Uzou Avọ 17

“Wha Rọ Orọwọ Ọrẹri Rai Yọrọ Oma Rai Whẹro”

‘Wha rọ orọwọ ọrẹri rai yọrọ oma rai whẹro, . . . re wha sae daji uyoyou Ọghẹnẹ.’—JUD 20, 21.

1, 2. Iruo ebabọ vẹ whọ be jọ w’obọ, kọ fikieme oghẹrẹ nọ who ru iruo na woma te o jẹ r’oja?

WHỌ be rehọ ẹgba ra kpobi ru iruo evaọ uwou nọ whọ be bọ. U kri no nọ whọ be rọ bọ uwou na, yọ uwou na u ti re kẹle he. Anwẹnọ who ro mu iruo na họ, iruo na e rẹ gaga, ghele na whọ be jọ iruo na wo evawere. Ghelọ oware kpobi nọ o via kẹhẹ, whọ gba riẹ mu nnọ whọ rẹ dadamu iruo na, keme oghẹrẹ nọ who ru iruo na woma te u ti kpomahọ uzuazọ ra, makọ obaro ra. Fikieme? Keme whẹ omara họ uwou na.

² Jud olele na o fiẹgba họ nọ ma rẹ bọ oma mai ga. Nọ ọ tuduhọ Ileleikristi awọ nọ a ‘daji uyoyou Ọghẹnẹ,’ ọ jọ oria Ebaibol ovona dhesẹ oware nọ u re fi obọ họ kẹ ai ru ere inọ: “Wha rọ orọwọ ọrẹri rai yọrọ oma rai whẹro.” (Jud 20, 21) Idhere jọ vẹ whọ sae rọ bọ oma ra ga, ru ẹrọwọ ra ga ziezi re whọ sae daji uyoyou Ọghẹnẹ? Joma ta ẹme kpahe abasa ọrọ ebabọ abọ-ẹzi nọ i re fi obọ họ kẹ owhẹ bọ ẹrọwọ ra ga ziezi.

HAE RỌ IZI IKIẸRẸE JIHOVA BỌ ẸRỌWỌ RA GA

3-5. (a) Ẹvẹ Setan ọ gwọlọ inọ who rri izi ikiẹrẹe Jihova? (b) Ẹvẹ u fo nọ ma rri izi Ọghẹnẹ, kọ eme e rẹ kẹ omai? Kẹ oriruo.

³ Orọ ọsosuọ, ma re fi eva họ izi Ọghẹnẹ. Whọ jọ obe nana wuhrẹ kpahe izi ikiẹrẹe Jihova buobu no, enọ e ta kpahe uruemu. Ẹvẹ who rri rai? O te were Setan re ọ viẹ owhẹ họ rri izi, ehri-izi, gbe itee Jihova wọhọ nọ e ga hrọ. Ọ be rehọ ẹghẹ nana ru iruo anwẹnọ ọ rọ ruẹ nọ u ru ẹjiroro riẹ gba evaọ Idẹn. (Emuhọ 3:1-6) Kọ ẹghẹ riẹ nana o ti su owhẹ thọ? Uruemu ra oye u ti dhesẹ sọ o te jọ ere.

⁴ Wọhọ oriruo: Nọ whọ be nya ọgbọ owoma jọ wariẹ, whọ tẹ ruẹ nọ a diogba ukpekpehru jọ ro bru abọ riẹ jọ dhe. Rekọ o wọhọ nọ abọ ogba na nọ a bru dhe na o mai woma. Evaọ oke ọsosuọ, eva ogba na nọ a di na o te dh’owhẹ keme whọ hae gwọlọ nya ruọ abọ obei riẹ. Rekọ nọ who rri ogba nọ a di na lafi, whọ tẹ ruẹ okpohrokpo nọ ọ rrọ whẹvu nọ ọ be bẹbẹ arao jọ. Obọnana whọ tẹ ruẹ ẹjiroro nọ a ro di ogba na—re o thọ ahwo no enwoma. Kọ arao ojihẹ jọ ọ be bẹbẹ owhẹ enẹna? Ebaibol e vẹvẹ unu nọ: “Jaja aro vi, he roro. Ọwegrẹ ra ukumuomu na, ọ [wọhọ okpohrokpo] nọ obi do enu, be guọlọ ọjọ nọ ọ rẹ ria.”—1 Pita 5:8.

