Uzou Avọ Ikpegbizii
Gbẹ Hẹ Ta Ẹme Ọghẹnẹ avọ Aruọwha
1. (a) Didi usiuwoma ilele Jesu a whowho, rekọ didi owọ ahwo Ju jọ a jẹ? (b) Didi enọ ma rẹ sae nọ?
ENWENỌ ikpe 2,000 nọ e vrẹ, a wholo Ọmọ Ọghẹnẹ, Jesu Kristi, wọhọ ọnọ ọ te jọ Ovie akpọ na soso. Ewegrẹ egagọ a gele ahwo họ kpe Jesu, rekọ Jihova ọ tẹ kpare iẹe no iwhuowhu ze. Ẹkwoma Jesu, uzuazọ ebẹdẹ bẹdẹ o lọhọ. Rekọ nọ ilele Jesu a je whowho usiuwoma nana evaọ ẹgbede, ukpokpoma u te du lahwe. A gbolo ejọ fihọ uwou-odi, tubẹ fae eviaviẹ jẹ kpokpa họ ae obọ nọ a siọ ẹme ba ẹta evaọ odẹ Jesu. (Iruẹru 4:1-3, 17; 5:17, 18, 40) Eme a re ru? Eme whọ hai ru? Kọ whọ hai gbe se isẹri avọ aruọwha?
2. (a) Didi usi igbunu u fo nọ a re whowho evaọ edẹ mai na? (b) Ono o wo owha-iruo nọ ọ rẹ rọ ta usiuwoma na?
2 Evaọ 1914 C.E. a rehọ Ovie Uvie Ọghẹnẹ, Jesu Kristi, ro mu evaọ obọ odhiwu re o su ‘evaọ udevie ewegrẹ riẹ.’ (Olezi 110:2) Kẹsena, a te gele Setan gbe idhivẹri riẹ ziọ otọakpọ na. (Eviavia 12:1-5, 7-12) Edẹ urere eyero omuomu ọnana i mu họ no. Evaọ ekuhọ etoke nana, Ọghẹnẹ ọ te guọghọ eyero eware Setan kpobi no. (Daniẹl 2:44; Matiu 24:21) Enọ e zọ i ti wo ẹruore uzuazọ ebẹdẹ bẹdẹ evaọ otọakpọ nọ u ti zihe ruọ aparadase. Otẹrọnọ who dede usiuwoma onana rehọ no, whọ te gwọlọ ghale iẹe kugbe amọfa. (Matiu 24:14) Rekọ didi owọ who rẹro nọ a te jẹ k’owhẹ?
3. (a) Didi owọ ahwo a rẹ jẹ kẹ ovuẹ Uvie na? (b) Didi enọ ma rẹ rẹriẹ ovao ku hrọ?
3 Who te bi whowho emamọ usi Uvie na, ahwo jọ a te jẹe rehọ, rekọ ibuobu i ti wo isiuru hu. (Matiu 24:37-39) Ejọ i re ti se owhẹ ẹkoko hayo wọso owhẹ. Jesu ọ vẹvẹ unu nọ ọwọsuọ ọ sai no obọ imoni ra ze. (Luk 21:16-19) Whọ sae jẹ nya ku ei evaọ eria iruo ra hayo obọ isukulu. Evaọ abọjọ otọakpọ na, iruo Isẹri Jihova e rrọ otọ awhaha egọmeti. Okenọ whọ tẹ rẹriẹ ovao dhe iyero itieye na, kọ whọ te gbẹ ta ẹme Ọghẹnẹ avọ aruọwha je “dikihẹ ga evaọ orọwọ”?—1 Ahwo Kọrint 16:13.
Ma Rẹ Rẹroso Ẹgba Obọ Mai Hi
4. (a) Re ma dhesẹ oma mai wọhọ idibo Ọghẹnẹ nọ i wo ẹrọwọ, ugogo oware jọ vẹ o gwọlọ? (b) Fikieme iwuhrẹ Ileleikristi i je wuzou tere?
