Uwuhrẹ 32

Ẹme Nọ A Rẹ Ta Avọ Imuẹro

Eme o gwọlọ nọ who re ru?

T’ẹme evaọ edhere nọ o re dhesẹ nọ who wo imuẹro kpahe ẹgbagba ẹme nọ whọ be ta na gbe epanọ u wuzou te.

FIKIEME U JE WUZOU?

Imuẹro ra e te tuduhọ amọfa awọ re a se ẹme nọ whọ be ta na gboja re a jẹ j’owọ kpahe iẹe.

OHWO ọ tẹ be t’ẹme avọ imuẹro, amọfa a rẹ ruẹ nọ ọ ghinẹ rọwo ẹme nọ ọ be ta na. Imuẹro itieye na i dhesẹ oma via evaọ odibọgba Pọl ukọ na. O kere se enọ e rọwo evaọ Tẹsalonika nọ: ‘Usiuwoma nọ ma vuẹ owhai, orọ ẹme unu ọvo ho; rekọ avọ . . . imuẹro.’ (1 Tẹs. 1:5) Imuẹro itieye na i re dhesẹ oma via evaọ oghẹrẹ nọ ọ rọ t’ẹme gbe evaọ edhere uzuazọ riẹ. Imuẹro egaga i re je dhesẹ oma via evaọ edhere nọ ma re ro dhesẹ uzẹme Ebaibol na via.

Edhesẹ imuẹro o wo ohẹriẹ no iroro ohwo nọ ọ rẹ s’owọ mu, oriẹ ọvo a rẹ rehọ, hayo oheri. Ukpoye, okenọ ohwo nọ o wo imuẹro ọ tẹ be t’ẹme kpahe eware nọ e rọ Ẹme Ọghẹnẹ, o re ru ere evaọ edhere nọ o re dhesẹ ẹrọwọ ọgaga via.—Hib. 11:1.

Eria nọ Ma re Jo Dhesẹ Imuẹro. O r’oja re whọ t’ẹme avọ imuẹro evaọ okenọ whọ tẹ rọ iruo odibọgba na. Ahwo a re muẹrohọ oghẹrẹ ẹmeọta ra wọhọ epanọ a re muẹrohọ ovuẹ ra. A rẹ jọ ovao ra ruẹ oghẹrẹ nọ ẹme nọ whọ be ta na ọ rọ owhẹ oma. Imuẹro ra e sae rọ ẹgba dhesẹ nọ who wo oware oghaghae jọ nọ whọ gwọlọ ghale vi ẹmeunu ọvo.

U woma re ma dhesẹ imuẹro re evaọ okenọ ma tẹ be t’ẹme kugbe ogbotu ibe enọ e rọwo. Pita ukọ na o kere ileta ọsosuọ riẹ nọ a kẹ ẹgba ‘rọ kẹ uduotahawọ je woro whawha inọ onana họ aruoriwo uzẹme Ọghẹnẹ na.’ Ọ tuduhọ inievo riẹ awọ nọ: “Dikihẹ whawha” evaọ onana. (1 Pita 5:12) Okenọ o je kere se ukoko nọ o jọ Rom, Pọl ukọ na o dhesẹ imuẹro nọ e kẹ rai erere. O kere nọ: “Umuomẹ ẹro nọ makọ uwhu, hayo uzuazọ, hayo ikọ-odhiwu, hayo iride, hayo eware nọ erọ enẹna, hayo eware nọ e be tha, hayo egaga, hayo ekpehru, hayo ekodo, hayo oware ovo eva emama na kpobi, no rẹ sae hẹriẹ omai no uyoyou Ọghẹnẹ evaọ Kristi Jesu Ọnowo mai na, ọ rọhọ.” (Rom 8:38, 39) Pọl o te je kere avọ ẹtẹzẹ kpahe epanọ usiuwoma ota kẹ amọfa u wuzou te, yọ ọwhọ riẹ evaọ iruo na o kẹ imuẹro ivevẹ inọ epanọ iruo na i wuzou te u mu rie ẹro. (Iruẹru 20:18-21; Rom 10:9, 13-15) U fo re imuẹro itieye na i dhesẹ oma via evaọ oma ekpako Ileleikristi nẹnẹ nọ a bi wuhrẹ no Ẹme Ọghẹnẹ ze na.