⁵ Setan yọ arao-ojihẹ omuomu. Fikinọ Jihova ọ gwọlọ nọ Setan o mu omai rehọ họ, O fi izi họ nọ e rẹ thọ omai no eghẹ sa-sa erọ oyoma na. (Ahwo Ẹfẹsọs 6:11) Fikiere oke kpobi nọ ma roro kpahe izi Ọghẹnẹ, u fo re ma rri rai wọhọ uyoyou nọ Ọsẹ obọ odhiwu mai o wo kẹ omai. Ma te rri izi Ọghẹnẹ ere, ma te ruẹ nọ e rẹ kẹ omai omofọwẹ gbe evawere. Jemis olele na o kere nọ: “Rekọ ọnọ oriwi e ruọ eva uzi ufuoma nọ o gba kiete na, ọ vẹ yahiẹe, . . . ohwo ọnana o re ti wo oghale eva iruo riẹ.”—Jemis 1:25.

6. Edhere vẹ ọ mai woma nọ who re ro dhesẹ nọ who fi eva họ izi ikiẹrẹe Ọghẹnẹ? Kẹ oriruo jọ.

⁶ Ekoko ijaje Ọghẹnẹ họ edhere nọ ọ mai woma nọ ma re ro dhesẹ nnọ ma gine fi eva họ Ọkẹ-Izi na jẹ rọ ere dhesẹ nọ izi riẹ i fo. Wọhọ oriruo, “uzi Kristi na” o kẹre te ujaje Jesu inọ ma wuhrẹ amọfa ‘eware kpobi nọ ọ vuẹ omai.’ (Ahwo Galesha 6:2; Matiu 28:19, 20) Ileleikristi a te je se ujaje na gboja, onọ o ta nọ ma hai kuomagbe re ma ruẹse gọ Ọghẹnẹ jẹ bọ ohwohwo ga. (Ahwo Hibru 10:24, 25) Ujaje Ọghẹnẹ o tẹ jẹ kẹre te uduotahawọ na inọ ma lẹ se Jihova ẹsikpobi jẹ hae lẹ no udu ze. (Matiu 6:5-8; 1 Ahwo Tẹsalonika 5:17) Ma te bi koko ijaje yena, ma te ruẹ vevẹ inọ e vọ avọ uyoyou. Ekoko ijaje na e rẹ kẹ omai evawere gbe evevọwẹ nọ ma rẹ sai wo no akpọ idabolo nana ze he. Nọ who bi roro kpahe irere nọ who wo no ekoko izi Ọghẹnẹ ze no na, kọ eva nọ who fihọ ijaje na e gbẹ be ga vi epaọ ọsosuọ?

7, 8. Didi uduotahawọ Ebaibol e kẹ enọ e be ruawa inọ a sai ti koko izi Ọghẹnẹ hẹ nọ oke o be nyaharo na?

⁷ Ahwo jọ a re brudu inọ o te jọ bẹbẹ gaga re a koko izi Jihova nọ oke o be nyaharo na. Ozọ u re mu ai nọ ẹsejọhọ a te gbẹ sai koko izi Ọghẹnẹ hẹ. Otẹrọnọ oma o rẹ j’owhẹ ere ẹsejọ, roro kpahe eme nana: “Mẹ họ ỌNOWO na Ọghẹnẹ ra, ọnọ o wuhrẹ owhẹ wo erere, ọnọ osu owhẹ nya edhere nọ o fo ẹnya. O whọ hae yo ijaje mẹ, udhedhẹ ra o hae jọ wọhọ ethẹ, ẹrẹreokie ra ọ hae jọ wọhọ ẹkporo abade.” (Aizaya 48:17, 18) Kọ who dhizu no ẹdẹjọ re who roro kpahe epanọ eme yena e rrọ omosasọ te?

