Uwuhrẹ 50

Omodawọ Re A Nyate Udu Na

Eme o gwọlọ nọ who re ru?

Roro kpahe oghẹrẹ nọ ahwo a re rri ẹme nọ wha be ta kpahe na. Fiobọhọ kẹ ae wo oma-iroro gbe ọwhọ nọ a re ro si kẹle Ọghẹnẹ jẹ jọ egbẹnyusu riẹ.

FIKIEME U JE WUZOU?

Re a ru Jihova eva were, o gwọlọ nọ Ẹme Ọghẹnẹ o re wo owọ gaga evaọ idu ahwo na.

FIBA isẹri nọ who re se kẹ ahwo, o gwọlọ nọ whọ rẹ daoma nyate idu rai. Evaọ Ebaibol na, a re dhesẹ udu na hẹrioma no oware nọ otafe oma ohwo o rrọ. Udu ẹwoho na u dikihẹ kẹ oware nọ ohwo ọ rrọ evaọ obeva—oghẹrẹ nọ o re roro, eware nọ o re roro kpahe kpobi, oware nọ o bi ro roro kpahe ae, gbe epanọ iroro itieye na i bi kpomahọ owojẹ riẹ. Udu ẹwoho nana a rẹ kọ ubi uzẹme na fihọ. (Mat. 13:19) Yọ udu na ẹmeoyo kẹ Ọghẹnẹ o re no ze.—Itẹ 3:1; Rom 6:17.

Re ewuhrẹ ra ọ sae nya kodo te ere, tẹrovi itee enana: (1) Riẹ oware nọ u kpomahọ udu ọnọ ọ be gaviezọ k’owhẹ na. (2) Tuduhọ ahwo awọ re a wo ekwakwa nọ e rẹ kẹ erere, wọhọ uyoyou gbe ozodhẹ Ọghẹnẹ. (3) Tuduhọ ọnọ ọ be gaviezọ k’owhẹ na awọ re ọ kiẹ iroro obeva riẹ riwi re ọ sai ru Jihova eva were vọvọ.

Eroruiruo Orimuo. Eware nọ e soriẹ nọ ahwo a gbẹ te rọ jẹ uzẹme na rehọ họ e rrọ oghẹrẹ ovo ho. Who te bi ru obe uwuhrẹ Ebaibol, o sae gwọlọ nọ whọ ta oware jọ rọ kpọ eriwo omukpahe jọ vi jẹ fodẹ uzẹme jọ nọ u re nwene iroro ethọthọ nọ ọmọ-uwuhrẹ na o wo, hayo whọ sae kẹ imuẹro ọvo. Nọ oma ra nọ: ‘Kọ ohwo nana o vuhumu inọ wọhọ ohwo-akpọ ọye omariẹ o wo ẹgwọlọ abọ-ẹzi? Eme ọ rọwo? Eme ọ rọwo ho? Fikieme ọ rọ rọwo hayo siọ eware eyena? Kọ ọ gwọlọ obufihọ re ọ whaha isiuru jọ nọ e rẹ sae whaha iẹe ẹjẹrehọ ewha-iruo nọ i re no ẹriẹ uzẹme na ze?’

O lọhọ ẹsikpobi hi re a riẹ oware nọ o lẹliẹ ohwo wo orọwọ jọ. Itẹ 20:5 o ta nọ: “Iroro nọ e rọ eva ohwo e wọhọ edidi ame, rekọ ohwo nọ ọ rẹ riẹ otọ oware ọ rẹ rehọ iroro na via.” Orimuo họ ẹgba nọ a re ro vuhu oware nọ u vẹ te he mu. Onana o gwọlọ emamọ ẹromuhọ gbe uruemu ẹruọsa.

Orọnikọ unu ọvo a rẹ rọ ta ẹme he. Oghẹrẹ uzoẹme jọ o sae lẹliẹ ọmọ-uwuhrẹ na nwene ovao hayo nwene uvo riẹ. Whọ tẹ rọ ọyewọ, ababọ avro, whọ riẹ nọ enwene evaọ uruemu ọmọ ra o sai dhesẹ nọ ọ be j’owọ lele okpomahọ ọkpokpọ jọ evaọ uzuazọ. Who rri eka enana vo ho. E rrọ eka oware nọ o rrọ udu riẹ.

