UWUHRẸ AVỌ 4

Oghẹrẹ nọ U Fo nọ A rẹ rọ Ta kẹ Ahwo re A Rovie Ebaibol

Matiu 22:41-45

OWARE NỌ O GWỌLỌ: Kake ruẹrẹ iroro ahwo nọ a be gaviezọ kẹ owhẹ na kpahe kẹ oria ikere nọ whọ gwọlọ se na.

Riẹ oware nọ o be lẹliẹ owhẹ se ikere na. Jọ oghẹrẹ nọ whọ te rọ ta kẹ ae nọ a rovie oria Ebaibol jọ u fiobọhọ kẹ ae muẹrohọ ugogo oware nọ whọ gwọlọ rọ via no oria Ebaibol yena ze.

Roro kpahe eme gbe eware efa nọ e wariẹ oria Ebaibol yena họ. Ruẹ nọ ohwo nọ whọ te fodẹ inọ ọye ọ ta ẹme nọ ọ rrọ etẹe na hayo inọ ọye o kere obe Ebaibol yena, ọye họ uzedhe ohwo na.
Rehọ ẹme ra no Ebaibol na ze. Whọ tẹ be ta ẹme kugbe ahwo nọ a rọwo Ọghẹnẹ, si iroro ahwo na kpohọ Ebaibol na evaọ oghẹrẹ nọ u dhesẹ nọ “Ẹme Ọghẹnẹ” ọ rrọ, ere oruo u re dhesẹ nọ evaọ Ebaibol na areghẹ nọ ọ mae rro ọ rrọ.
Kpare isiuru ahwo kẹ oria ikere na. Nọ onọ nọ oria Ebaibol yena o te kuyo riẹ, fodẹ ẹbẹbẹ hayo uyero jọ nọ oria Ebaibol yena o sai jo fiobọhọ kẹ omai riẹ oware nọ u fo eruo, hayo oware nọ ma rẹ sai wuhrẹ no iku oria yena ze.

Roro kpahe oware nọ ahwo nọ a be te gaviezọ kẹ owhẹ na a riẹ no vẹre kpahe ẹme yena gbe ikere yena. Rehọ edhere nọ o re siuru zizie ahwo kẹ ese oria nọ a make riẹ ziezi no vẹre, re who je fiobọhọ kẹ ae rọ ubiẹro ofa rri rie.