⁸ Jihova ọ jọ ikere yena kareghẹhọ omai inọ ma re wo erere nọ ma te bi yoẹme kẹe. Ọ ya eyaa eghale ivẹ nọ i ti te omai otẹrọnọ ma ru ere. Orọ ọsosuọ, udhedhẹ mai o te jọ wọhọ ethẹ—koyehọ, ma ti wo udhedhẹ ziezi, o vẹ te jẹ jọ ribri. Orọ avivẹ, ẹrẹreokie mai ọ te jọ wọhọ ẹkporo abade. Who te dikihẹ akotọ abade bi rri ẹkporo nọ o bi fi, whọ rẹ jọ oma ra riẹ nọ ere ọvo o te jọ. Whọ riẹ nọ ere ọvo ẹkporo na o bi ti fi bẹdẹ bẹdẹ. Jihova ọ be ta nọ ẹrẹreokie ra ọ sae jọ bẹdẹ bẹdẹ. Whọ tẹ dadamu nọ ọye ọvo whọ rẹ gọ, ọ te se owhẹ ba ha. (Olezi 55:22) Kọ emamọ eyaa itieye na e gbẹ be lẹliẹ eva nọ who fihọ Jihova gbe izi ikierẹe riẹ ga vi epaọ ọsosuọ?

“DAOMA RRO KPAKO”

9, 10. (a) Fikieme ẹkpako abọ-ẹzi o rọ rrọ obọdẹ utee kẹ Ileleikristi? (b) Ẹvẹ eware abọ-ẹzi nọ ma re se gboja o rẹ rọ wha evawere se omai?

⁹ Pọl o dhesẹ oware avivẹ nọ u re fi obọ họ kẹ omai bọ ẹrọwọ mai ga inọ: “Daoma rro kpako.” (Ahwo Hibru 6:1, NW) Ẹkpako abọ-ẹzi yọ obọdẹ utee nọ Oleleikristi o re le. Wo ohẹriẹ no ẹgbagba, onọ ahwo-akpọ a rẹ sai le t’obọ enẹna ha, ẹkpako abọ-ẹzi yọ utee nọ ohwo ọ rẹ sai le t’obọ. Ofariẹ, epanọ Ileleikristi a kpako te evaọ abọ-ẹzi, ere oghọghọ nọ a rẹ jọ ẹgọ Jihova wo o rẹ rro te. Ẹvẹ o rọ rrọ ere?

¹⁰ Oleleikristi nọ ọ kpako o re rri eware wọhọ epanọ Jihova o re rri rai. (Jọn 4:23) Pọl o kere nọ: “Keme enọ ibi lele uwo e rẹ kezọ eware iwo, rekọ enọ ibi lele Ẹzi e rẹ kezọ eware Ẹzi re.” (Ahwo Rom 8:5) Ohwo nọ o wo eriwo abọ-ẹzi hi ọ rẹ wereva tere he, keme omobọ riẹ ọvo o re roro kpahe, o re rri kparo ho, yọ ekwakwa abọ-iwo ọvo ọ rẹ tẹrovi. Ohwo nọ o se eware abọ-ẹzi gboja ọ rẹ wereva keme ọ tẹrovi Jihova, ‘Ọghẹnẹ evawere na.’ (1 Timoti 1:11) O rẹ were ohwo nọ o se eware abọ-ẹzi gboja re o ru eva were Jihova, yọ ọ rẹ wereva ọ tẹ make rrọ otọ ẹdawọ. Fikieme? Edawọ e rẹ kẹ omai uvẹ nọ ma re ro dhesẹ Setan fihọ ọtọrue, jẹ rọ ere dhesẹ ẹgbakiete mai, yọ onana o rẹ wha evawere se Ọsẹ obọ odhiwu mai.—Itẹ 27:11; Jemis 1:2, 3.

