Oware Nọ Emọ E Gwọlọ Mi Esẹgbini

ESẸGBINI kpobi a re wo obọ evaọ eruo oware jọ nọ u gbunu gaga. Aimava a rẹ zọhọ abọ rai jọ ze. U ve ru nọ ohwo nọ ọ rrọ uzuazọ ọ rẹ rọ jọ evaọ oni na rro. Fikiere, u gbunu hu inọ okenọ a te yẹ ọmọ, ahwo a rẹ ta nọ onana yọ “igbunu ọrọ eyẹ.”

Uzẹme, eyẹ ọmọ yọ emuhọ gheghe ọrọ owha-iruo esẹgbini. Eva oke ọsosuọ, erugba ẹgwọlọ emọ ahwo-akpọ o rẹ roma hwa ọsẹgboni na, rekọ nọ a be rro na, a rẹ gwọlọ vi ẹruorote iwo. A gwọlọ obufihọ re a sae rro evaọ iroro, uruemu, gbe abọ-ẹzi.

Re emọ e sae rro ziezi, a gwọlọ uyoyou esẹgbini. Dede nọ o rrọ oja re a ta eme uyoyou kẹ ọmọ, u fo re a rọ iruo dhesẹ iẹe via. Ẹhẹ, emọ e gwọlọ emamọ oriruo ọsẹgboni. A gwọlọ ọkpọvio uruemu, ehri-izi nọ a re lele. Yọ a gwọlọ izi enana no emọfofa ze. Eware idhọvẹ buobu e rẹ sae via evaọ okenọ a gbẹ kaki fi obọ họ kẹ emọ họ bẹsenọ a rẹ rọ va abọ no.

Ebaibol na a rẹ jọ ruẹ ehri-izi nọ e mai woma kpobi. A rẹ ruẹ obọ ithubro nọ e rrọ Ebaibol na ha. Ẹkwoma ithubro yena, emọ e rẹ ruẹ nnọ eme nọ a be ta kẹ ae na yọ eme nọ i no obọ Ọnọma rai ze, Ọsẹ obọ odhiwu rai, orọnikọ eme ọ ohwo-akpọ jọ họ. Onana o rẹ lẹliẹ ohrẹ na wo ẹgba nọ a rẹ ruẹ obọ riẹ hẹ.

Ebaibol na e ta udu họ esẹgbini awọ re a ru iruo gaga re a bọ ehri-izi egbagba fihọ iroro emọ rai. Rekọ, nọ emọ e be rro na, o rẹ jọ bẹbẹ kẹ esẹgbini re a lele ai ta ẹme kpahe eware nọ e mae rrọ oja. A kporo obe nana, Wuhrẹ Mi Owuhrẹ Ologbo Na, re u fi obọ họ whaha ẹbẹbẹ ọyena. O te kẹ owhẹ avọ emọ ra eme abọ-ẹzi nọ wha re se kugbe. Rekọ tube vi ere, o rẹ jọ oware nọ emaha na gbe enọ i bi se obe na kugbe ai a rẹ rọ ta ẹme kugbe.

Who ti mu ẹro họ nnọ obe nana o gwọlọ nọ emaha na a rẹ kpahe ẹme. A kporo enọ buobu fihọ obe na. Whọ tẹ nya te enọ nana, whọ te ruẹ usi na (—). Onana yọ ẹkareghẹhọ inọ who re dhizu whọ vẹ ta udu họ ọmọ na awọ re ọ kpahe ẹme. O rẹ were emọ re a kẹ ai uvẹ kpahe ẹme. Uvẹ oyena o gbẹ riẹ hẹ, isiuru emọ na o rẹ dhẹ no etẹe vẹrẹ vẹrẹ.

Tubẹ mae rro, enọ nana i ti fi obọ họ kẹ owhẹ riẹ oware nọ o rrọ iroro ọmọ na. Uzẹme, ẹsejọ ọmọ na ọ sae kpahe uyo nọ o gba ha. Rekọ a ruẹrẹ eme nọ a kere lele onọ na họ re i fi obọ họ kẹ ọmọ na riẹ epanọ a re ro roro ziezi.

Abọ obọdẹ jọ obe nana họ iwoho riẹ nọ i bu vi 230 na. A kere eme kẹle ibuobu rai nọ o rẹ lẹliẹ ọmọ na ta oware nọ o rrọ iroro riẹ no oware nọ ọ ruẹ je se na ze. Fikiere whẹ avọ ọmọ na a rẹ kiẹ iwoho na kugbe. I ti fi obọ họ gaga wuhrẹ ọmọ na, e te jẹ lẹliẹ uwuhrẹ na te ọmọ na udu.

Ọmọ na ọ tẹ riẹ ese no, ta udu họ iẹe awọ re o se obe na kẹ owhẹ jẹ kẹ omobọ riẹ. Epanọ o se rie te, ere emamọ ohrẹ riẹ o te nya te udu gbe iroro riẹ te. Re ọgbakugbe uyoyou gbe adhẹẹ nọ ọ rrọ udevie rai imava ọ ga vi ere, dao oma se obe na kugbe i, je ru ei ẹsikpobi.

Emaha e rẹ sae ruẹ ọfariẹ-ogbe, iruẹru-imizi, gbe iruemu etọtọ efa, eware nọ ahwo a tẹ ruẹ vẹre a ve bo. Fikiere a gwọlọ uketha, yọ obe nana u re fi obọ họ rehọ iẹe kẹ ai evaọ edhere ọghọ. Ghele na, oware nọ emọ e mae gwọlọ họ re a kpọ ae bru Ehri areghẹ kpobi, Ọsẹ obọ odhiwu mai, Jihova Ọghẹnẹ. Oye họ oware nọ Jesu, Owuhrẹ Ologbo na, o ru ẹsikpobi. O rrọ irẹro mai inọ obe nana u ti fi obọ họ kẹ owhẹ gbe uviuwou ra bọ izuazọ rai re wha sae were Jihova, avọ eghale ebẹdẹ bẹdẹ nọ i ti te owhai.