Enọ nọ a salọ ziezi e sai fiobọhọ k’owhẹ riẹ oware nọ o rrọ udu ohwo. Whọ sae nọ inọ: “Ẹvẹ who roro kpahe . . . ?” “Eme ọ k’owhẹ imuẹro nọ . . . ?” “Didi owọ whọ rẹ jẹ otẹrọnọ . . . ?” Ghele na, yọroma re whọ siọ enọ ba ẹrọfa ahwo ovao. Re whọ tẹ n’onọ ra, whọ sae rọ areghẹ muhọ nọ, “Kọ eva e te dh’owhẹ otẹrọnọ mẹ nọ inọ . . . ?” Ẹkiẹvia oware nọ o rrọ udu na yọ iruo omodawọ ogaga nọ whọ rẹ họrọ oma ru hu. Evaọ ẹsibuobu, o rẹ rehọ unuoke jọ nọ who re ro wo evaifihọ ohwo t’obọ taure ohwo na ọ sae ta eva riẹ k’owhẹ. Makọ ere na, whọ rẹ yọroma re ohwo na ọ seba eroro nọ whọ be n’enọ kpahe eware nọ i t’owhẹ hẹ.—1 Pita 4:15.

Oghẹrẹ nọ whọ rẹ j’owọ kpahe ẹme nọ who yo o gwọlọ orimuo re. Kareghẹhọ nọ ute ra họ re whọ riẹ iroro ahwo na re whọ sae riẹ ovuẹ Ebaibol nọ u ti duobọte ai. Gba oma ra re whọ siọ ẹthọthọ eriwo riẹ ba erovie via. Ukpoye, fiẹro h’otọ re whọ ruẹ iroro nọ e rọ emu eme riẹ. Whọ vẹ riẹ ẹme nọ whọ rẹ kpahe; yọ ọmọ-uwuhrẹ ra, nọ ọ tẹ riẹ nọ who wo otoriẹ ẹme riẹ na, o ti se ẹme nọ whọ be ta gboja viere.—Itẹ 16:23.

Whọ rẹ sae tuduhọ omomọvo j’owọ o tẹ make rọnọ whọ be t’ẹme kẹ ogbotu ologbo. Who te bi rri ahwo na ovao ziezi, bi muẹrohọ oghẹrẹ nọ ovao rai o rrọ, jẹ be nọ enọ nọ e rẹ lẹliẹ ohwo roro nọ i du gwọlọ iyo ho, whọ sae te riẹ oware nọ o rrọ iroro enọ e be gaviezọ k’owhẹ kpahe ẹme nọ whọ be ta na. Whọ tẹ riẹ ogbotu ra ziezi, roro kpahe iyero rai. Roro kpahe eriwo ukoko na kpobi nọ who bi lele ai jiroro no Ẹme Ọghẹnẹ ze na.—Gal. 6:18.

Ẹkpare Iroro nọ E rẹ Kẹ Erere. Whọ tẹ dina riẹ oware nọ ohwo ọ rọwo no, oware nọ ọ rọwo ho, gbe oware nọ o soriẹ ze, whọ rẹ sae jọ etẹe mu ẹme họ ẹta. Nọ ọ kparoma no, Jesu o duobọte idu ilele riẹ ẹkwoma ‘Ikereakere nọ o dhesẹ’ kẹ ae kie kpahe eware nọ e via kẹle na. (Luk 24:32) Whọ rẹ jẹ daoma fi ọjẹhọ họ oware nọ ohwo ọ ruẹ no, oware nọ o rọ isiuru riẹ, gbe oware nọ ọ be ruẹ evaọ Ẹme Ọghẹnẹ. Ẹme na o ti duobọte udu ọmọ-uwuhrẹ na ziezi nọ o te vuhumu vevẹ nọ: “Onana họ UZẸME NA!”