11, 12. (a) Eme Pọl ọ ta kpahe “ẹgba ovuhumuo” ọrọ Oleleikristi, kọ eme họ otofa ẹme nọ a fa “wuhrẹ” na? (b) Ẹvẹ a re ro wuhrẹ oma na re o sai ru iruo ziezi?

¹¹ Ohwo nọ ọ gwọlọ kpako evaọ abọ-ẹzi o re wuhrẹ. Roro kpahe owọ Ebaibol nana: “Emu ọgaga ọ rrọ kẹ ahwo nọ a kpako no, rọkẹ enọ i wuhrẹ ẹgba ovuhumuo rai ẹkwoma eroruiruo riẹ re a vuhu uwoma gbe uyoma.” (Ahwo Hibru 5:14, NW) Nọ Pọl ọ t’ẹme kpahe ẹgba ovuhumuo mai nọ ma re “wuhrẹ,” ubiẹme Griki nọ ọ rọ t’ẹme na u tho onọ a jẹ hae rọ t’ẹme evaọ afe-aruọzaha ọrọ Griki evaọ ikpe-udhusoi ọsosuọ, keme a rẹ sae fa ẹme na wọhọ ‘oghẹrẹ uwuhrẹ nọ a re wuhrẹ ohwo nọ o re duola vre kurẹriẹ.’ Dai roro kpahe oware nọ uwuhrẹ utioye na o gwọlọ.

¹² Okenọ a yẹ omai obọ, ma jẹ sai ru oware ovo ho. Wọhọ oriruo, ọmọ ọ rẹ sae kpọ abọ gbe awọ riẹ hẹ. Fikiere, ọmọ o re mu abọ veghe, tubẹ rehọ abọ fa ovao obọriẹ dede, ẹsejọ ọ vẹ kpare oviẹ. Ẹmẹrera, nọ ọmọ na ọ be rehọ abọ sa-sa oma na ru iruo na, o ve ti wuhrẹ oma na no. Ọmọ na o ve muhọ esi, muhọ edikihẹ, je muhọ ẹnya.a Kọ ẹvẹ kpahe ohwo nọ o re duola kpehru vre kurẹriẹ? Whọ tẹ ruẹ ohwo nọ o duola kpehru, be jọ ehru na vre kurẹriẹ unuẹse buobu, je kie dikihẹ gbẹsinẹdẹ, avro ọ riẹ hẹ inọ ohwo na o wuhrẹ oma riẹ ziezi no. Orọnikọ o gbinẹrọ ze ẹdẹjọ o ro wo ona yena ha—ọ raha oke buobu ro wuhrẹ oma riẹ. Wọhọ epanọ Ebaibol na e ta, oma nọ a re wuhrẹ oghẹrẹ utiọye “u wo erere jọ kẹ oma na.” Rekọ ẹgba ovuhumuo mai nọ ma re wuhrẹ o rẹ mae kẹ erere.—1 Timoti 4:8.

13. Ẹvẹ ma sai ro wuhrẹ ẹgba areghẹ mai?

¹³ Ma jọ obe nana t’ẹme kpahe eware buobu nọ i re fi obọ họ kẹ owhẹ wuhrẹ ẹgba areghẹ ra no re whọ sae gọ Jihova ziezi wọhọ ohwo nọ ọ kpako evaọ abọ-ẹzi. Roro didi kpahe izi gbe ehri-izi Ọghẹnẹ re whọ jẹ lẹ kpahe ae nọ whọ tẹ be jiroro kẹdẹ kẹdẹ. Evaọ iroro nọ whọ be jẹ kpobi, nọ oma ra nọ: ‘Izi gbe ehri-izi Ebaibol vẹ i kiekpahe ẹme nana? Ẹvẹ mẹ sai ro fi ai họ iruo? Eme o ti ru eva were Ọsẹ obọ odhiwu mẹ?’ (Itẹ 3:5, 6; Jemis 1:5) Nọ who te wo ehri-izi Ebaibol họ udu be rọ jiroro, u ti fi obọ họ kẹ owhẹ riẹ oware nọ u woma gbe onọ u yoma. Ewuhrẹ otiọye na o ti fi obọ họ kẹ owhẹ jọ ohwo nọ o se eware abọ-ẹzi gboja.

