro vi ele eware abọ-ẹzi? A te jọ abọ ẹme ọ “Esẹgbini nọ E Kpọ Ovao Emọ Rai Rri Uvi Edhere” gbe “Izoge nọ I Bi Le Itee Abọ-Ẹzi” yo mi esẹgbini avọ izoge nọ e te ta oware nọ a wo kpahe onọ nana nọ u wuzou gaga na. (Ol. 127:4) Ẹme urere nọ oruẹme ọrara na ọ te ta u ti dhesẹ epanọ ma sae rọ nya lele ukoko Jihova wọhọ omomọvo, wọhọ uviuwou, gbe wọhọ ukoko.

Tọ ma kurẹriẹ ziọ ukoko na obọ hayo ma gọ Jihova te ikpe buobu no, o roja re ma ‘ru ẹro mai lọhọ.’ Ọruẹrẹfihotọ ẹdẹ okokohọ obọdẹ na o ti fiobọhọ k’omai ru ere.