Ọruẹrẹfihotọ Okokohọ Obọdẹ Ọkpokpọ

Ma tẹ ruẹ hayo yo edo oware jọ nọ o k’omai unuovẹvẹ nọ ma gbẹ jowọ kpahe iẹe he, oware uyoma o rẹ sai noi ze. O tubẹ mae roja re ma jowọ lele ọkpọvio abọ-ẹzi nọ Jihova ọ be kẹ. A ti fi ẹgba họ onana evaọ ọruẹrẹfihotọ ẹdẹ okokohọ obọdẹ ọrọ ukpe notha na. Uzoẹme na họ “Wha Yọrọ Oma Epanọ Wha re Yo.”—Luk 8:18.

Evaọ ẹme ọsosuọ riẹ, oruẹme ọrara na ọ te ta kpahe epanọ ithubro nọ e rrọ izou ọsosuọ erọ ileta nọ Pọl o kere se ahwo Hibru na i ro kie kpahe omai nẹnẹ. Evaọ ẹme urere na, “Gaviezọ kẹ Uthubro Ọghẹnẹ Kẹse Kẹse,” oruẹme ọrara na o ti fiobọhọ kẹ ahwo kpobi kiẹ oma rai riwi jọ a be ginẹ kezọ kẹ Jihova, Ọmọ riẹ, gbe ‘odibo ẹrọwọ avọ areghẹ na.’—Mat. 24:45.

Abọ sa-sa ọruẹrẹfihotọ na ọ te mae jọ erere kẹ iviuwou. Ẹme na, “Iviuwou Nọ E Rẹ Gaviezọ kẹ Ẹme Jihova Ababọ Iroro Rai nọ I Re Reghe” u ti fiobọhọ k’omai nọ ma jẹ whaha eware akpọ na re e se ẹnyaharo abọ-ẹzi mai ba ekpomahọ. Ekiẹriwo ahwo nọ a ru inwene no re a sae rọ eware abọ-ẹzi karo e te jariẹ. Ekiẹriwo izoge nọ i kru uzẹme na whawha no evaọ obọ isukulu, evaọ aro ehwa rai, hayo evaọ odibọgba na e te jọ ẹme na “Epanọ Emamọ Ezọgaviẹ kẹ Ẹme Ọghẹnẹ O Rẹ Rọ Kẹ Izoge Mai Ẹgba.” Ẹme na “Emaha Nọ E Rẹ Gaviezọ kẹ Ọghẹnẹ Je Wuhrẹ” o ti fiobọhọ k’omai nọ ma gbe rri ẹgba emaha na nọ a re ro wuhrẹ vo ho. Esẹgbini avọ emọ rai nọ a te kiẹ riwi u ti fiobọhọ k’omai ruẹ ewoma nọ o re no ọmọ nọ a re wuhrẹ idhere Jihova no emaha ze.

Nọ Setan ọ be “viẹ akpọ kpobi họ na,” yọ Jihova o bi dhesẹ kẹ idibo ẹrọwọ riẹ epanọ a rẹ nya. (Evia. 12:9; Aiz. 30:21) Ezọ nọ ma rẹ gaviẹ ziezi kẹ uthubro riẹ gbe oma nọ ma re ro kpotọ fi ai họ iruo evaọ uzuazọ mai u re ru omai wo areghẹ, wha evawere se omai, je su omai kpohọ uzuazọ ibẹdẹ bẹdẹ.—Itẹ 8:32-35.