Uwuhrẹ 30

Isiuru Nọ A Re Dhesẹ Kẹ Ohwo Ọdekọ

Eme o gwọlọ nọ who re ru?

Kẹ imuẹro nnọ who wo ọdawẹ kpahe iroro ahwo ọdekọ na gbe nọ who wo ọdawẹ kpahe ewoma rai.

FIKIEME U JE WUZOU?

Onana yọ edhere jọ nọ ma sae rọ raro kele uyoyou nọ Jihova o dhesẹ, yọ o sai fiobọhọ k’omai nyate udu ohwo.

MA TẸ be ghale uzẹme Ebaibol na kugbe amọfa, u fo re ma ru vi eriariẹ nọ ma rẹ rehọ kẹ iroro na. Ma re duobọte udu na. Edhere jọ nọ ma rẹ sai ro ru onana họ ẹkwoma isiuru nọ ma re dhesẹ kẹ enọ e be gaviezọ k’omai na. A rẹ sai dhesẹ isiuru itieye na evaọ idhere sa-sa.

Roro Kpahe Eriwo Enọ E be Gaviezọ k’Owhẹ. Pọl ukọ na o roro kpahe uyerakpọ gbe iroro enọ e jẹ gaviezọ kẹe. O ru rie vevẹ nọ: “Me ru oma mẹ wọhọ ohwo Ju re mẹ ruẹse wo ahwo Ju; me ru oma mẹ wọhọ ọ nọ ọ rọ otọ uzi—dede yọ omẹ rọ otọ uzi hi—re mẹ ruẹse wo e nọ e rọ otọ uzi. Me ru oma mẹ wọhọ ọ nọ ọ rọ otọ uzi hi rọ kẹ e nọ e rọ otọ uzi hi—mẹ rọ ababọ uzi Ọghẹnẹ hẹ nọ omẹ rọ otọ uzi Kristi na—re mẹ ruẹse wo ahwo nọ a rọ otọ uzi hi. Rọ kẹ otu eyẹlẹ me zihe ruọ ọyẹlẹ re mẹ ruẹse si eyẹlẹ rehọ. Me zihe ruọ oghẹrẹ eware kẹ ahwo kpobi, re mẹ ruẹse siwi ahwo jọ. Fiki usiuwoma na me ro ru eware enana kpobi re mẹ sai ru ẹkẹ abọ mẹ eva eva riẹ.” (1 Kọr. 9:20-23) Ẹvẹ ma sai ro “zihe ruọ oghẹrẹ eware kẹ ahwo kpobi” nẹnẹ?

Who te wo uvẹ nọ who re ro muẹrohọ amọfa, makọ evaọ ubroke, taure whọ tẹ te t’ẹme kẹ ae, whọ sai muẹrohọ eware nọ i dhesẹ isiuru gbe iyero rai via. Kọ whọ sae rehọ ere riẹ akiruo rai? Kọ whọ ruẹ eware nọ i dhesẹ erọwọ egagọ rai via? Kọ whọ ruẹ eware nọ i dhesẹ oghẹrẹ uyero uviuwou rai via? Fiki oware nọ who muẹrohọ, kọ whọ sai nwene ẹmeọta ra re who ru ei were enọ e be gaviezọ k’owhẹ na viere?

Re who ru ẹmeọta ra siuru o gwọlọ nọ who re roro haro kpahe oghẹrẹ nọ who ti ro mu ẹmeọta họ kugbe ahwo evaọ ẹkwotọ ra. Evaọ eria jọ, onana o kẹre te enọ e kwa no erẹwho efa ze. Ahwo otiọye na a tẹ be rria ẹkwotọ ra, kọ who duku emamọ edhere nọ who re ro se isẹri kẹ ai no? Nọ o rọ oreva Ọghẹnẹ “re ahwo kpobi a wo usiwo, re a ze te riẹ uzẹme na,” ru ei fihọ ute ra re whọ rọ edhere isiuru rehọ ovuẹ Uvie na kẹ ahwo kpobi nọ whọ nyaku.—1 Tim. 2:4.

