Ọghẹnẹ O Rri Rai Inọ A Te Kẹ Esu Kpohọ Eyeri Ame Uzuazọ
“Omogodẹ [na] . . . o re ti su ai kpohọ oria eyeri ame uzuazọ.”—EVIA. 7:17.
1. Ẹvẹ Ebaibol na i se Ileleikristi nọ a wholo na, kọ owha-iruo vẹ Jesu ọ kẹ rai?
EBAIBOL na i se Ileleikristi nọ a wholo enọ e be rẹrote ekwakwa Kristi evaọ otọakpọ na ‘ọrigbo nọ o wo ẹrọwọ avọ areghẹ.’ Okenọ Kristi ọ kiẹ “ọrigbo” na riwi evaọ 1918, ọ tẹ ruẹ inọ enọ a wholo nọ e rrọ otọakpọ na a be ginẹ rehọ emu abọ-ẹzi kẹ idibo riẹ ‘eva ẹruoke.’ Fikiere, eva e were Jesu, Olori na, nọ ọ rọ rehọ ai “mu uzou eware riẹ kpobi.” (Se Matiu 24:45-47.) Kọ enẹ enọ a wholo na a be rọ gbodibo kẹ eg’Ọghẹnẹ efa eva otọakpọ re a te ti wo osohwa obọ odhiwu rai.
2. Eme họ ekwakwa Jesu?
2 Olori o wo udu nọ ọ rẹ rọ rehọ ekwakwa riẹ ru oware nọ u je rie. Ekwakwa Jesu Kristi, Ovie nọ Jihova o ro mu na họ eware kpobi nọ i wo obọ kpahe iruẹru Uvie na evaọ otọakpọ. Onana u kugbe “otu obuobu” nọ Jọn ukọ na ọ ruẹ evaọ eruẹaruẹ na. Enẹ Jọn o dhesẹ otu obuobu na: “Me te ri jẹ ruerẹ otu obuobu jọ, nọ ohwo ọvo ọ sai kele he, nọ i no erẹwho kpobi ze, erua gbe ahwo gbe erọo-unu, nọ i dikihẹ aro akaba uvie jegbe aro Omogodẹ na, nọ e whẹ iwu efuafo họ, yọ eyao iriẹ e rọ abọ rai.”—Evia. 7:9.
3, 4. Uvẹ-ọghọ ologbo vẹ u rovie fihọ kẹ otu obuobu na?
3 Otu obuobu nana a rrọ usu enọ Jesu o dhesẹ wọhọ “igodẹ efa” na. (Jọn 10:16) Ẹruore rai họ re a rria bẹdẹ bẹdẹ evaọ otọakpọ aparadase. U mu rai ẹro inọ Jesu o “ti su ai kpohọ oria eyeri ame uzuazọ” gbe nnọ ‘Ọghẹnẹ o ti ririe irui rai no.’ Fiki ẹruore nana, a “fọrọ iwu rai no a tẹ rehọ azẹ Omogodẹ ru ai founo.” (Evia. 7:14, 17) A fi ẹrọwọ họ idhe Jesu, fikiere evaọ aro Ọghẹnẹ a wha ‘iwu efuafo.’ A kuenu kẹ ai inọ a kiẹrẹe jẹ rrọ egbẹnyusu Ọghẹnẹ wọhọ Abraham.
4 Ofariẹ, nọ Ọghẹnẹ o rri otu obuobu ọrọ igodẹ efa nọ i bi dhe ebuebu na wọhọ nọ a kiẹrẹe na, a rẹ sai rẹro inọ a te zọ evaọ ọraha uyerakpọ nana eva uye ulogbo na. (Jem. 2:23-26) A rẹ sai si kẹle Jihova, a te je wo uvi ẹruore inọ a rẹ te zọ evaọ Amagẹdọn. (Jem. 4:8; Evia. 7:15) A rrọ ọrai sa ha, rekọ a be rehọ unevaze ruiruo evaọ otọ esuo Ovie obọ odhiwu na gbe inievo riẹ nọ a rrọ ẹzi wholo evaọ otọakpọ.
5. Ẹvẹ otu obuobu na a bi ro fiobọhọ kẹ inievo Kristi nọ a rọ ẹzi wholo?