Who te fiẹgba họ ewoma Jihova, uyoyou riẹ, aruoriwo riẹ, gbe ẹgbagba idhere riẹ, yọ who bi fiobọhọ kẹ enọ who bi wuhrẹ na bọ uyoyou rai kẹ Ọghẹnẹ. Whọ tẹ rehọ oke dhesẹ emamọ ekwakwa nọ Ọghẹnẹ ọ be jọ oma rai ruẹ wọhọ omomọvo kẹ enọ e be gaviezọ k’owhẹ, yọ whọ be kẹ ae ẹjiroro nọ a rẹ rọ rọwo nnọ o lọhọ re ohwo o wo usu kugbei. A rẹ sai ru onana gba ẹkwoma eroro kpahe ikere wọhọ Olezi 139:1-3, Luk 21:1-4, gbe Jọn 6:44 gbe ẹkwoma obọ nọ who re fihọ kẹ enọ e be gaviezọ k’owhẹ re a wo ovuhumuo epanọ Jihova ọ rẹ rọ uyoyou si kẹle idibo ẹrọwọ riẹ te. (Rom 8:38, 39) Ru ei vẹ nọ Jihova o bi rri vrẹ iruthọ mai jẹ be ruẹ eyero uzuazọ mai kpobi, ọwhọ mai kẹ egagọ efuafo, uyoyou mai kẹ odẹ riẹ. (2 Irv. 19:2, 3; Hib. 6:10) Ọ be kareghẹhọ oware nọ o mae jọ oma mai kawo kpobi, yọ evaọ edhere igbunu o ti zihe ‘enọ e rọ uki ekareghẹhọ kpobi’ ziọ uzuazọ. (Jọn 5:28, 29; Luk 12:6, 7) Nọ a ma ahwo-akpọ evaọ uwoho gbe ithatho Ọghẹnẹ na, ẹsibuobu ẹmeọta kpahe ekwakwa riẹ o re duobọte udu ohwo.—Emu. 1:27.

A sai je duobọte ohwo udu evaọ okenọ ohwo na o te wuhrẹ re o rri amọfa wọhọ epanọ Jihova o re rri rai. O rrọ oware iroro inọ otẹrọnọ Ọghẹnẹ mai o re dhesẹ ẹwo kẹ omai wọhọ omomọvo, koyehọ ọye omariẹ o re dhesẹ ororokẹ rọkẹ amọfa epọvo na re, makọ oghẹrẹ uyere-akpọ rai, orẹwho, hayo uyẹ rai. (Iruẹru 10:34, 35) Ohwo o te wo otoriẹ utioye na no, o re wo uvi ehri Ikereakere nọ o re ro si egrẹ gbe omukpahe no udu riẹ. Onana u re fiobọhọ kẹe yerikugbe amọfa avọ udhedhẹ nọ o bi wuhrẹ re ọ wha oreva Ọghẹnẹ haro na.

Ozodhẹ Ọghẹnẹ yọ iroro efa nọ who re fiobọhọ kẹ ahwo wo. (Ol. 111:10; Evia. 14:6, 7) Adhẹẹ odidi, hayo ozodhẹ Ọghẹnẹ utioye na, o rẹ sae wọ ohwo ru oware nọ ọ sae rọ ẹgba obọ riẹ ọvo ru hu. Ẹkwoma ẹmeọta kpahe iruẹru igbunu Jihova gbe uyoyou ẹwo ulogbo riẹ, whọ rẹ sai fiobọhọ kẹ amọfa wo emamọ ozodhẹ kpahe eva nọ a re ru dhae.—Ol. 66:5; Jeri. 32:40.

Ru re enọ e be gaviezọ k’owhẹ a riẹ nọ uruemu rai u muẹme kẹ Jihova. O wo oma-iroro, yọ ẹkwoma oghẹrẹ owọ nọ ma jẹ kẹ ọkpọvio riẹ, ma rẹ sai ru ei vioja hayo ghọghọ. (Ol. 78:40-42) Dhesẹ kẹ ahwo oware nọ o soriẹ nọ uruemu rai omomọvo u re ro fi ẹhẹriẹ họ uyo nọ Ọghẹnẹ ọ rẹ kẹ Setan evaọ ọkparesuọ riẹ.—Itẹ 27:11.

