Uwuhrẹ 43

Eroruiruo Oria Ẹme Nọ A k’Owhẹ

Eme o gwọlọ nọ who re ru?

Ta ẹme na wariẹ uzoẹme nọ a k’owhẹ na, yọ otẹrọnọ a si ẹme na n’obe jọ ze, rehọ ikereakere gbe igogo eme noi ze.

FIKIEME U JE WUZOU?

Ma tẹ rehọ obe ẹme mai ruẹrẹ ẹme họ, yọ ma be rọ adhẹẹ kẹ omaa emuọriọ nọ utu ọrigbo nọ o wo ẹrọwọ avọ areghẹ na ọ ruẹrẹhọ.

EBAIBOL na ọ rehọ ukoko Ileleikristi na dhesẹ ugboma ohwo. Abọ kpobi o w’iruo, rekọ “abọ na kpobi owo oghẹrẹ iruo ọvo ho.” Rọwokugbe oyena, u fo re ma rehọ uvẹ-ọghọ kpobi nọ a k’omai ruiruo ziezi. Onana u dhesẹ nọ ma re wo otoriẹ ẹme kpobi nọ a k’omai nọ ma ru je ru ei ziezi viukpenọ ma re rri oghẹrẹ uzoẹme jọ jevejeve fikinọ ma roro nọ izoẹme efa e mai wo isiuru. (Rom 12:4-8) Utu ọrigbo nọ o wo ẹrọwọ avọ areghẹ na ọye o wo owha-iruo na re ọ rehọ emuore abọ-ẹzi kẹ “nọ oke u te.” (Mat. 24:45) Ma tẹ rehọ ona mai ruẹrẹ oma kpahe kẹ ẹme nya lele ithubro nọ a k’omai, yọ ma bi dhesẹ ovuhumuo kẹ ọruẹrẹfihotọ ọyena. Onana u re fiba ẹnyaharo ukoko na kpobi.

Eme nọ Who Re Kugbei. A tẹ k’owhẹ uzoẹme jọ evaọ isukulu na, roma totọ ruẹrẹ oma kpahe kẹ uzoẹme oyena orọnikọ ẹme ọfa jọ họ. Ẹsibuobu, a rẹ fodẹ oria nọ a rẹ rehọ ẹme na no ze. A gbẹ fodẹ uvumọ obe nọ whọ rẹ rehọ ẹme na no ze k’owhẹ hẹ, whọ sae rehọ eme no obe kpobi nọ u j’owhẹ ze. Rekọ, nọ whọ be ruẹrẹ oma kpahe kẹ ẹme ra na, ruẹ nọ oma ẹme na kpobi o dhẹ wariẹ uzoẹme nọ a k’owhẹ na họ. Whọ tẹ be jiroro eme nọ who re kugbei, who re je wo ogbotu ra h’iroro.

Roma totọ se oria ẹme na, jẹ kiẹ ikereakere nọ e riẹ na riwi. Who ve roro kpahe epanọ whọ rẹ sae rọ rehọ iẹe ro ruiruo ziezi kẹ erere ogbotu na. Salọ owọ eme ivẹ hayo esa no obe na ze ro ru igogo eme ẹme ra. Epọvo na re, jọ obe na salọ ikereakere nọ whọ jiroro nọ who ti se jẹ t’ẹme kpahe.

Bro eware whọ rẹ jọ obe na t’ẹme kpahe? Utho eme nọ whọ rẹ sae ta re ziezi. Whọ rehọ evuẹ buobu nọ whọ rẹ kua vọ ẹme na rọ raha emamọ ewuhrẹ ra ha. Otẹrọnọ abọjọ oria ẹme na i kiehọ ẹjiroro ẹme ra ha, tẹrovi eria nọ i ti fiobọhọ k’owhẹ nyate ute na. Evaọ obe nọ a fodẹ na, salọ eme nọ e rẹ mae kẹ ogbotu ra eriariẹ gbe erere. Ute ra evaọ uthubro ẹmeọta nana họ, orọnikọ epanọ whọ ta bu te he, rekọ eroruiruo oria nọ a si ẹme na no ze na wọhọ ehri ẹme ra.

Ẹme ra orọnikọ orukpẹre oria nọ a si ẹme na no ze ọvo ho. Whọ rẹ m’omaa re who ru eme jọ vẹ, ta kpahe ae ziezi, rọ ọtadhesẹ ru ai vẹ, yọ o tẹ lọhọ kẹ oriruo jọ kpahe efihiruo rai. Whọ rẹ rehọ eme efa ru eme nọ i wuzou evaọ obe nọ a fodẹ na kẹre viukpenọ who re nwene obe na.

Oke o be nyaharo na, a sai zizie inievo nọ i te wọhọ iwuhrẹ re a kẹ uthubro evaọ Ewuhrẹ Odibọgba na. A riẹ epanọ u wuzou te re a rehọ obe ẹmeọta na ruiruo ziezi ukpenọ a rẹ rọ oware ofa jọ ro nwene iei. Epọvo na re, a rẹ kẹ inievo nọ e rẹ kẹ evuẹ ogbotu omaa-ẹmeọta. A ru rai epanọ ohwo ọ sai ro fi eme efa bae, rekọ i re dhesẹ vevẹ igogo eme nọ a rẹ ta kpahe, eme nọ a rẹ rọ tha ẹme na uke, gbe ikereakere nọ i kie kpahe ẹme na. Re ma wuhrẹ epanọ a rẹ rọ obe ẹmeọta nọ a k’omai ro wuhrẹ amọfa yọ abọ ologbo ọrọ omaruẹrẹhọ kẹ uvẹ-ọghọ ẹmeọta efa.

Ewuhrẹ nana ọ sai je fiobọhọ k’owhẹ ru emamọ ebe uwuhrẹ Ebaibol. Who ti wuhrẹ re whọ tẹrovi obe nọ wha bi ro ru uwuhrẹ na viukpenọ whọ rẹ siọ uzoẹme na ba nyai fielo họ eware isiuru efa nọ i w’obọ kpahe otoriẹ uzoẹme na ha. Ghele na, otẹrọnọ who vuhu ẹjiroro uwuhrẹ nana mu, orọnikọ whọ rẹ nwane jọ kekeke he te epanọ who gbe ro fi eme oruvẹ nọ ọmọ-uwuhrẹ na ọ gwọlọ ba ewuhrẹ na ha.

EPANỌ A RE RO RU EI

Rehọ eme nọ i w’obọ kpahe uzoẹme ra ọvo t’ẹme.

Ẹme ra ọ tẹ gwọlọ nọ who re ru ei no obe jọ nọ a kporo ze, salọ igogo eme gbe igogo ikereakere ra no obe na ze viukpenọ whọ rẹ rehọ ae no eria efa ze.

ORIA IRUO: Evaọ edẹ esa sa-sa, nọ who te se ikere okpẹdẹ na no, kpoka họ ẹme hayo eme nọ i ru uzoẹme nọ a be ta kpahe na vẹ. Siusi họ eme jọ nọ i duobọhọ uzoẹme na. Kẹsena whọ vẹ rọ eme obọ ra ta kpahe uzoẹme na ẹkwoma eroruiruo ikereakere gbe igogo eme nọ who kpokahọ na.