5 Akpọ Setan o rehọ uye bẹ Ileleikristi nọ a wholo na no, yọ uye o gbẹ be bẹ ai. Rekọ udu o rẹ sai kie ai vi inọ egbẹnya rai, otu obuobu na, a be thae uke. Nọ Ileleikristi nọ a wholo na a bu hu na, kukpe kukpe otu obuobu na o bi dhe evievihọ. Enọ a wholo na a rẹ sae ghale oma rai fihọ ikoko nọ i bu te idu udhusoi nọ e rrọ akpọ na soso re a rẹrote ai hi. Edhere jọ nọ igodẹ efa na a bi ro fiobọhọ kẹ enọ a wholo na họ ezae nọ i te evaọ udevie rai a bi ruiruo wọhọ ekpako ukoko. A bi fiobọhọ rẹrote ima Ileleikristi buobu nọ a mu họ ‘ọrigbo nọ o wo ẹrọwọ avọ areghẹ na’ obọ.
6. Ẹvẹ a rọ ruẹaro kpahe obọ nọ igodẹ efa na a ti fihọ kẹ Ileleikristi nọ a wholo na?
6 Aizaya ọruẹaro na ọ ruẹaro kpahe obọ nọ igodẹ efa na a ti fihọ kẹ Ileleikristi nọ a wholo na. O kere nọ: “Enẹ ỌNOWO na ọ tae: ‘[Iruiruo unevaze] Ijipti gbe eware eki ọthuọ ahwo Etiopia gbe ahwo Sẹba, nọ a re gusẹẹ, a ti bru owhai tha a ve zihe ruọ e rai, a ve ti lele owhai.” (Aiz. 45:14) Evaọ edhere ẹwoho, igodẹ efa na a bi lele utu ọrigbo nọ a wholo na avọ Ugboma Esuo riẹ, bi lele ọkpọvio rai. Wọhọ ‘iruiruo unevaze,’ igodẹ efa na a be rehọ ẹgba gbe efe rai rọ tha iruo usiuwoma ota akpọ-soso na uke, onọ Kristi o mu họ ilele riẹ nọ a wholo evaọ otọakpọ obọ na.—Iruẹru 1:8; Evia. 12:17.
7. Eme a bi wuhrẹ otu obuobu na kẹ?
7 Nọ a bi fiobọhọ kẹ inievo rai nọ a wholo na, yọ enọ a wholo na a be rọ enẹ wuhrẹ otu obuobu na wọhọ enọ e te jọ otọhotọ akpọ ọkpokpọ nọ Amagẹdọn ọ tẹ vrẹ no. Otọhotọ yena o rẹ jọ gaga hrọ, otu obuobu nọ i ru onana via a vẹ jẹ jọ enọ e rẹ rọ unevaze ru oreva Olori na. A be kẹ Oleleikristi kpobi uvẹ nọ o re ro dhesẹ sọ ọ gwọlọ nọ Ovie na, Kristi Jesu ọ rehọ iẹe ruiruo. Ẹrọwọ nọ o re wo enẹna jẹ romakpotọ, u re dhesẹ inọ ọ te rehọ unevaze ru lele ọkpọvio nọ Ovie na ọ te kẹe evaọ akpọ ọkpokpọ na.
Otu Obuobu na A bi Dhesẹ Ẹrọwọ Rai
8, 9. Ẹvẹ otu obuobu na a bi ro dhesẹ ẹrọwọ rai?
8 Igodẹ efa na, enọ e rrọ egbẹnya Ileleikristi nọ a wholo na, a bi dhesẹ ẹrọwọ rai via evaọ idhere sa-sa. Orọ ọsosuọ, a bi fiobọhọ kẹ enọ a wholo na ta usiuwoma Uvie Ọghẹnẹ. (Mat. 24:14; 28:19, 20) Orọ avivẹ, a be rọ unevaze romakpotọ kẹ ọkpọvio nọ u bi no obọ Ugboma Esuo na ze.—Hib. 13:17; se Zekaraya 8:23.