4 Oware jọ nọ u wuzou re a sae jọ odibo ẹrọwọ Jihova họ ẹrorọsuọ eruẹrẹfihotọ riẹ. Ovo jọ rai họ iwuhrẹ ukoko na. Ikereakere na e ta udu họ omai awọ nọ ma rri rai vo ho. (Ahwo Hibru 10:23-25) Enọ e rrọ Isẹri ẹrọwọ Jihova kri no a dao oma gaga no re a hae jọ iwuhrẹ ẹsikpobi kugbe ibe egegagọ. Evaọ iwuhrẹ enana, eriariẹ mai kpahe Ikereakere na i re vihọ. Ofariẹ, ovuhumuo mai kẹ izẹme nọ ma riẹ ziezi e rẹ rro, yọ ẹriẹ kpahe idhere nọ ma re ro fi ai họ iruo e vẹ jẹ da viere. U re si omai kẹle inievo Ileleikristi mai viere evaọ okugbe egagọ, ma ve je wo ẹgba nọ ma re ro ru oreva Ọghẹnẹ. Ẹzi Jihova ọ rẹ kẹ ọkpọvio ẹkwoma ukoko na, yọ ẹkwoma ẹzi na, Jesu ọ rrọ udevie mai.—Matiu 18:20; Eviavia 3:6.
5. Okenọ a tẹ whaha iruo Isẹri Jihova, eme a re ru kpahe iwuhrẹ?
5 Kọ who bi kpohọ iwuhrẹ na kpobi ẹsikpobi, kọ who bi fi eware nọ who yo na họ iruo kẹ omobọ ra? Ẹsejọ, nọ a tẹ whaha iruo Isẹri Jihova, o rẹ gwọlọ nọ a ru iwuhrẹ na evaọ ẹkuẹko esese evaọ iwou ahwo. Eria gbe oke e rẹ sai nwene, yọ ẹsejọ e rẹ sai kiehọ oma tere he, a re ru iwuhrẹ jọ evaọ udevie aso. Rekọ ghele idhọvẹ omobọ ohwo hayo enwoma, inievo emezae gbe emetẹ nọ i wo ẹrọwọ a rẹ dao oma gaga re a ruẹ nọ a nya ziọ iwuhrẹ na kpobi.
6. Ẹvẹ ma re ro dhesẹ eva nọ ma fihọ Jihova, kọ ẹvẹ onana o sai ro fi obọ họ k’omai gbẹ ta ẹme avọ aruọwha?
6 A rẹ sae bọ ẹrorọsuọ Jihova ẹkwoma ẹnya bru ei ẹsikpobi evaọ olẹ, vuhumu inọ ma gwọlọ obufihọ Ọghẹnẹ. Kọ who bi ru ere? Jesu o je dhe ẹlẹlẹ evaọ oke odibọgba otọakpọ riẹ. (Luk 3:21; 6:12, 13; 22:39-44) Yọ evaọ aso taure a tẹ te kare iẹe, ọ ta udu họ ilele riẹ awọ nọ: “Roro wha lẹ re wha siọ ẹdawọ ba ẹruọ.” (Mak 14:38) Ma tẹ nya ku ababọ isiuru kpahe ovuẹ Uvie na, odawọ re ma dina si oma kpemu evaọ odibọgba mai o rẹ sae rehọ oma via. Ahwo a te bi se omai ẹkoko hayo kpokpo omai, ma rẹ sae gwọlọ fibo re ma ruẹse whaha ebẹbẹ. Rekọ ma tẹ lẹ kẹ ẹzi Ọghẹnẹ re o fi obọ họ k’omai gbẹ ta ẹme riẹ avọ aruọwha, ma rẹ sai wo uketha no ekie kẹ edawọ eyena.—Luk 11:13; Ahwo Ẹfẹsọs 6:18-20.
Okerefihotọ Isẹri Ise Aruọwha
7. (a) Fikieme ekere nọ ọ rrọ obe Iruẹru na o jẹ rrọ uvi isiuru k’omai? (b) Kẹ uyo enọ nọ e rrọ oka edhe-ẹme ọnana, dhesẹ epanọ evuẹ nana e sae rọ k’omai erere.
7 Okerefihotọ nọ ọ rrọ obe Iruẹru na o rrọ isiuru obọdẹ k’omai kpobi. O ta kpahe oghẹrẹ nọ ikọ na gbe ilele ọsosuọ efa—ahwo nọ a wo iroro wọhọ emai—a ro fi ezadhe kpare obọ je dhesẹ via nọ a rrọ isẹri ẹrọwọ Jihova. Joma kiẹ abọjọ ekere ọyena rri avọ obufihọ enọ gbe ikereakere nọ i lele i rie na. Nọ ma bi ru ere na, roro epanọ whọ sai ro wo erere no oware nọ who bi se na ze.
