Fi Obọ họ kẹ Amọfa re ‘A Yoẹme No Eva Rai Ze’
1 O gwọlọ ẹmeoyo re a sae gọ Jihova avọ ọjẹrehọ. (Izie. 12:28; 1 Pita 1:14-16) Kẹle na, ẹdhoguo obrukpe Ọghẹnẹ o ti te “enọ e riẹ Ọghẹnẹ hẹ, gbe enọ e kezọ usiuwoma” na ha. (2 Tẹs. 1:8) Ẹvẹ ma sai ro fiobọhọ kẹ amọfa re ‘a yoẹme no eva rai ze’ kẹ iwuhrẹ Ẹme Ọghẹnẹ?—Rom 6:17.
2 Ẹkwoma Obọ nọ Ma re Fihọ kẹ Ae Wo Ẹrọwọ gbe Uyoyou: Evaọ Ikereakere na, a rehọ ẹmeoyo ruiruo kpekpekpe kugbe ẹrọwọ. Pọl ukọ na ọ ta kpahe ‘epa ujaje Ọghẹnẹ bẹdẹ bẹdẹ, re a rehọ ae ze orọwọ gbe ẹmeoyo.’ (Rom 16:26) Ahwo Hibru uzou 11 u dhesẹ iriruo ahwo ẹrọwọ buobu, nọ ibuobu rai i kpomahọ epanọ a ro ru lele oreva Jihova nọ o dhesẹ via. (Hib. 11:7, 8, 17) Eva abọ ọdekọ riẹ, a dhesẹ aghẹmeeyo gbe ababọ ẹrọwọ inọ i wobọ kugbe. (Jọn 3:36; Hib. 3:18, 19) U fo nọ ma re wo ona evaọ eroruiruo Ẹme Ọghẹnẹ re ma sai fiobọhọ kẹ amọfa wo oghẹrẹ ẹrọwọ nọ ọ rẹ wha ẹmeoyo ze.—2 Tim. 2:15; Jem. 2:14, 17.
3 A dhesẹ ẹmeoyo inọ u wobọ kugbe uyoyou rọkẹ Ọghẹnẹ re. (Izie. 5:10; 11:1, 22; 30:16) Enẹ 1 Jọn 5:3 o ta nọ: ‘Uyoyou Ọghẹnẹ ona, nnọ ma re koko ijaje riẹ. Whaọ ijaje riẹ e rrọ owha ogbẹgbẹdẹ hẹ.’ Ẹvẹ ma sai ro fiobọhọ kẹ emọ-uwuhrẹ Ebaibol re a wo uyoyou kẹ Jihova? Eva etoke uwuhrẹ na, gwọlọ uvẹ nọ whọ rẹ rọ bọ ovuhumuo rai kẹ ekwakwa Jihova. Hae ta iroro eva ra kpahe Ọghẹnẹ via. Fi obọ họ kẹ ọmọ-uwuhrẹ na roro kpahe epanọ o re ro wo usu okpekpe kugbe Jihova. Maero, uyoyou nọ ma wo kẹ Jihova o rẹ wọ omai—gbe amọfa—yoẹme kẹe no udu ze.—Mat. 22:37.
4 Ẹkwoma Oriruo Mai: Edhere jọ nọ o w’ẹgba gaga nọ ma sae rọ ta udu họ amọfa awọ re a yoẹme kẹ emamọ usi na họ ẹkwoma oriruo mai. Dede na, o gwọlọ omodawọ ikẹse-kẹse mi omai re ma sai wo udu ẹmeoyo. (1 Iv. 3:9; Itẹ 4:23) Eme onana o kẹre te? Rọ emu abọ-ẹzi kuọ udu ra ẹkwoma uwuhrẹ Ebaibol ẹsikpobi gbe ewuhrẹ ọnya. (Ol. 1:1, 2; Hib. 10:24, 25) Nya usu kugbe ahwo nọ a rọ udu rai kpobi kẹ egagọ uzẹme. (Itẹ 13:20) Hai kpohọ usiuwoma ota ẹsikpobi, avọ uvi isiuru nọ who re ro fiobọhọ kẹ ahwo ẹkwotọ ra. Hae lẹ se Jihova re o fiobọhọ kẹ owhẹ wo emamọ iroro. (Ol. 86:11) Whaha eware nọ e rẹ sae raha iroro ra, wọhọ erozaha ogbekuo hayo erọ ozighi nọ who re rri. Le eware nọ i re si owhẹ kẹle Ọghẹnẹ gbe enọ e rẹ bọ usu ra kugbei ga.—Jem. 4:7, 8.
5 Jihova ọ kẹ ahwo oke anwae riẹ imuẹro inọ a re ti wo eghale otẹrọnọ a yoẹme kẹ ijaje riẹ. (Izie. 28:1, 2) Ere ọvona nẹnẹ re, Jihova ọ be ginẹ ghale ‘enọ i bi yoẹme riẹ wọhọ osu.’ (Iruẹru 5:32) Fikiere, ẹkwoma ewuhrẹ nọ ma re wuhrẹ gbe oriruo mai, joma fiobọhọ kẹ amọfa re a yoẹme no udu ze.
[Study Questions]
1. Eme Jihova ọ gwọlọ mi enọ e be gọe?
2. Fikieme o jẹ roja re ma fiobọhọ kẹ amọfa wo ẹrọwọ ọgaga?
3. (a) Ẹvẹ ẹmeoyo o ro wobọ kugbe uyoyou? (b) Ẹvẹ ma sai ro fiobọhọ kẹ emọ-uwuhrẹ Ebaibol re a wo uyoyou kẹ Jihova?
4. (a) Fikieme oriruo mai ọ jẹ roja? (b) Eme o gwọlọ nọ ma re ru re ma sai wo udu ẹmeoyo?
5. Ẹvẹ enọ i bi yoẹme a bi ro wo eghale?