14. Isiuru vẹ u fo nọ ma re wo re ma ruẹse rro evaọ abọ-ẹzi, rekọ uruemu vẹ u fo nọ ma rẹ yọroma kẹ?

¹⁴ Dedenọ ohwo ọ tẹ rro te oria jọ no a ve dhesẹ iẹe nọ ọ kpako no, orro abọ-ẹzi u wo umuo ho. Re ohwo ọ ruẹse rro, ọ rẹ re emu. Oye jabọ nọ Pọl o ro kere nọ: “Emu ọgaga ọ rrọ kẹ ahwo nọ a kpako no.” Oware jọ nọ u re fi obọ họ kẹ owhẹ bọ ẹrọwọ ra ga họ emu ọgaga abọ-ẹzi nọ whọ rẹ re ẹsikpobi. Nọ who te bi fi eware nọ who bi wuhrẹ họ iruo ziezi, oye họ areghẹ, yọ Ebaibol e ta nọ: ‘Areghẹ họ oware nọ o mai wuzou.’ Fikiere, u fo re ma wo uvi isiuru kẹ eware ezi nọ Ọsẹ mai o bi wuhrẹ omai. (Itẹ 4:5-7; 1 Pita 2:2) Eriariẹ gbe areghẹ nọ ma wo no obọ Ọghẹnẹ ze e rẹ lẹliẹ omai fu uke he. U fo nọ ma rẹ kiẹ oma mai riwi ẹsikpobi re ma siọ omorro hayo ekpehre iruemu efa ba ewo. Pọl o kere nọ: ‘Wha hae dawo sọ wha rrọ ẹrọwọ na, wha hai dhesẹ ohwo nọ wha rrọ.’—2 Ahwo Kọrint 13:5.

15. Fikieme uyoyou o jẹ roja kẹ ẹnyaharo abọ-ẹzi?

¹⁵ A tẹ make bọ uwou re no, iruo e rẹ gbẹ jariẹ ghele. A rẹ rẹrote uwou na jẹ jariẹ ruẹrẹ eware nọ e raha, yọ oke o be nyaharo na, o sae gwọlọ nọ a bọ ibro-iwou efa fihọ uwou na. Eme o gwọlọ re ma sae rro kpako evaọ abọ-ẹzi jẹ yọrọ edikihẹ abọ-ẹzi mai? Oware ọsosuọ họ, uyoyou. U fo re uyoyou nọ ma wo kẹ Jihova gbe ibe Ileleikristi mai o hai dhe ẹgẹga. Ma gbe wo uyoyou hu, eriariẹ gbe iruo mai kpobi e te jọ ifofe—wọhọ edo okpomoku ofofe. (1 Ahwo Kọrint 13:1-3) Ma te wo uyoyou, ma te sae jọ Ileleikristi nọ e kpako ziezi jẹ rro haro evaọ abọ-ẹzi.

FI UDU RA HỌ ẸRUORE NỌ JIHOVA Ọ YA EYAA RIẸ

16. Oghẹrẹ iroro vẹ Setan o bi ru ahwo wo, kọ eme Jihova ọ kẹ omai nọ o rẹ thọ omai?

¹⁶ Joma t’ẹme kpahe abọ ọfa jọ ọrọ iruo ebabọ ra. Re whọ sae jọ uvi olele Jesu, o gwọlọ nọ whọ rẹ kpọ iroro ra. Setan, osu akpọ nana, o wo ona nọ ọ rẹ rọ viẹ ahwo họ wo iroro ethọthọ, kare ẹruore, je ru nọ ohwo o gbe fi eva họ amọfa ha. (Ahwo Ẹfẹsọs 2:2) Iroro itieye e vọ avọ enwoma kẹ Oleleikristi, wọhọ epanọ ehẹhẹ e rrọ kẹ uwou nọ a rehọ ire bọ na. O rrọ oware evawere inọ Jihova ọ kẹ omai oware jọ nọ o rẹ thọ omai, oye họ ẹruore.