Gaviezọ Ziezi. Dede nọ Jihova ọ riẹ eware kpobi, ọ rẹ gaviezọ kẹ amọfa. Makaya ọruẹaro na ọ jọ eruẹaruẹ ruẹ Jihova nọ ọ be tuduhọ enjẹle na re a ta ẹjiroro rai evaọ ẹme jọ nọ ọ roma via. Ọghẹnẹ ọ tẹ kẹ ẹnjẹle jọ uvẹ re o fi ẹjiroro nọ ẹnjẹle na ọ rọ ze na h’iruo. (1 Iv. 22:19-22) Okenọ Abraham o dhesẹ ọdawẹ kpahe ọraha nọ o ti te Sodọm, Jihova avọ ẹwo ọ kẹ riẹ uvẹ re ọ ta iroro riẹ. (Emu. 18:23-33) Evaọ odibọgba mai, ẹvẹ ma sae rọ raro kele oriruo Jihova evaọ ezọgaviẹ?

Tuduhọ amọfa awọ re a ta iroro udu rai. Nọ onọ nọ u fo re who dhizu ziezi kẹ uyo rai. Gaviezọ ziezi. Ezọ nọ whọ rẹ gaviẹ kẹ ae ziezi o rẹ tuduhọ ae awọ re a ta iroro-eva rai. Otẹrọnọ ẹme nọ a ta o dhesẹ oware jọ kpahe isiuru rai, rọ areghẹ n’onọ na haro. Whọ n’enọ bu hrọ họ, rekọ daoma riẹ ae viere. Jiri ai kẹ iroro rai, otẹrọnọ whọ sai ghine ru ere no eva ze. Whọ gbẹ make rọwo kugbe ẹme rai hi, who bru ẹme na dhe ai unu hu.—Kọl. 4:6.

Rekọ u fo re ma yọroma re isiuru nọ ma wo kẹ ahwo e gbẹ vrẹta ha. Fikinọ ma wo isiuru kpahe amọfa o k’omai udu nọ ma rẹ rọ kiẹ kpahe eware idhere rai hi. (1 Pita 4:15) U fo re ma yọroma re ohwo ẹba sa ọ siọ isiuru nọ ma bi dhesẹ ba erri thọthọ. Nọ o rọnọ oware nọ a re rri fihọ umuo isiuru nọ u fo kẹ amọfa u re wo ohẹriẹ no oria jọ ruọ ofa, tube no ohwo ruọ ohwo na, u re fo re ma muẹro h’otọ ziezi.—Luk 6:31.

Omaruẹrẹhọ yọ obufihọ jọ rọkẹ emamọ ezọgaviẹ. Ovuẹ mai u te vẹ omai ẹro, o rẹ lẹliẹ udu kie omai vi jẹ sae gaviezọ kẹ amọfa ziezi. Onana o rẹ lẹliẹ udu kie ai vi o vẹ jẹ lẹliẹ ae gwọlọ t’ẹme kugbe omai viere.

Ma re dhesẹ ọghọ kẹ amọfa ẹkwoma ezọ nọ ma rẹ gaviẹ kẹ ae. (Rom 12:10) O rẹ kẹ imuẹro nnọ ma se iroro rai gboja. O sae tubẹ lẹliẹ ae gaviezọ kẹ ẹme nọ ma be ta viere. Fikiere avọ uvi ẹjiroro, Ẹme Ọghẹnẹ ọ hrẹ omai nọ ma “yo vẹrẹ, [ma] vẹ rọ ẹrera ruọ ẹme-ọta.”—Jem. 1:19.

Fiobọhọ kẹ Amọfa Nyaharo. Ọdawẹ kẹ amọfa o ti ru omai hai roro kpahe enọ i dhesẹ isiuru re ma wariẹ zihe bru ai re ma ghale uzẹme Ebaibol nọ e te mai ru ẹgwọlọ rai gba kẹ ae. Whọ tẹ be m’oma iweze efa, roro oware nọ whọ riẹ kpahe ae evaọ iweze nọ i kpo na. Ruẹrẹ evuẹ họ nọ e t’ẹme kpahe uzoẹme nọ o rọ ọdawẹ kẹ ae. Dhesẹ erere ovuẹ na, fiobọhọ kẹ ae ruẹ epanọ a sai ro wo erere no oware nọ a bi wuhrẹ na ze.—Aiz. 48:17.