Kọ ikọ na yọ ahwo nọ a riẹ obe gaga? Kọ a jọ ahwo nọ a ma avọ ababọ ozọ, makọ oware nọ o via kpobi? ( Jọn 18:17, 25-27; 20:19; Iruẹru 4:13)
Eme o fi obọ họ kẹ Pita ta ẹme avọ aruọwha evaọ aro ogbẹgwae ahwo Ju nọ i bru kpe Ọmọ obọ Ọghẹnẹ? (Matiu 10:19, 20; Iruẹru 4:8)
Eme ikọ na a je ru evaọ eka nọ i kpemu na taure a tẹ te rehọ ai ziọ aro ogbẹguae Sanhẹdrin na? (Iruẹru 1:14; 2:1, 42)
Okenọ isu na e kpa okpa họ ikọ na obọ nọ a gbẹ rehọ odẹ Jesu ta usiuwoma ha, didi uyo Pita avọ Jọn a kẹ? (Iruẹru 4:19, 20)
Nọ a si obọ no ai no, ono ikọ na a wariẹ rehọ ẹro so kẹ obufihọ? Kọ a lẹ re ukpokpoma na u se eri họ orẹ, manikọ ẹvẹ a ru? (Iruẹru 4:24-31)
Ẹkwoma eme Jihova ọ rọ rehọ obufihọ ze okenọ ewegrẹ e jẹ dao oma whaha iruo usiuwoma ota na? (Iruẹru 5:17-20)
Ẹvẹ ikọ na i ro dhesẹ nọ a wo otoriẹ oware nọ a ro si obọ no ai? (Iruẹru 5:21, 41, 42)
Dede nọ ilele na buobu e vaha abọ fiki ukpokpoma, eme a gbe je ru? (Iruẹru 8:3, 4; 11:19-21)
8. Didi iyẹrẹ isiuru i no odibọgba ilele ọsosuọ na ze, kọ ẹvẹ u ro kpoma họ omai?
8 Iruo ẹta usiuwoma na o jọ ufofe he. Enwenọ ilele 3,000 a họ-ame evaọ Pẹntikọst 33 C.E. “Enọ e rọwo i te je vi kẹ Ọnowo na, otu buobu e rọ ezae avọ e rọ eyae.” (Iruẹru 2:41; 4:4; 5:14) Ukuhọ riẹ, makọ Sọl ọrọ Tasọs, ọnọ o je kpokpo ahwo Ọghẹnẹ gaga vẹre, o zihe ruọ Oleleikristi, o te muọ isẹi họ ese kẹ uzẹme na avọ aruọwha. A tẹ te riẹe wọhọ Pọl ukọ na. (Ahwo Galesha 1:22-24) Iruo nọ i muhọ evaọ ikpe udhusoi ọsosuọ na i ti kuhọ họ. E nya họ aro gaga no evaọ edẹ urere nana yọ u te abọ otọakpọ na soso no. Ma wo uvẹ-ọghọ nọ ma be rọ jariẹ w’obọ, yọ nọ ma bi ru ere na, ma rẹ sai wuhrẹ no oriruo isẹri omarokpotọ erọ oke nọ u kpo emu ze.
9. (a) Didi uvẹ Pọl o je ro se isẹri? (b) Idhere vẹ who bi ro whowho ovuẹ Uvie na kẹ amọfa?
9 Okenọ Pọl o wuhrẹ uzẹme na kpahe Jesu Kristi no, eme o ru? “Ọ tẹ nwane . . . mu odẹ Jesu họ eworo via . . . nnọ, ‘Ọ yehọ Ọmọ Ọghẹnẹ na.’ ” (Iruẹru 9:20) O wo ovuhumuo kẹ aruoriwo Ọghẹnẹ rọ kẹe, o te je vuhumu inọ ohwo kpobi ọ gwọlọ usiuwoma nọ u te rie obọ no na. Pọl ọ jọ ohwo Ju, yọ wọhọ epanọ uruemu okioye o jọ, o je kpohọ uwou egagọ-ode na re o se isẹri. Ọ ta usiuwoma n’uwou ruọ uwou re, jẹ jiroro kugbe ahwo evaọ eria eki. Yọ u no rie eva ze re ọ kwa kpohọ ekwotọ ekpokpọ efa re ọ ta usiuwoma na.—Iruẹru 17:17; 20:20; Ahwo Rom 15:23, 24.
10. (a) Ẹvẹ Pọl o ro dhesẹ nọ, dede nọ ọ wharo, o je dhesẹ orimuo evaọ oghẹrẹ nọ o je ro se isẹri? (b) Ẹvẹ ma sai ro dhesẹ ọkpọ ekwakwa Pọl na evaọ okenọ ma te bi se isẹri kẹ imoni, ibe-iruiruo, hayo ibe-isukulu mai?