9 Orọ avesa, otu obuobu na a bi fiobọhọ kẹ inievo rai nọ a wholo na ẹkwoma izi kiẹrẹe Jihova nọ a bi koko. A be daoma wo “uyoyou, oghọghọ, udhedhẹ, uye oruẹ krẹkri, oma-onyẹ, ewoma, orọwọ, oma-urokpotọ, oma-oyọrọ.” (Gal. 5:22, 23) Re ohwo o dhesẹ iruemu-aghae itienana nẹnẹ, ikpenọ o re ru “iruo uwo” na, o rẹ sai tu ahwo oma. Ghele na, otu obuobu na a gba riẹ mu no re a whaha “ogberẹ-obro, egbegbe, ẹnwae-obro, urusio, edhọegọ, enua, [egrẹọjẹ], eme-ivẹ-eta, omaoya, [ihri-eriọ] ofuomuo, eguae-iyoma, omohẹriẹ, ewuhrẹ-erue, ẹro-oyoma, ọgba edada, eha-iyoma, gbe itieye” na.—Gal. 5:19-21.
10. Eme otu obuobu na a gba riẹ mu no nọ a re ru?
10 Nọ ma gba ha na, o rẹ sae jọ bẹbẹ re ma mọ ubi ẹzi na, whaha iruo uwo na, je mugba kẹ otunyẹ akpọ Setan. Rekọ, ma gba riẹ mu no inọ ma rẹ kẹ elọhoma nọ i re no ewhrehe mai, ethobọ, hayo ẹyao ze uvẹ hẹ re u whrehe ẹrọwọ nọ ma fihọ Jihova gbe uyoyou nọ ma wo kẹe. Ma riẹ inọ Jihova o ti siwi otu obuobu na no uye ulogbo na wọhọ epanọ ọ yaa na.
11. Eghẹ vẹ Setan o ro ruiruo no re ọ ruẹsi whrehe ẹrọwọ Ileleikristi?
11 Ofariẹ, ma rẹ jaja aro vi ẹsikpobi keme ma riẹ nọ Ẹdhọ họ uzedhe ọwegrẹ mai, yọ oma o rẹ kake rọe he. (Se 1 Pita 5:8.) Ọ be daoma rehọ ikọ erue gbe amọfa lẹliẹ omai họ re ma roro inọ eware nọ a bi wuhrẹ omai na yọ iwuhrẹ erue. Rekọ ẹghẹ nana o kie unuẹse buobu no. Epọvo na, dede nọ ukpokpoma u re ru usiuwoma ota na jọ bẹbẹ ẹsejọ, ẹsibuobu o rẹ bọ ẹrọwọ enọ a bi kpokpo na ga. Fikiere, Setan ọ tẹ be rehọ ẹghẹ nọ o roro nọ o te mae kaki whrehe ẹrọwọ mai ro ruiruo. Ọ rẹ gwọlọ dawo ahwo nọ a rrọ ọkora. A vẹvẹ Ileleikristi ikpe-udhusoi ọsosuọ unu kpahe enwoma nọ u re no onana ze nọ a ta kẹ ae nọ: “Roro [Kristi] nọ o wo odiri kẹ erahaizi eva ukpokpoma kpobi nọ a kẹ riẹ.” Fikieme? “Re oma o siọ owhai ba ẹ rọ hayo ẹlọhọ.”—Hib. 12:3.
12. Ẹvẹ ohrẹ Ebaibol na o rẹ rọ kẹ enọ e rrọ ọkora ẹgba?
12 Kọ who roro no ẹdẹjọ inọ whọ rẹ siọ Jihova ba ẹgọ? Kọ whọ be hai roro ẹsejọ inọ akpọ o kie owhẹ thọ no? Otẹrọ ere, whọ kẹ Setan uvẹ hẹ re ọ rehọ iroro itieye na whaha owhẹ Jihova nọ whọ rẹ gọ. Ebaibol nọ who re wuhrẹ ziezi, uvi olẹ, gbe iwuhrẹ nọ whọ rẹ nya kẹse kẹse je kuomagbe ibe Ileleikristi e te bọ owhẹ ga nọ ‘oma o gbẹ rọ lọhọ owhẹ hẹ.’ Jihova ọ ya eyaa inọ ọ te rehọ ẹgba kẹ enọ e be gọe, yọ eyaa riẹ i muẹro. (Se Aizaya 40:30, 31.) Tẹrovi iruo Uvie na. Whaha eware nọ e rẹ raha oke ohwo kufiẹ, re who roro kpahe obufihọ kẹ amọfa. Who ve ti wo ẹgba nọ who re ro thihakọ ghelọ iroro ọkora.—Gal. 6:1, 2.
