Uzou Avọ Ikpegbesa
Ogbotu Obuobu Evaọ Aro Akaba-Uvie Jihova
1. (a) Taure idibo Ọghẹnẹ anwae hayo 144,000 na a te ti wo osa rai, eme ọ rẹ via kẹ ai hrọ? (b) Eme ọ te lọhọ kẹ “otu obuobu” nọ e be rria evaọ oke nana?
IDIBO ẹrọwọ Ọghẹnẹ no umuo Ebẹle rri te Jọn Ọhọahwo-Ame na a rehọ oreva Ọghẹnẹ uruo karo evaọ izuazọ rai. Ghele na, aikpobi a whu no, be hẹrẹ ẹkparomatha rai ziọ uzuazọ evaọ otọakpọ evaọ akpọ ọkpokpọ Ọghẹnẹ. Ahwo 144,000 nọ i ti lele Kristi su evaọ Uvie obọ odhiwu Ọghẹnẹ na, a re je whu hrọ re a te wo osa rai. Ghele na, Eviavia 7:9 u dhesẹ nọ evaọ edẹ urere enana, “otu obuobu” nọ o no erẹwho kpobi ze ọ te jariẹ, enọ i ti whu hu rekọ a ti wo irẹro ẹria bẹdẹ bẹdẹ evaọ otọakpọ. Kọ whọ rrọ usu rai?
Evuhumu Otu Obuobu Na
2. Eme o su kpohọ ewo otoriẹ uvevẹ ọ otu obuobu ọrọ Eviavia 7:9 na?
2 Evaọ 1923, idibo Jihova a vuhumu inọ “igodẹ” ọ ohare Jesu eva Matiu 25:31-46 na gbe “igodẹ efa” nọ ọ t’ẹme kpahe eva Jọn 10:16 na yọ ahwo nọ a ti wo uvẹ ẹria evaọ otọakpọ na bẹdẹ bẹdẹ. Evaọ 1931 a tẹ te jẹ ruẹ nọ ahwo nọ a dhesẹ eva Izikiẹl 9:1-11 inọ a kpoka họ aruezo rai na yọ enọ i wo ẹruore otọakpọ re. Kẹsena, evaọ 1935, ma te ti wuhrẹ nọ otu obuobu na yọ abọ utu igodẹ efa na nọ Jesu ọ t’ẹme kpahe na. Nẹnẹ na, otu obuobu nana nọ a rri aro na a te ima buobu no.
3. Fikieme ẹme na inọ ‘a dikihẹ aro akaba uvie’ na o gbe dhesẹ nọ a rrọ utu obọ odhiwu hu?
3 Eva Eviavia 7:9, a ruẹ otu obuobu na wọhọ nnọ a rrọ obọ odhiwu hu. O gbahọ nọ a rẹ jọ obọ odhiwu re a te “dikihẹ aro akaba uvie” Ọghẹnẹ hẹ. A rrọ oria nọ Ọghẹnẹ ọ sae jọ rue rai ọvo. (Olezi 11:4) Uzẹme na nnọ otu obuobu na, “nọ ohwo ọvo ọ sai kele he” na ọ rrọ utu obọ odhiwu hu u dhesẹ oma via nọ ma tẹ rọ unu nọ a wo ho na rọ wawo oware nọ a kere fihọ Eviavia 7:4-8 gbe Eviavia 14:1-4. A jọ etẹe dhesẹ unu ahwo nọ a rehọ no otọakpọ kpohọ obọ odhiwu wọhọ 144,000.
4. (a) Eme họ ‘uye ulogbo’ nọ otu obuobu na ọ zọ no ze na? (b) Wọhọ epanọ a ta riẹ eva Eviavia 7:11, 12, amono a tẹro muọ otu obuobu na je ku oma gbe ai evaọ egagọ?
4 Eviavia 7:14 o ta kpahe otu obuobu na nọ: ‘Enana yọ enọ i no uye ulogbo na ze.’ A zọ vrẹ uye nọ o mae ga kpobi nọ a ruẹ no evaọ ikuigbe ohwo-akpọ. (Matiu 24:21) Nọ a ti jiri Ọghẹnẹ gbe Kristi kẹ esiwo rai, emama ẹrọwọ kpobi evaọ obọ odhiwu a ti kuomagbe ai ta nọ: “Ami! Oghale, oruaro, areghẹ, uyere-okẹ, adhẹẹ, ogaga gbe udu ogaga i te Ọghẹnẹ mai bẹdẹ bẹdẹ! Ami.”—Eviavia 7:11, 12.