17. Ẹvẹ Ebaibol na i dhesẹ epanọ ẹruore o wuzou te?

¹⁷ Ebaibol na e fodẹ abọ sa-sa ọrọ ẹgọ-ẹmo abọ-ẹzi nọ ma gwọlọ evaọ ohọre mai wọso Setan avọ akpọ nana. Abọjọ ẹgọ-ẹmo nana nọ o wuzou họ etu na, koyehọ “ẹruore usiwo.” (1 Ahwo Tẹsalonika 5:8) Ọgbaẹmo evaọ oke anwae ọ riẹ nọ ababọ etu-ẹmo o re no ẹmo t’uwou hu. Ẹroo a rẹ mai ro ru etu na a ve ko oviẹ olọlọhọ fihọ eva riẹ, fikiere oware o tẹ maki kie etu na, o rẹ nwa ohwo nọ o fi rie họ na oma ha. Wọhọ epanọ etu-ẹmo ọ rẹ thọ uzou na, ẹruore ọ rẹ sae thọ iroro ra.

18, 19. Didi oriruo Jesu o fihọ kẹ omai evaọ ẹyọrọ ẹruore, kọ ẹvẹ ma sae rọ raro kele iei?

¹⁸ Jesu họ obọdẹ oriruo ọrọ ohwo nọ ọ yọrọ ẹruore. Kareghẹhọ eware nọ o thihakọ rai evaọ aso urere taure o te ti whu. Ogbẹnyusu ọkpekpe riẹ jọ o vivie i rie fiki ugho. Ọfa ọ vro riẹ dede. Otu nọ i kiọkọ a dhẹ siẹe ba. Ahwo ẹwho riẹ a kpareso ẹe, je bo inọ elakpa-ẹmo Rom a kare iẹe veghe re o whu. Avro ọ riẹ hẹ sọ ohwo jọ ọ te rẹriẹ ovao dhe edawọ nọ e ga te enọ Jesu ọ rẹriẹ ovao dhe na. Eme o fi obọ họ kẹ Jesu? Ahwo Hibru 12:2 o kuyo nọ: ‘Fiki oghọghọ nọ a ya eyaa riẹ kẹe o thihakọ ure uveghe, ọ daezọ omovuọ họ, ọ tẹ keria obọze akaba uvie Ọghẹnẹ.’ Ẹsikpobi Jesu ọ jẹ kareghẹhọ ‘oghọghọ nọ a ya eyaa riẹ kẹe.’

¹⁹ Didi oghọghọ a ya eyaa riẹ kẹ Jesu? Ọ riẹ inọ o te thihakọ, ọ te rọ ere fiba erufo odẹ ofuafo Jihova. Ọ te kẹ imuẹro nọ e mae rro kpobi inọ Setan yọ ọtọrue. Ẹruore ọfa nọ ọ rẹ kẹ Jesu oghọghọ vi onana ọ riẹ hẹ. Ọ riẹ re inọ Jihova ọ te hwosa kẹe o te kru ẹrọwọ riẹ te urere—keme kẹle na ọ te wariẹ kuomagbe Ọsẹ riẹ. Jesu ọ jẹ kareghẹhọ uvi ẹruore nana makọ evaọ etoke edawọ nọ i te rie kpobi. U fo re ma ru epọvo na. A ya eyaa oghọghọ kẹ omai re. Jihova ọ kẹ omomọvo mai uvẹ-ọghọ nọ ma re ro ru odẹ ulogbo riẹ fo. Ma rẹ sai dhesẹ Setan fihọ ọtọrue ẹkwoma Jihova nọ ma rẹ salọ wọhọ Osu mai, gbe oma nọ ma rẹ dawo re ma daji uyoyou Ọsẹ mai ghelọ oghẹrẹ edawọ nọ ma rẹ rẹriẹ ovao dhe kẹhẹ.