Fiobọhọ kẹ ogbotu ra ruẹ nọ ẹnyate itee Ọghẹnẹ o rẹ kẹ ae erere. (Aiz. 48:17) Edhere jọ nọ a rẹ sai ro ru onana họ ẹkwoma edhesẹ ebẹbẹ ugboma gbe erọ iroro nọ i re no ẹsiọ areghẹ Ọghẹnẹ ze, makọ evaọ ubroke dede. Dhesẹ epanọ uzioraha u re ro ru omai thabọ no Ọghẹnẹ, mi amọfa uvẹ nọ a re ro wuhrẹ uzẹme na mi omai, hayo mi ai ẹkẹ-uvẹ obọ rai. (1 Tẹs. 4:6) Fiobọhọ kẹ ogbotu ra rri eghale nọ a be reawere rai enẹna fiki ekoko izi Ọghẹnẹ ghaghae. Bọ ovuhumuo rai ga kẹ uzẹme na inọ ẹnya evaọ idhere ikiẹrẹe Jihova o rẹ kwa okpẹtu buobu no omai uzou. Ohwo o te fi ẹrọwọ họ areghẹ idhere Ọghẹnẹ no, oware nọ o wọso idhere na kpobi u re tu ei oma. (Ol. 119:104) Ọ rẹ ruẹ ẹmeoyo, orọnikọ wọhọ owha ha, rekọ wọhọ edhere nọ ma re ro dhesẹ egagọ uyoyou kẹ Jihova wọhọ ohwo.

Obufihọ kẹ Amọfa re A Kiẹ Oma Rai Riwi. Re a ruẹse rro evaọ abọ-ẹzi, o gwọlọ nọ ahwo a re muẹrohotọ gaga kẹ oware nọ o rrọ udu rai. Dhesẹ epanọ Ebaibol na ọ sai ro fiobọhọ kẹ ai ru onana.

Fiobọhọ kẹ enọ e be gaviezọ k’owhẹ vuhumu nọ orọnikọ ijaje, ehrẹ, eviavia ikuigbe, gbe eruẹaruẹ ọvo e vọ Ebaibol na ha. O dhesẹ iroro Ọghẹnẹ via re. Eva Jemis 1:22-25, a rehọ Ẹme Ọghẹnẹ dhesẹ ughẹgbe. Ẹkwoma owọ nọ ma jẹ kẹ ẹme nọ ọ ta gbe oghẹrẹ nọ Jihova ọ be rọ wha ẹjiroro riẹ haro, ovuẹ Ebaibol na u re dhesẹ oware nọ o rrọ udu mai via. Fikiere o re dhesẹ epanọ Ọghẹnẹ, ọnọ “ọ rẹ dawo ibiudu” na, o bi rri omai. (Itẹ 17:3) Tuduhọ enọ e be gaviezọ k’owhẹ awọ re a kareghẹhọ onana. Tuduhọ ae re a roro kpahe oware nọ Ọghẹnẹ ọ rawo fihọ Ebaibol k’omai na gbe inwene nọ u fo nọ a rẹ jọ uzuazọ rai ru re a sai ru ei eva were viere. Fiobọhọ kẹ ae rri isase Ebaibol wọhọ edhere nọ a rẹ rọ riẹ “ẹjiroro obọ eva” Jihova re a sai yoẹme kẹ Ọghẹnẹ evaọ eruo inwene nọ i fo.—Hib. 4:12; Rom 15:4.

Emọ-uwuhrẹ Ebaibol jọ e sae gwọlọ j’owọ kpahe oware nọ a bi wuhrẹ, dede na a rẹ ruawa kpahe oware nọ amọfa a ti roro. Ẹsejọhọ a bi lele isiuru iwo egaga jọ muabọ. Hayo ẹsejọ a be gwọlọ idhere ehruehru jọ nọ a rẹ rọ gọ Ọghẹnẹ yọ a gbẹ dada abọ mu iruemu akpọ na. Dhesẹ enwoma iroro agbava itieye na. (1 Iv. 18:21) Tuduhọ ae awọ re a lẹ se Ọghẹnẹ re ọ kiẹ je ru idu rai fo.—Ol. 26:2; 139:23, 24.

Dhesẹ kẹ ae nọ Jihova o wo otoriẹ omodawọ rai gbe nọ Ebaibol na o dhesẹ oware nọ o be via kẹ ae na. (Rom 7:22, 23) Fiobọhọ kẹ ae yọroma re a siọ uvẹ ba ẹrọkẹ isiuru udu sebaẹgba na nọ u re su ai.—Itẹ 3:5, 6; 28:26; Jeri. 17:9, 10.