Otẹrọnọ ọnọ ọ be gaviezọ k’owhẹ na ọ fodẹ uyero hayo ebẹbẹ jọ nọ i bi kpokpo iei, rehọ onana wọhọ uvẹ obọdẹ nọ whọ rẹ rọ ghale emamọ usi na kugbei. Nya lele oriruo Jesu, ọnọ ọ ruẹrẹ oma kpahe ẹsikpobi re ọ sasa enọ e rọ uweri oma. (Mak 6:31-34) Whaha odawọ ifue ekpakpata hayo ohrẹ ehruehru nọ whọ rẹ kẹ. Onana o sae lẹliẹ ohwo na roro nọ whọ kare uvi ọdawẹ. Ukpoye, dhesẹ ororokẹ. (1 Pita 3:8) Kẹsena whọ vẹ jọ ebe nọ a kporo no Ebaibol ze ru ekiakiẹ, whọ vẹ ghale evuẹ ọbọga kugbei nọ i re fiobọhọ kẹ ohwo na yeri kugbe ẹbẹbẹ na. Dede na, ọdawẹ oyoyou kẹ ọnọ ọ be gaviezọ k’owhẹ na ọ rẹ whaha owhẹ ẹvaha ẹme idhere nọ ọ ta k’owhẹ, ajokpanọ emamọ ẹjiroro jọ ọ riẹ nọ who re ro ru ere.—Itẹ 25:9.

Ma rẹ mai dhesẹ isiuru kẹ enọ ma bi wuhrẹ Ebaibol kugbe. Roro ziezi kpahe ẹgwọlọ ọmọ-uwuhrẹ ọvuọvo avọ oma olẹ, who ve je wo ẹgwọlọ eyena họ iroro rọ ruẹrẹ oma kpahe kẹ uwuhrẹ na. Nọ omara nọ, ‘Eme u fo nọ o re ru enẹna re o ru ẹnyaharo abọ-ẹzi viere?’ Rọ uyoyou fiobọhọ kẹ ọmọ-uwuhrẹ na vuhu ẹme nọ Ebaibol na gbe ebe ‘ọrigbo nọ o wo ẹrọwọ avọ areghẹ na’ e ta kpahe ẹme na. (Mat. 24:45) Ẹsejọ, re who ru ẹme na vẹ ọvo u te he. O sae gwọlọ nọ who re dhesẹ kẹ ọmọ-uwuhrẹ na epanọ o re ro fi ehri-uzi Ebaibol jọ h’iruo, ghine ru oware jọ kugbei nọ u re dhesẹ efihiruo riẹ via.—Jọn 13:1-15.

O gwọlọ owowa gbe ẹromuhotọ evaọ okenọ who te bi fiobọhọ kẹ amọfa kpọ izuazọ rai rọwokugbe itee Jihova. Uyerakpọ gbe ẹgba nọ ahwo a wo i wo ohẹriẹ, yọ ẹnyaharo rai ọ rẹ jọ epọvo na ha. Rẹro oware nọ a rẹ sai ru ọvo mi ai. (Fil. 4:5) Who gele ai re a ru inwene evaọ izuazọ rai hi. Kẹ Ẹme Ọghẹnẹ gbe ẹzi riẹ uvẹ re ọ wọ ae. Jihova ọ gwọlọ re ahwo a rọ udu unevaze gọe, orọnikọ ọgbahọ họ. (Ol. 110:3) Evaọ oria nọ a rẹ jọ jiroro obọ rai, whọ ta epanọ whọ hai ru kẹ ae he, amọfa a tẹ make gwọlọ riẹ epanọ whọ hai ru, yọroma re whọ siọ iroro ba ẹjẹ kẹ ae.—Gal. 6:5.

Kẹ Obufihọ Abọ-Iwo. Dede nọ Jesu ọ mai wo ọdawẹ kpahe ewoma abọ-ẹzi enọ e jẹ gaviezọ kẹe, o wo ọdawẹ kpahe ẹgwọlọ efa rai re. (Mat. 15:32) Ma gbẹ maki fe he, idhere efa buobu e riẹ nọ ma rẹ sai ro fiobọhọ.