20. Eme ọ rẹ sai fi obọ họ kẹ owhẹ kpọ iroro ra vi, re e jẹ vọ avọ ẹruore?

²⁰ Orọnikọ o rẹ were Jihova ọvo re ọ hwosa kẹ idibo riẹ nọ e be rehọ ẹrọwọ gọe he—ọ gwọlọ gine ru ere. (Aizaya 30:18; Malakae 3:10) O rẹ were iẹe re o ru ẹgwọlọ idibo riẹ kẹ ai. (Olezi 37:4) Fikiere, fi udu ra kpobi họ eyaa nọ Ọghẹnẹ ọ ya kẹ owhẹ na. Whọ kuvẹ vievie he re iroro ethọthọ, iroro igbegbe, gbe iroro iyoma akpọ anwae Setan nana e ruọ owhẹ oma. Who te muẹrohọ nọ ẹzi akpọ nana ọ be rọ ẹmẹrera ruọ owhẹ iroro hayo udu, lẹ gaga se Jihova re ọ k’owhẹ “udhedhẹ Ọghẹnẹ nọ uvi eriariẹ kpobi.” Udhedhẹ yena nọ u re no obọ Ọghẹnẹ ze na o te thọ udu gbe ẹgba iroro ra.—Ahwo Filipai 4:6, 7.

21, 22. (a) Uvi ẹruore vẹ “otu obuobu” na a rri ghaghae? (b) Evaọ usu eyaa Ebaibol na, ovẹ whọ be mai rẹro riẹ, kọ eme họ ọtamuo ra?

²¹ A rẹ sae rọ unu gbiku ẹruore nọ ọ rrọ obaro hẹrẹ owhẹ hẹ! Whọ tẹ rrọ omọvo “otu obuobu” na, nọ e te jọ uzuazọ nọ ‘uye ulogbo’ na o tẹ vrẹ no, dai roro kpahe oghẹrẹ uzuazọ nọ who bi ti yeri. (Eviavia 7:9, 14) Nọ a te si Setan avọ idhivẹri riẹ no, oke yena who ti wo ufuoma nọ whọ sae rọ unu gbiku riẹ obọnana ha. Ono evaọ usu mai na o yeri uzuazọ no ababọ idhọvẹ nọ i bi no akpọ Setan ze? Nọ a te si Ẹdhọ avọ ahwo riẹ no akpọ na no, a re gbiku oghọghọ riẹ hẹ onọ ma te rọ rẹriẹ otọakpọ na zihe ruọ aparadase evaọ otọ ọkpọvio Jesu gbe ibe-isu 144,000 riẹ nọ e te jọ obọ odhiwu! Ẹvẹ o te jọ oware oghọghọ te nọ ma te ruẹ nọ a si eyao kpobi no, nọ ma ti dede iyoyou mai nọ i whu no uki ze, je ti yeri uzuazọ evaọ oghẹrẹ nọ Ọghẹnẹ ọ gwọlọ nọ o ginẹ jọ! Nọ ma be rro te ẹgbagba na, osohwa jọ nọ o mae tubẹ rro dede u ve ti sikẹle viere, eyaa nọ a dhesẹ fihọ Ahwo Rom 8:21 na—‘ufuoma nọ ma bi ti wo wọhọ emọ Ọghẹnẹ.’

²² Jihova ọ gwọlọ nọ who wo ufuoma ulogbo, onọ who roro nọ whọ sai wo ho. Re whọ sai wo ufuoma yena, o gwọlọ ẹmeoyo. Kọ u gbe fo re whọ dawo utho ẹgba ra kpobi yoẹme kẹ Jihova kẹdẹ kẹdẹ? Fikiere, gbẹ hae rọ orọwọ ọrẹri ra yọrọ oma ra whẹro, re whọ sae daji uyoyou Ọghẹnẹ bẹdẹ bẹdẹ!

[Oruvẹ-obotọ]

[Uwoho nọ e rrọ ẹwẹ-obe avọ 201]

Erueru ohwo nana ọ sai ro wuhrẹ oma riẹ te enẹ na