Edhesẹ Sọ A Te Kẹ Azọ
5. Ẹvẹ ma sae rọ riẹ oware nọ a gwọlọ re ma ruẹse jọ abọ otu obuobu na?
5 Esiwi otu obuobu na no uye ulogbo na ze o te nya lele itee ikiẹrẹe Jihova. A jọ Ebaibol na dhesẹ oka nọ a re ro vuhu enọ e te zọ na vevẹ. Fikiere o lọhọ kẹ enọ i you ẹrẹreokie re a j’owọ enẹna avọ iroro ete kẹ azọ. Eme enana i re ru hrọ?
6. Ẹvẹ a sae rọ rehọ otu obuobu na ro dhesẹ igodẹ gbagba?
6 Igodẹ e rẹ jọ wolẹ avọ ẹmeoyo. Fikiere nọ Jesu ọ ta nọ o wo igodẹ efa nọ e rrọ utu obọ odhiwu na ha, orọnikọ ọ be ta kpahe ahwo nọ e te gwọlọ rria otọakpọ na ọvo ho rekọ nọ e te rọ omakpotọ kẹ iwuhrẹ riẹ re. Ọ ta nọ: “Igodẹ mẹ i re yo uru mẹ, mẹ riẹ rai, i re lele omẹ.” ( Jọn 10:16, 27) Enana họ ahwo nọ a be ghinẹ gaviezọ je yoẹme kẹ oware nọ Jesu ọ ta, nọ i zihe ro ilele riẹ.
7. Didi ekwakwa u fo nọ ilele Jesu a re wo?
7 Ekwakwa efa vẹ ilele Jesu enana ọvuọvo o re dhesẹ? Ẹme Ọghẹnẹ ọ kuyo nọ: “Si obọnọ uruemu ẹdẹe nọ wha je yeri, ohwo anwae na, . . . re wha wha ohwo ọkpokpọ na họ oma, ọnọ a ma tho Ọghẹnẹ eva uvi ẹrẹreokie gbe ẹfuọ.” (Ahwo Ẹfẹsọs 4:22-24) A re wo ekwakwa nọ i re fiba okugbe idibo Ọghẹnẹ—“uyoyou, oghọghọ, udhedhẹ, uye oruẹ krẹkri, oma-onyẹ, ewoma, orọwọ, oma-urokpotọ, oma-oyọrọ.”—Ahwo Galesha 5:22, 23.
8. Eme otu obuobu na ọ te rẹriẹ ovao ku nọ a be tha okiọkotọ na uke na?
8 Otu obuobu na ọ be rehọ uketha kẹ utu okakao nọ u wo ẹruore odhiwu na, enọ e be k’obaro evaọ iruo usiuwoma ota na. (Matiu 24:14; 25:40) Igodẹ efa na e be thae uke, dede nọ a riẹ nọ a te rẹriẹ ovao ku ọkparesuọ keme eva emuhọ edẹ urere enana, Kristi Jesu avọ enjẹle na a gele Setan gbe idhivẹri riẹ no odhiwu ze. Onana o tẹ rrọ uye kẹ “akpọ . . . keme ukumuomu na ọ rehọ ofu ọgaga bru owhai ze, keme ọ riẹ nọ oke riẹ o re kpẹkpẹre.” (Eviavia 12:7-12) Fikiere, Setan ọ be tua ọkparesuọ idibo Ọghẹnẹ nọ urere uyerakpọ nana u bi si kẹle na.
9. Ẹvẹ idibo Ọghẹnẹ a kparobọ te no evaọ ewhowho emamọ usi na, kọ fikieme?
9 Ghelọ ọkparesuọ ọgaga, iruo usiuwoma ota na e gbẹ be nyaharo. No umutho iwhowho Uvie idu esese eva ekuhọ Ẹmo Akpọ I na, enẹna ma te ima buobu no, keme Jihova ọ y’eyaa nọ: “Ekuakua ẹmo ọvo nọ a gali vi owhai nọ i re wo iruo e rọ họ.” (Aizaya 54:17) Omọvo okọto ukpehru ahwo Ju jọ dede o vuhumu nnọ a sai fi iruo Ọghẹnẹ kparobọ họ. Ọ ta kẹ otu Farisi evaọ ikpe-udhusoi ọsosuọ na kpahe ilele na nọ: “Wha vu ai wa tou; keme re ẹjiroro hayo iruẹru enana etẹrọ erọ ahwo, e rẹte galuzouviẹ; rekọ e tẹrọ erọ Ọghẹnẹ, wha rẹ sae kpare ai no ho. Hayo wha rẹ te ruẹ nọ Ọghẹnẹ wha rẹ họrọ.”—Iruẹru 5:38, 39.
