Daoma Ta Ẹme nọ O re Duobọte Ohwo Udu

Itẹ 3:1

OWARE NỌ O GWỌLỌ: Fiobọhọ kẹ enọ e be gaviezọ kẹ owhẹ na re a vuhu epanọ oware nọ a bi wuhrẹ na u wuzou te je fi ei họ iruo.

EPANỌ A RE RO RU EI:

• Fiobọhọ kẹ enọ e be gaviezọ kẹ owhẹ na re a kiẹ omarai riwi. Nọ enọ nọ e nwane gwọlọ uyo ho nọ i re fiobọhọ kẹ ahwo na kiẹ iroro nọ a wo kpahe ẹme na riwi.

• Fiobọhọ kẹ ae roro kpahe emamọ ẹjiroro nọ a wo. Tuduhọ enọ e be gaviezọ kẹ owhẹ na awọ re a roro didi kpahe oware nọ o soriẹ nọ a bi ro ru eware ezi nọ a bi ru na. Fiobọhọ kẹ ai wo ẹjiroro nọ ọ mai woma nọ a re ro ru eware, koyehọ uyoyou kẹ Jihova, jẹ rọkẹ ibe ahwo-akpọ rai gbe eware nọ Ebaibol na o wuhrẹ. Fiobọhọ kẹ enọ e be gaviezọ kẹ owhẹ na roro ẹme na; whọ ta ẹme kẹ ae wọhọ ẹsenọ whọ be ta họ ae obọ họ. Ukpenọ who kpomovuọ họ ae oma, ru re a rri ẹme na kpobi wọhọ ẹme uduotahawọ, onọ o te kẹ ae ọwhọ nọ a rẹ rọ dawo utho ẹgba rai kpobi.

• Kpọ ovao ahwo bru Jihova. Dhesẹ oghẹrẹ nọ iwuhrẹ Ebaibol, ehri-izi Ebaibol gbe izi Ọghẹnẹ i ro dhesẹ iruemu-aghae Ọghẹnẹ gbe uyoyou riẹ via. Fiobọhọ kẹ enọ e be gaviezọ kẹ owhẹ na re a hai roro epanọ oware nọ a bi ru o te jọ Jihova oma gbe epanọ a re ro ru eva were iẹe.