Kọ Uye-Oruẹ U ti Kuhọ Ẹdẹ Jọ?

OWARE NỌ EBAIBOL NA Ọ TA

“Ọghẹnẹ . . . o ti ririe irui-oviẹ kpobi no aro rai, yọ uwhu, uye-oruẹ, oviẹ, hayo edada e gbẹ te jọ họ.”​—Eviavia 21:3, 4, efafa Contemporary English Version.

IRERE NỌ I RE TE OWHẸ NỌ OYENA U TE MU OWHẸ ẸRO

U ti fiobọhọ kẹ owhẹ riẹ nọ orọnikọ Ọghẹnẹ ọ be wha ebẹbẹ mai ze he.​—Jemis 1:13.

Who ti wo omosasọ inọ Ọghẹnẹ ọ riẹ oghẹrẹ nọ o rẹ da te nọ ma tẹ be ruẹ uye.​—Zẹkaraya 2:8.

U ti fiobọhọ kẹ owhẹ riẹ nọ uye-oruẹ kpobi u ti kuhọ.​—Olezi 37:9-11.

KỌ MA SAI GINE FIEVAHỌ OWARE NỌ EBAIBOL NA Ọ TA?

Ee, fiki eware ivẹ jọ:

• Ọghẹnẹ o mukpahe uye-oruẹ gbe okienyẹ. Dai roro kpahe oghẹrẹ nọ o jọ Jihova oma nọ a je kienyẹ idibo riẹ evaọ okenọ u kpemu. Ebaibol na ọ ta nọ o jẹ kẹ Jihova uye fiki ahwo nọ a “je gboja kẹ ae.”​—Ibruoziẹ 2:18, Efafa Akpọ Ọkpokpọ.

  O rẹ kẹ Ọghẹnẹ uye gaga nọ ohwo o te bi kienyẹ amọfa. Wọhọ oriruo, Ebaibol ọ ta nọ “abọ nọ o re kpe azẹ ekueku” e rẹ tọtọ iẹe oma.​—Itẹ 6:16, 17.

• Ọghẹnẹ o you omai omomọvo. Orọnikọ mai ọvo ma riẹ “ọvuọ uye riẹ gbe ọvuọ edada riẹ” hẹ, Jihova omariẹ ọ riẹ re.​—2 Iruẹru-Ivie 6:29, 30.

  Jihova ọ te rọ Uvie riẹ si uye-oruẹ mai omomọvo no kẹle. (Matiu 6:9, 10) Bọwo oke yena, Jihova ọ rẹ sasa ahwo nọ a rẹroso ẹe oma.​—Iruẹru Ikọ 17:27; 2 Ahwo Kọrint 1:3, 4.