Eva etoke uwuhrẹ gbe oke ofa kpobi, u fo re esẹ gbe ini e t’ẹme avọ imuẹro evaọ okenọ a tẹ be t’ẹme eware abọ-ẹzi kugbe emọ rai. Onana u dhesẹ nọ esẹ gbe ini e rẹ bọ uyoyou kẹ Ọghẹnẹ gbe idhere riẹ fihọ idu obọ rai. A vẹ sae t’ẹme n’udu ze avọ imuẹro kẹ emọ rai, ‘keme epanọ eme i bu udu na te unu o rẹ ta.’ (Luk 6:45; Izie. 6:5-7) Ewo imuẹro itieye na o rẹ jẹ wọ esẹ gbe ini re a kẹ oriruo “uvi orọwọ.”—2 Tim. 1:5.

O mae r’oja re whọ t’ẹme avọ imuẹro evaọ okenọ amọfa a te wo avro kpahe ẹrọwọ ra. O sai gbe ibe-isukulu, iticha, hayo ibe-oruiruo unu nọ who bi w’obọ evaọ ehaa jọ họ. Uyo ọtamuo ọgaga, orọ iroro o sai fiobọhọ kẹe rọ adhẹẹ kẹ edikihẹ ra nọ o no Ebaibol ze na. Kọ ẹvẹ otẹrọnọ ohwo jọ ọ gwọlọ bẹbẹ owhẹ ruọ eyoma oruo—uruemu ababọ oruọzewọ, ogbẹlọ imu, hayo ọfariẹ-ogbe? O r’oja re who ru ei vẹ nọ who ti duomahọ uruemu utioye na ha gbe nnọ makọ omodawọ hayo ẹtẹzẹ nọ ọ wha ze kpobi o te lẹliẹ owhẹ nwene iroro ra ha. Onana o gwọlọ nọ whọ rẹ t’ẹme na avọ imuẹro evaọ okenọ whọ tẹ be se ayare na. Okenọ ọ jẹ se owojẹ ọfariẹ orọ aye Pọtifa, Josẹf ọ ta avọ udu nọ: “Kẹvẹ me je ru umuomu ulogbo utiona, re mẹ thọ uzi Ọghẹnẹ?” Nọ aye na o sikẹ viere, ọ tẹ dhẹ no uwou na.—Emu. 39:9, 12.

Epanọ A re ro Dhesẹ Imuẹro. Oghẹrẹ eme nọ whọ ta i re fiobọhọ dhesẹ imuẹro ra via gaga. Ẹsibuobu, taure Jesu ọ tẹ te t’eme jọ, ọ rẹ kake ta nọ: “Uzẹme, uzẹme, mẹ ta kẹ owhẹ.” (Jọn 3:3, 5, 11; 5:19, 24, 25) Imuẹro ọ Pọl i dhesẹ oma via evaọ eme wọhọ “Umuomẹ ẹro,” “mẹ riẹ, me te je vuhu eva Ọnowo na Jesu,” gbe “uzẹme mẹ rẹ ta na, o rọ erue he.” (Rom 8:38; 14:14; 1 Tim. 2:7) Kpahe orugba ẹme riẹ, ẹsejọ Jihova ọ rẹ kẹ eruẹaro riẹ ẹgba re a whowho eme udu wọhọ, “Ọ rẹ seba ẹtha ha.” (Hab. 2:3) Whọ tẹ be t’ẹme kpahe eruẹaruẹ enana, whọ sae rọ eme evo na t’ẹme. Who te fievahọ Jihova, orọnikọ oma ra ha, yọ whọ tẹ bẹ t’ẹme kẹ amọfa avọ adhẹẹ, ọkpọ eme nọ i dhesẹ oghẹrẹ imuẹro evona i re dhesẹ vevẹ nnọ who wo ẹrọwọ ọgaga.