Tuduhọ omomọvo awọ re ọ kiẹ iroro nọ o bi ro ru eware riwi. Wuhrẹ iẹe re ọ nọ oma riẹ nọ: ‘Fikieme mẹ jẹ gwọlọ ru onana? Kọ u ti dhesẹ kẹ Jihova nọ me ghine wo ovuhumuo kẹ eware kpobi nọ o ru k’omẹ no?’ Daoma re whọ bọ imuẹro na inọ usu ọjẹrehọ kugbe Jihova họ oware nọ o mae ghare kpobi nọ ohwo ọ rẹ sai wo t’obọ.

Fiobọhọ kẹ ogbotu ra riẹ epanọ u wuzou te re a rehọ ‘udu rai kpobi’ gọ Jihova. (Luk 10:27) Onana u dhesẹ nọ a re ru re oghẹrẹ iroro rai kpobi, isiuru rai, gbe ẹgwọlọ rai e rọwokugbe idhere Jihova. Fikiere wuhrẹ enọ e be gaviezọ k’owhẹ re a kiẹ riwi orọnikọ oware nọ a bi ru ọvo ho rekọ gbe epanọ a bi roro kpahe itee Ọghẹnẹ gbe ẹjiroro nọ a be rọ gọe. (Ol. 37:4) Nọ emọ-uwuhrẹ ra a be ruẹ eria nọ u fo nọ a re jo ru inwene na, tuduhọ ae awọ re a lẹ se Jihova inọ: “Koko udu mẹ họ re mẹ dhẹozọ odẹ ra.”—Ol. 86:11.

Nọ ọmọ-uwuhrẹ ọ tẹ bọ usu okpekpe kugbe Jihova, o ti yoẹme kẹ Ọghẹnẹ fiki ẹrọwọ orọnikọ fikinọ whọ be tuduhọ iẹe awọ ọvo ho. Ọ vẹ te rọ udu obọ riẹ “wuhrẹ onọ o rẹ were Ọnowo na.” (Ẹf. 5:10; Fil. 2:12) Ẹmeoyo otiọye na nọ o no udu ze na o rẹ were Jihova.—Itẹ 23:15.

Kareghẹhọ nọ Jihova họ ọnọ ọ rẹ kiẹ idu riwi je si ahwo ziọ usu kugbei. (Itẹ 21:2; Jọn 6:44) Ẹkẹ-abọ mai họ ma re yoẹme. (1 Kọr. 3:9) O wọhọ ẹsenọ ‘Ọghẹnẹ ọ be rọ omai t’ẹme.’ (2 Kọr. 5:20; Iruẹru 16:14) Jihova ọ rẹ gba uvumọ ohwo họ re ọ jẹ uzẹme na rehọ họ, rekọ nọ ma be rọ Ikereakere na ruiruo na, ọ sai ru enọ e be gaviezọ k’omai vuhumu nọ oware nọ a bi yo na họ uyo kẹ enọ rai—hayo elẹ rai. Rehọ ẹro otiọnana rri uvẹ kpobi nọ who wo nọ who bi ro wuhrẹ amọfa, jẹ yare Jihova kẹ ọkpọvio gbe obufihọ.—1 Irv. 29:18, 19; Ẹf. 1:16-18.

EPANỌ A RẸ RỌ NYAHARO

Dhesẹ uvi uyoyou.

Vuhu oware nọ u kpomahọ udu ọnọ ọ be gaviezọ k’owhẹ na mu.

Fiẹgba họ ekwakwa igbunu Jihova.

Fiobọhọ kẹ enọ e be gaviezọ k’owhẹ riẹ epanọ a rẹ rọ kiẹ je ru iroro rai fo.

ORIA IRUO: (1) Se Matiu 6:21 jẹ kiẹ epanọ ikere nana i ro kie kpahe uzuazọ ra. Je se owọ avọ 19 gbe orọ avọ 20, je roro kpahe inwene nọ udu ra o wọ owhẹ nọ who ru. (2) Kiẹ oware nọ o wọ owhẹ muọ Jihova họ ẹgọ. Eme ọ be wọ owhẹ enẹna? Ọwhọ vẹ nọ ọ rẹ were Jihova whọ gwọlọ bọ ga?