UWUHRẸ AVỌ 6

Dhesẹ Epanọ A re ro Fi Oria Ikere Họ Iruo Vevẹ

Jọn 10:33-36

OWARE NỌ O GWỌLỌ: Who te se oria Ebaibol no, whọ nwane la ruọ ẹme ọfa ha. Ruẹ nọ ahwo nọ a be gaviezọ kẹ owhẹ na a ruẹ oghẹrẹ nọ ikere nọ who se na i ro wobọ kugbe oware nọ whọ be ta na vevẹ.

EPANỌ A RE RO RU EI:

Dhesẹ eme nọ u fo nọ a re muẹrohọ. Who te se ikere no, dhesẹ eme nọ e jariẹ wobọ kugbe oware nọ o lẹliẹ owhẹ se ikere na. Edhere jọ nọ whọ sai ro ru onana họ, whọ rẹ wariẹ eme yena hayo nọ onọ jọ nọ u re fiobọhọ kẹ ahwo na muẹrohọ ae.

Whọ tẹ be rọ eme efa dhesẹ oware nọ oria ikere na o be ta, daoma ruẹ nọ ahwo nọ a be gaviezọ kẹ owhẹ na a ruẹ oghẹrẹ nọ eme nọ e rrọ oria ikere yena i ro wobọ kugbe ugogo oware nọ who bi wuhrẹ ai na vevẹ.
Ru oware nọ who bi wuhrẹ na vẹ. Whọ tẹ ta kẹ ahwo nọ a rovie kpohọ oria Ebaibol jọ jẹ fodẹ oware nọ o be lẹliẹ owhai se oria Ebaibol na vevẹ no, dhesẹ oghẹrẹ nọ igogo eme jọ evaọ oria ikere nọ wha se na i ro wobọ kugbe oware nọ whọ ta na.

Nọ whọ be ta kpahe oria Ebaibol na, ruẹ nọ Ebaibol ra o gbe rovie fihọ. Onana u ti fiobọhọ kẹ ahwo nọ a be gaviezọ kẹ owhẹ na ruẹ oghẹrẹ nọ eme nọ whọ be ta na i ro wobọ kugbe oria Ebaibol nọ wha se na.
Rọ edhere ọlọlọhọ ru epanọ a re ro fi ẹme na hiruo vẹ. Whọ ta ẹme kpahe eware nọ i kiekpahe oware nọ who bi wuhrẹ hẹ evaọ oria ikere yena ha. Oware nọ ahwo nọ a be gaviezọ kẹ owhẹ a riẹ kpahe ẹme yena no vẹre who re rri rọ salọ eware nọ u fo nọ whọ rẹ ta ẹme kpahe taure oware nọ who bi wuhrẹ ai na u te ti vẹ ai ẹro.