Isiuru kẹ amọfa e rẹ wọ omai dhesẹ ororokẹ. Wọhọ oriruo, otẹrọnọ ohwo nọ ọ be gaviezọ k’owhẹ o bi yo ẹme ra te he fiki oso nọ ọ be rrọ, wha go no etẹe hayo wha va ẹmeọta na kpohọ oke ofa. Otẹrọnọ oke nọ whọ rọ nya u kiehọ iẹe oma ha, ta nọ who ti zihe evaọ oke ofa. Otẹrọnọ ọrivẹ ra hayo ohwo nọ o dhesẹ isiuru ọ be mọ hayo ọ rọ ẹsipito, dhesẹ ororokẹ ra ẹkwoma ekade hayo ileta ekpẹkpẹe nọ who re vi sei hayo eweze nọ who re weze bru ei. U te fo, whọ sai there ẹmẹbẹ jọ sei hayo ru oware ẹwo ofa jọ.

Nọ emọ-uwuhrẹ Ebaibol a be nyaharo na, oma o sae dina jọ rae ọkọkora fikinọ a gbẹ be nyusu kugbe egbẹnyusu anwae rai hi. Mu usu kugbe ai. Nọ wha te ku uwuhrẹ Ebaibol họ no jegbe evaọ oke ofa kpobi, rehọ oke lele ae t’ẹme. Tuduhọ ae awọ re a bọ emamọ usu. (Itẹ 13:20) Fiobọhọ kẹ ae kpohọ iwuhrẹ Ileleikristi. Keria kugbe ai evaọ iwuhrẹ na, je fiobọhọ kẹ ae rẹrote emọ rai re ahwo kpobi a sai wo erere vọvọ viere no ewuhrẹ na ze.

Dhesẹ Uvi Isiuru. Edhesẹ isiuru kẹ ohwo o rọ oware nọ a re wuhrẹ hẹ, rekọ o rẹ jọ ẹkoma ohwo nọ u re no udu na ze. Epanọ isiuru nọ ma wo kẹ amọfa i diwi te u re dhesẹ oma via evaọ idhere buobu. U re dhesẹ oma via evaọ oghẹrẹ nọ ma rẹ gaviezọ gbe ẹme nọ ma rẹ ta. U re dhesẹ oma via evaọ ẹwo gbe ororokẹ nọ ma re dhesẹ kẹ amọfa. Ma gbẹ maki ru uvumọ oware hayo ta uvumọ ẹme he, o rẹ jọ uruemu gbe ovao mai dhesẹ oma via. Ma tẹ be ghinẹ daezọ amọfa, a te rue riẹ.

Ẹjiroro nọ ọ mae rro nọ ma je dhesẹ uvi isiuru kẹ amọfa họ ẹkwoma ere oruo, ma rẹ raro kele uyoyou gbe ohrọ Ọsẹ obọ odhiwu mai. Onana u re fiobọhọ si enọ e be gaviezọ k’omai kẹle Jihova jẹ kẹle ovuẹ nọ ọ k’omai nọ ma whowho na. Fikiere, nọ whọ be ghale emamọ usi na, daoma fiẹro họ, orọnikọ “ifowe oma obọ [ra] ọvo ho, rekọ ifowe amọfa re.”—Fil. 2:4.

EPANỌ A RE RO DHESẸ UVI ISIURU

Gaviezọ evaọ okenọ ohwo ọdekọ ọ tẹ be t’ẹme. Yere iei kẹ iroro-eva riẹ nọ ọ ta via. Nọ enọ re whọ sai wo otoriẹ iroro riẹ vevẹ viere.

Roro kpahe ohwo na evaọ okenọ wha tẹ t’ẹme no. Kaki zihe bru ohwo na.

Dhesẹ izẹme Ebaibol nọ i duobọhọ ẹgwọlọ riẹ dẹẹ.

Ru eware ro fiobọhọ kẹe. Roro kpahe ẹgwọlọ obọnana gbe erọ obaro.

ORIA IRUO: (1) Taure ewuhrẹ ukoko o te ti muhọ, dhesẹ isiuru kẹ ohwo jọ nọ ọ rọ etẹe. Ru vi uyere nọ who re yere iei. Daoma riẹ ohwo na viere. Dhesẹ nọ whọ be daezọ. Ru onana fihọ uruemu. (2) Evaọ odibọgba na, dhesẹ isiuru kẹ ohwo jọ nọ whọ nyaku. Ru vi isẹri nọ who re se. Daoma riẹ ohwo na. Nwene ẹme nọ whọ rẹ ta gbe eware nọ who re ru lele eware nọ who wuhrẹ kpahe ohwo na. Hae gwọlọ uvẹ nọ who re ro ru onana.