10 Pọl ọ wharo rekọ o dhesẹ uruemu orimuo re, epanọ u fo nọ ma rẹ jọ re na. Ọ ta ẹme kẹ ahwo Ju kpahe eyaa nọ Ọghẹnẹ ọ yaa kẹ esẹ rai. Rọkẹ ahwo Griki ọ ta kpahe eware nọ a riẹ vevẹ ziezi. Ẹsejọ ọ rehọ oghẹrẹ nọ o ro wo uzẹme na wọhọ edhere nọ o re ro se isẹri. Ọ ta nọ: “Fiki usiuwoma na me ro ru eware enana kpobi re mẹ sai ru ẹkẹ abọ mẹ eva eva riẹ.”—1 Ahwo Kọrint 9:20-23; Iruẹru 22:3-21.
11. (a) Eme Pọl o je ru re ọ whaha ovao nọ o re ro dhe otu ewọsuọ ẹsikpobi? (b) Okevẹ ma rẹ sae rọ rehọ areghẹ rehọ aro kele oriruo Pọl na, kọ evaọ oghẹrẹ vẹ? (c) Bovẹ ogaga nọ a rẹ rọ ruẹ abọ họ usiuwoma ota avọ aruọwha u re no tha?
11 Okenọ ọwọsuọ o te ru ei wọhọ nọ o mai woma re ọ jọ oria ofa ta usiuwoma tao, Pọl o ru ere ukpenọ ọ rẹ rọ ọgbahọ rehọ ovao dhe otu ọkparesuọ unuẹse buobu. (Iruẹru 14:5-7; 18:5-7; Ahwo Rom 12:18) Rekọ ọ dhẹ omovuọ usiuwoma na ha. (Ahwo Rom 1:16) Dede nọ uye nọ ahwo ọwọsuọ—tubọ erọ ozighi dede—a jẹ kẹe o jẹ wha evawere se Pọl ho, o “wo udu evaọ Ọghẹnẹ” nọ ọ gbẹ rọ ruẹ abọ họ usiuwoma ota. Ọ ta nọ: “Ọnowo na o dikihẹ gba omẹ ọ tẹ kẹ omẹ ogaga ro woro ẹme na gbagba.” (1 Ahwo Tẹsalonika 2:2; 2 Timoti 4:17) Jesu, Ọnowuzou ukoko Ileleikristi na, ọ gbẹ be kẹ ogaga nọ ma gwọlọ re ma sai ru iruo nọ ọ ruẹaro riẹ kpahe edẹ mai na.—Mak 13:10.
12. Eme ọ rẹ kẹ imuẹro aruọwha Oleleikristi, kọ eme ọ rẹ kẹ omai udu nana?
12 Ma wo ẹjiroro kpobi nọ ma rẹ rọ ruẹ abọ họ ẹta ẹme Ọghẹnẹ avọ aruọwha, wọhọ epanọ Jesu gbe idibo Ọghẹnẹ efa nọ i wo ẹrọwọ evaọ ikpe-udhusoi ọsosuọ na a ru na. Orọnikọ onana u dhesẹ nọ ma rẹ jọ ababọ ororokẹ hayo gwọlọ gba ovuẹ na họ enọ e gwọlọ e riẹ hẹ oma ha. Rekọ ma re se eri họ họ fikinọ ahwo a wo isiuru hu; hayo kọ ma rẹ fare unu mai fikiọ ọwọsuọ họ. Wọhọ Jesu, ma rẹ riobọhọ Uvie Ọghẹnẹ wọhọ egọmeti nọ o fo kẹ otọakpọ na soso. Ma rẹ ta ẹme avọ udu keme ma dikihẹ kẹ Jihova, Osu Ehrugbakpọ na, gbe fikinọ ovuẹ nọ ma be vuẹ na obọ mai u nọ ze he, rekọ obọ riẹ. Yọ u fo re uyoyou mai kẹ Jihova o jọ ọwhọ nọ ọ mae ga nọ ma re ro jiri iei.—Ahwo Filipai 1:27, 28; 1 Ahwo Tẹsalonika 2:13.
Eme Ọkiẹkpemu
• Fikieme u je wuzou re ma ghale ovuẹ Uvie na kugbe ohwo kpobi, rekọ didi iruemu ma re rẹro rai?
• Ẹvẹ ma sai ro dhesẹ nọ ma be rehọ ẹro so ẹgba obọ mai rọ gọ Jihova ha?
• Didi iwuhrẹ eghaghae ma re wuhrẹ no obe Iruẹru na ze?
[Iwoho nọ e rrọ ẹwẹ-obe avọ 173]
Wọhọ epaọ oke anwae, idibo Jihova nẹnẹ a be ta ẹme Ọghẹnẹ avọ aruọwha