Esiwo no Uye Ulogbo na Ruọ Akpọ Ọkpokpọ
13. Didi iruo e rrọ obaro kẹ enọ e zọ evaọ Amagẹdọn?
13 Nọ Amagẹdọn ọ tẹ vrẹ no, o te gwọlọ re a wuhrẹ ogbotu ahwo nọ i kiete he nọ a kpare ze na kpahe idhere Jihova. (Iruẹru 24:15) O te gwọlọ nọ a wuhrẹ ai kpahe idhe ẹtanigbo Jesu; u je no ere no, a ve je wuhrẹ ai re a fi ẹrọwọ họ idhe na re a sai wo erere noi ze. O te gwọlọ inọ a siọ iwuhrẹ erue nọ a wo vẹre re a je si obọ no uzuazọ nọ a je yeri vẹre. A ti wuhrẹ epanọ a rẹ rọ hwẹ uruemu okpokpọ na họ, onọ a re ro vuhu Ileleikristi uzẹme. (Ẹf. 4:22-24; Kọl. 3:9, 10) Iruo buobu e te jọ kẹ otu igodẹ efa nọ e zọ. Dai roro epanọ oghọghọ riẹ o te rro te re ma ruiruo itienana kẹ Jihova ababọ idhọvẹ gbe isiuru uyerakpọ omuomu nana!
14, 15. Dhesẹ epanọ enọ e zọ evaọ uye ulogbo na avọ enọ i kiẹrẹe nọ a te kpare ze a ti ro gbiku kẹ ohwohwo.
14 Idibo Jihova nọ i whu taure Jesu o te ti mu odibọgba otọakpọ riẹ họ a ti wuhrẹ eware buobu re eva oke yena. A ti wuhrẹ kpahe ohwo nọ ọ jọ Mesaya nọ a ya eyaa riẹ na, ọnọ a je rẹro riẹ rekọ nọ a ruẹ hẹ. Okenọ a jọ akpọ, a yeri uzuazọ nọ u dhesẹ inọ a gwọlọ re Jihova o wuhrẹ ai. Wọhọ oriruo, dai roro epanọ o te jọ evawere gbe ọghọ te re ma dhesẹ kẹ Daniẹl epanọ eruẹaruẹ nọ o kere fihọ otọ enọ o wo otoriẹ rai hi i ro rugba.—Dan. 12:8, 9.
15 Whaọ, dede nọ enọ a kpare ze na a ti wuhrẹ eware buobu mi omai, enọ buobu e riẹ nọ ma te nọ ae. A te roma totọ gbiku eware jọ nọ Ebaibol i dhunu te ọvo k’omai. Dai roro epanọ u ti mu urirẹ te re Jọn Ọhọahwo-Ame na, ọnọ avọ Jesu a gbẹ jọ emọ-inievo, o gbiku k’omai kpahe uzuazọ Jesu! Eware nọ ma be te jọ obọ idibo Ọghẹnẹ yena wuhrẹ e te lẹliẹ otoriẹ nọ ma wo kpahe Ẹme Ọghẹnẹ enẹna kodo viere. Idibo Jihova nọ i whu no—te otu obuobu na nọ i whu evaọ oke urere na—a ti wo ‘emamọ ẹkparomatha.’ A jẹ gọ Jihova evaọ akpọ nọ Setan o je su. Dai roro epanọ eva e te were ai te re a wariẹ mu iruo ezi rai họ evaọ akpọ ọkpokpọ nọ ẹgọ Ọghẹnẹ o te mae jọ lọhọ!—Hib. 11:35; 1 Jọn 5:19.