Ẹzẹ gbe ọwhọ nọ whọ be rọ t’ẹme na e sai je dhesẹ imuẹro ra. Oghẹrẹ nọ who ru ovao ra, obọrọtẹme ra, gbe enuhu oma ra kpobi i re fiba onana, dede nọ enana i re wo ohẹriẹ no ohwo ruọ ohwo. O tẹ tubẹ rọnọ whọ rẹ vuoma hayo whọ rẹ t’ẹme avọ ẹgba tere he, nọ who te wo imuẹro nọ ẹme nọ whọ be ta na yọ uzẹme gbe nọ u fo re amọfa a yo kpahe iẹe, imuẹro ra i ti dhesẹ oma via.

Dede na, o gwọlọ re oma imuẹro nọ ma bi dhesẹ via kpobi o jọ uvi riẹ. Ahwo a tẹ ruẹ nọ whọ be t’ẹme na no udu ze he, a te rehọ iẹe nọ a re fievahọ ẹme ra ha. Fikiere, t’ẹme avọ ẹkoma ra. Wọhọ epanọ ogbotu ra ọ rro te, whọ rẹ sae t’ẹme na do avọ ẹgba viere. Rekọ ute ra họ re whọ ghinẹ ta ẹme na epanọ o rọ owhẹ udu via evaọ ẹkoma ẹmeọta ra.

Obufihọ Evaọ Ẹmeọta Imuẹro. Nọ imuẹro ra i w’obọ kpahe oghẹrẹ nọ whọ rehọ ẹme ra na, emamọ omaruẹrẹhọ yọ oware nọ u wuzou. Re who kere eme no obe jọ ze je se ai fihọ uzou ọvo u te he. U fo re eme na i vẹ owhẹ ẹro ziezi whọ vẹ jẹ sae rehọ eme obọ ra tae. U re mu owhẹ ẹro ziezi inọ ẹme na uzẹme gbe nọ ẹme nọ whọ be ta ọ rọ erere kẹ ogbotu ra. Onana u dhesẹ nọ okenọ whọ tẹ be ruẹrẹ oma kpahe kẹ ẹme ra, who re roro kpahe iyero rai gbe oware nọ a riẹ no vẹre kpahe uzoẹme na, hayo oghẹrẹ nọ a ti rri rie.

O rẹ lọhọ gaga re amọfa a ruẹ imuẹro mai evaọ okenọ ẹme mai ọ gbẹ be jẹhọ họ. Fikiere, u te no emamọ eme nọ ma rẹ ruẹrẹhọ no, daoma fihọ ẹta ẹme na. Tẹrovi abọ ẹme ra nọ ọ gwọlọ ẹzẹ re whọ sae t’ẹme na ababọ obe nọ who re gb’ovao họ. Jẹ kareghẹhọ lẹ kẹ oghale Jihova evaọ omodawọ ra. Evaọ edhere nana who ti “wo udu eva Ọghẹnẹ mai” re whọ t’ẹme evaọ edhere nọ o dhesẹ imuẹro kpahe uzẹme na gbe epanọ ovuẹ mai u wuzou te.—1 Tẹs. 2:2.

EPANỌ A RE RO RU EI

Rọ oma-iroro nọ u kiehọ uzoẹme ra na t’ẹme na.

Rehọ eme nọ i re dhesẹ imuẹro ra via ru ẹme na.

Wuhrẹ ẹme ra bẹsenọ u re ro vẹ owhẹ ẹro no ziezi nọ whọ rẹ sae rọ rehọ eme obọ ra tae. Ẹgbagba riẹ gbe erere riẹ kẹ ogbotu ra o re mu owhẹ ẹro.

ORIA IRUO: Wuhrẹ eria Ebaibol obotọ na: Ọnyano 14:10-14; 2 Ivie 5:1-3; Daniẹl 3:13-18; Iruẹru 2:22-36. Evaọ iyero nọ a dhesẹ na, ẹvẹ idibo Ọghẹnẹ a ro dhesẹ imuẹro rai? Eme ọ kẹ rae imuẹro na? Ẹvẹ whọ sai ro dhesẹ imuẹro itieye na nẹnẹ re?