Epanọ Ma re ro Duobọte Udu Ahwo nọ Ma bi Wuhrẹ
1. Ẹvẹ eme Jesu e jọ ahwo nọ e jẹ gaviezọ kẹe oma?
1 Jesu Kristi ọ ta eme nọ i te ahwo nọ a jẹ gaviezọ kẹe udu. Evaọ ẹdẹjọ, nọ ọ fa otọ Ikereakere na vevẹ kẹ ilele riẹ no, eme na i te “duobọte” ai udu gaga. (Luk 24:32) Re ohwo o yoẹme kẹ Ọghẹnẹ, obọ udu na u re no ze. Nọ o rrọ ere na, ẹvẹ ma sae rọ ta ẹme nọ o re duobọte ahwo nọ ma bi wuhrẹ udu re a sai ru inwene evaọ uzuazọ rai?—Rom 6:17.
2. Fikieme o rọ gwọlọ onaa gbe orimuo re ma sai te udu ohwo?
2 Ta Ẹme avọ Onaa je Wo Orimuo: Ahwo buobu a re ru inwene he nọ whọ tẹ ta kẹ ae ọvo nọ oware nọ a bi ru o thọ. Uzẹme riẹ họ, who te bi se ikere buobu ro dhesẹ kẹ ae nọ eware nọ a rọwo e thọ, o sai ru nọ a rẹ rọ ruẹ owhẹ dhẹ. Re ẹme mai ọ sai te ahwo na udu, ma rẹ daoma riẹ oware nọ o wha riẹ ze nọ a rọ rọwo eware jọ hayo wo uruemu jọ. Ma tẹ rọ onaa nọ ohwo na enọ, o te lẹliẹe ta oware nọ o riẹe udu via. (Itẹ 20:5) Ma tẹ riẹ oware nọ o riẹe udu, ẹsiẹe ma sae rọ riẹ oria Ebaibol nọ u re tei udu. Fikiere, daoma riẹ oghẹrẹ ohwo nọ ọ rrọ je wo odiri. (Itẹ 25:15) Kareghẹhọ nọ ahwo kpobi a re wo ẹnyaharo oghẹrẹ ovona ha. Who bru okpakpa ha, nọ oke o be nyaharo na, ẹzi Jihova o ti fiobọhọ kẹ ohwo na nwene iroro gbe uruemu riẹ.—Mak 4:26-29.
3. Ẹvẹ ma sai ro fiobọhọ kẹ ahwo nọ ma bi wuhrẹ wo emamọ uruemu?
3 Fiobọhọ kẹ Ae Wo Emamọ Uruemu: Eria Ebaibol nọ i dhesẹ ewoma gbe uyoyou Jihova via i re fiobọhọ kẹ ahwo nọ ma bi wuhrẹ wo emamọ uruemu. Ma rẹ sae rehọ eria Ebaibol wọhọ Olezi 139:1-4 hayo Luk 12:6, 7 ro dhesẹ epanọ Jihova o you omai omomọvo te. Nọ uyoyou nọ Jihova o wo kẹ omai u te te ohwo na udu, u re ru nọ ọ rẹ rọ gwọlọ gọ Jihova je you rie vi epaọ anwẹdẹ. (Rom 5:6-8; 1 Jọn 4:19) U te no ere no, nọ a tẹ riẹ nọ uruemu rai o sae lẹliẹ eva were Jihova hayo ru eva dhae, o te lẹliẹ ae ru inwene nọ e rẹ were iẹe jẹ wha orro sei.—Ol. 78:40, 41; Itẹ 23:15.
4. Ẹvẹ ma sai ro dhesẹ nọ ma be gba ahwo họ ru inwene he?
4 Jihova ọ rẹ gba ohwo ọvo họ koko izi riẹ hẹ. Ukpoye, o re fiobọhọ kẹ ahwo kpobi ruẹ irere nọ i re noi ze nọ a te bi koko izi riẹ. (Aiz. 48:17, 18) Nọ ma te bi wuhrẹ ahwo evaọ oghẹrẹ nọ ae ọvo a rẹ rọ jiroro kẹ omobọ rai, yọ ma be rọ aro kele Jihova. Nọ ohwo na ọvo ọ tẹ ruẹ nọ u fo nọ o re gine ru inwene, ẹsiẹe o re sei gboja. (Rom 12:2) Onana u re je ru ohwo na si kẹle Jihova ziezi, Ọnọ ọ rẹ kiẹ “ibiudu” riwi na.—Itẹ 17:3.