16. Wọhọ epanọ eruẹaruẹ i dhesẹ, ẹvẹ Ẹdẹ Oziẹobro na o te jọ?
16 U ti te oke jọ evaọ Ẹdẹ Oziẹobro na nọ a ti ro rovie iko-ebe. Eme nọ e te jọ eva rai gbe Ebaibol na a ti ro bruoziẹ enọ e rrọ uzuazọ kpobi sọ a te kẹ uzuazọ ebẹdẹ bẹdẹ. (Se Eviavia 20:12, 13.) Eva ekuhọ Ẹdẹ Oziẹobro na yọ ohwo kpobi o wo uvẹ ziezi no nọ o re ro dhesẹ abọ nọ ọ rrọ evaọ ẹme avro esuo ehrugbakpọ na. Kọ ọ te roma kpotọ kẹ ọruẹrẹfihotọ Uvie na re Omogodẹ na o su ei kpohọ “eyeri ame uzuazọ”? Hayo kọ o ti veghe uzou, inọ ọ rẹ roma kpotọ kẹ Uvie Ọghẹnẹ hẹ? (Evia. 7:17; Aiz. 65:20) Eva oke yena yọ ahwo kpobi evaọ otọakpọ a wo uvẹ no nọ a rẹ rọ salọ abọ nọ a rrọ, ababọ uzioraha gbe akpọ Ẹdhọ nọ o ti kpomahọ iroro-ejẹ rai. Ohwo ọvo o gbe ti wo unu nọ o re ro gu unoma kpahe ẹgbagba oziẹobro urere Jihova ha. Ahwo muomu ọvo a ti kpe kufiẹ.—Evia. 20:14, 15.
17, 18. Oghẹrẹ ọwhọ vẹ Ileleikristi nọ a wholo na avọ igodẹ efa na a be rọ hẹrẹ Ẹdẹ Oziẹobro na?
17 Ileleikristi nọ a wholo nẹnẹ, enọ a kuenu kẹ no inọ a te kẹ Uvie na, a be rehọ ọwhọ hẹrẹ oke nọ a ti ro su evaọ etoke Ẹdẹ Oziẹobro na. Ọghọ riẹ o rro kẹhẹ! Ẹruore nana o be kẹ ae ajọwha nọ a re ro lele ohrẹ nọ Pita ọ kẹ inievo ikpe-udhusoi ọsosuọ rai: “Wha ru use avọ esanọ rai ga, keme otẹrọnọ wha ru enana wha gbẹ sai ti kie bẹdẹ hẹ; kọ ere a reti ro rovie ẹthẹ uzuazọ ebẹdẹ bẹdẹ uvie Ọnowo gbe Osiwi mai Jesu Kristi fihọ vevẹ kẹ owhai.”—2 Pita 1:10, 11.
18 Eva e be were igodẹ efa na inọ inievo rai nọ a wholo na a wo ẹruore otiọna. A gba riẹ mu no inọ a rẹ thọ ae uke. Wọhọ egbẹnyusu Ọghẹnẹ nẹnẹ, oma o be wọ ae re a rehọ utho ẹgba rai kpobi gọ Ọghẹnẹ. Evaọ etoke Ẹdẹ Oziẹobro na, oma o te were ai re a rehọ eva rai kpobi ru lele ọruẹrẹfihotọ Ọghẹnẹ nọ Jesu o bi su ai kpohọ eyeri ame uzuazọ na. Ukuhọ riẹ, a ve ti kuenu kẹ ai inọ a te enọ e rẹ jọ idibo Jihova evaọ otọakpọ na bẹdẹ bẹdẹ!—Rom 8:20, 21; Evia. 21:1-7.
Kọ Whọ Kareghẹhọ?
• Eme họ ekwakwa Jesu?
• Ẹvẹ otu obuobu na a be rọ tha inievo rai nọ a wholo na uke?
• Uvẹ-ọghọ gbe ẹruore vẹ otu obuobu na a be reawere riẹ?
• Ẹvẹ who rri Ẹdẹ Oziẹobro na?
[Iwoho nọ e rrọ ẹwẹ-obe avọ 25]
Otu obuobu na a fọrọ iwu rai no a tẹ jẹ rehọ azẹ Omogodẹ na ru ai fo
[Iwoho nọ e rrọ ẹwẹ-obe avọ 27]
Eme who rẹro nọ who ti wuhrẹ mi enọ a kpare ze na?