10. (a) Eme “oka” nọ a kpehọ otu obuobu na u dhesẹ? (b) Ẹvẹ idibo Ọghẹnẹ i bi ro yo ẹme kẹ ‘urru nọ u no odhiwu ze’ na?
10 A dhesẹ ahwo otu obuobu na wọhọ nnọ a kpoka azọ họ ae no. (Izikiẹl 9:4-6) “Oka” na họ imuẹro inọ a roma mudhe kẹ Jihova no, a họ-ame no wọhọ ilele Jesu, a te je bi wuhrẹ ọkpọ uruemu Kristi. A bi yo ẹme kẹ ‘urru nọ u no odhiwu ze’ nọ o ta kpahe isuẹsu egagọ ọrue akpọ-soso Setan nọ: “Ahwo mẹ, wha nya siẹ e ba, ogbẹrọ ere he, wha ti lele iei ru umuemu riẹ je lele iei ruẹ uye riẹ.”—Eviavia 18:1-5.
11. Evaọ edhere obọdẹ vẹ ahwo otu obuobu na a be jọ dhesẹ nọ a rrọ idibo Jihova?
11 Ofariẹ, Jesu ọ ta kẹ ilele riẹ nọ: “Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.” ( Jọn 13:35) Wo ohẹriẹ, ahwo egagọ akpọ nana a bi kpe omoma rai evaọ ẹmo, ẹsibuobu fikinọ a no orẹwho ofa ze! Ẹme Ọghẹnẹ ọ ta nọ: “Fiki onana a te rọ ruẹ enọ e rọ emọ Ọghẹnẹ gbe enọ e rọ ukumuomu na: kohwo kohwo nọ o bi ruẹ oware nọ u kiẹrẹe he, ọ rọ ọmọ Ọghẹnẹ hẹ; ọnọ o you omoni riẹ hẹ, ọ rọ ọmọ Ọghẹnẹ gbe he. . . . Ufore mai ohwo o you ohwo, ma jọ wọhọ Keni hi, ọnọ ọ jọ ọ rọ oyoma na, nọ o je kpe oniọvo riẹ.”—1 Jọn 3:10-12.
12. Eva uye ulogbo na, ẹvẹ Jihova o ti ru ‘ire’ egagọ nọ e be mọ ibi iyoma na?
12 Jesu o whowho nọ: “Kure kure nọ u woma o rẹ mọ ibi iwoma, rekọ ure umuomu o rẹ mọ ibi iyoma. Ure uwoma o rẹ sae mọ ibi iyoma ha, gbe ure umuomu o sae mọ ibi iwoma gbe he. Kure kure nọ o mọ ubi uwoma ha a re kie i fihọ otọ a ve fi ei họ erae. Fikiere ibi rai wha re ro vu hu ai.” (Matiu 7:17-20) Ibi nọ egagọ akpọ nana e be mọ i bi dhesẹ ae via wọhọ ‘ire’ igbogbo enọ Jihova ọ be te raha kẹle eva uye ulogbo na.—Eviavia 17:16.
13. Ẹvẹ otu obuobu na a ro dhesẹ nnọ a rọ okugbe “dikihẹ aro akaba uvie” Jihova?
13 Eviavia 7:9-15 u si iroro kpohọ okwakwa ofa nọ u su kpohọ esiwi otu obuobu na. A dhesẹ i rai nọ a rọ okugbe “dikihẹ aro akaba uvie” Jihova, be kpare esuo ehrugbakpọ riẹ kpehru. A “fọrọ iwu rai no a tẹ rehọ azẹ Omogodẹ ru ai founo,” bi dhesẹ nọ a vuhu idhe Jesu nọ i re si izieraha no na mu. ( Jọn 1:29) A rehọ oma rai mudhe kẹ Ọghẹnẹ no a tẹ rọ ame-ọhọ dhesẹ iẹe via. Fikiere a be reawere edikihẹ ọfuafo evaọ aro Ọghẹnẹ, onọ a rehọ iwu efuafo dhesẹ na, a tẹ be “gọ e taso tuvo.” Kọ idhere jọ e riẹ nọ whọ rẹ sae rọ rehọ uzuazọ ra rọwo kugbe oware nọ a jọ etenẹ dhesẹ na viere?
Irere Enẹna
14. Didi irere igbunu jọ i bi te idibo Jihova obọ makọ enẹna?
14 Ẹsejọhọ who mu ẹro họ irere igbunu nọ i re te enọ e be gọ Jihova makọ enẹna dede no. Wọhọ oriruo, okenọ who wuhrẹ kpahe ẹjiroro okiẹrẹe Jihova, who wo otoriẹ nnọ ẹruore nọ ọ rẹ sasa udu ọ rrọ obaro na. Fikiere enẹna who wo uvi ẹjiroro evaọ uzuazọ—re a gọ Ọghẹnẹ uzẹme na avọ irẹro oghọghọ orọ uzuazọ ebẹdẹ bẹdẹ evaọ otọakpọ aparadase. Ẹhẹ, Jesu Kristi Ovie na “o re ti su [otu obuobu na] kpohọ oria eyeri ame uzuazọ.”—Eviavia 7:17.
15. Didi erere Isẹri Jihova a wo no fikinọ a bi lele ehri-izi Ebaibol na kpahe eme isuẹsu gbe uruemu?
15 Erere igbunu jọ nọ otu obuobu na a be reawere riẹ họ uyoyou, okugbe, gbe ọgbakugbe nọ a rẹ ruẹ evaọ udevie idibo Jihova wariẹ otọakpọ soso họ. Nọ mai kpobi ma be re emu abọ-ẹzi ọvo na, mai kpobi ma bi yo ẹme kẹ izi gbe ehri-izi nọ e rrọ Ẹme Ọghẹnẹ. Oye jabọ nọ eme ọ isuẹsu gbe erẹwho e gbẹ be hẹriẹ omai hi na. Ofariẹ, ma bi kru itee uruemu ikpehru nọ Ọghẹnẹ ọ gwọlọ mi ahwo riẹ. (1 Ahwo Kọrint 6:9-11) Fikiere, ukpenọ ma ruẹ uye ẹwhọ, ozighi, gbe ọfariẹ-ogbe nọ i bi titi evaọ akpọ na, ahwo Jihova a be reawere oware nọ a rẹ sai se aparadase abọ-ẹzi. Mu ẹro họ epanọ a dhesẹ onana eva Aizaya 65:13, 14.
16. Ghelọ ebẹbẹ uzuazọ, didi ẹruore otu obuobu na a wo?
16 Ijo, idibo ahwo-akpọ Jihova a gba ha. Yọ a be ruẹ ebẹbẹ uzuazọ evaọ akpọ nana, wọhọ ọbẹwẹ nọ a be ruẹ hayo uye nọ o be bẹ ae evaọ emo erẹwho na. A rẹ jẹ mọ, ruẹ-uye, je whu. Rekọ a wo ẹrọwọ inọ evaọ akpọ ọkpokpọ na, Ọghẹnẹ o re “ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho.”—Eviavia 21:4.
17. Makọ oware nọ o rẹ via k’omai enẹna, didi obaro igbunu ọ be hẹrẹ enọ e be gọ Ọghẹnẹ uzẹme na?
17 Whọ tẹ maki whu enẹna fiki owho, ẹyao, asidẹnte, hayo ukpokpoma, Jihova ọ rẹ te kpare owhẹ ziọ uzuazọ evaọ Aparadase. (Iruẹru 24:15) Whọ te gbẹ reawere ehaa abọ-ẹzi evaọ Esuo Odu Ikpe Kristi na. Uyoyou ra kẹ Ọghẹnẹ u ti diwi viere nọ whọ be ruẹ ẹjiroro riẹ nọ o bi rugba na. Yọ eghale ugboma nọ Jihova ọ te kẹ evaọ oke oyena i ti ru uyoyou ra kẹe diwi viere. (Aizaya 25:6-9) Obaro igbunu nọ ọ be hẹrẹ ahwo Ọghẹnẹ o woma yọ!
Eme Ọkiẹkpemu
• Didi oware oghẹrẹsa nọ o te via Ebaibol na o dhesẹ otu obuobu na kugbe?
• Otẹrọnọ ma gwọlọ re a ku omai gbe otu obuobu ọyena nọ Ọghẹnẹ o riwi aro na, eme ma re ru hrọ enẹna?
• Ẹvẹ eghale nọ otu obuobu na a be reawere rai enẹna gbe enọ a te gbẹ reawere rai evaọ akpọ ọkpokpọ Ọghẹnẹ i wuzou k’owhẹ te?
[Uwoho nọ o rrọ ẹwẹ-obe avọ 123]
Ima erọ otu obuobu na a be rọ okugbe gọ Ọghẹnẹ uzẹme na