Kọ Ahwo nọ A Whu No A Sae Ginẹ Wariẹ Ziọ Uzuazọ?
Kọ whọ te ta nọ . . .
Ee?
ijo?
mẹ sae ta gbiae he?
OWARE NỌ EBAIBOL NA Ọ TA
“Ẹkparomatha . . . ọ te jọ.”—Iruẹru Ikọ 24:15, Efafa Akpọ Ọkpokpọ.
IRERE NỌ I RE TE OWHẸ NỌ WHỌ TẸ RỌWO ẸKPAROMATHA NA
U ti fiobọhọ kẹ owhẹ wo omosasọ nọ ohwo ra jọ o te whu.—2 Ahwo Kọrint 1:3, 4.
Ozọ uwhu u ti gbe mu owhẹ hẹ.—Ahwo Hibru 2:15.
Who ti wo ẹruore inọ whẹ avọ ahwo ra nọ a whu no wha te wariẹ kuomagbe ẹdẹ jọ.—Jọn 5:28, 29.
KỌ MA SAI GINE FIEVAHỌ OWARE NỌ EBAIBOL NA Ọ TA?
Ee, fiki eware esa jọ:
Ọghẹnẹ họ ọnọ ọ kẹ omai uzuazọ. Ebaibol na ọ ta nọ “obọ [Jihova] uzuazọ u no ze.” (Olezi 36:9; Iruẹru Ikọ 17:24, 25) Jihova nọ ọ kẹ ahwo kpobi uzuazọ na o wo ẹgba nọ ọ sae rọ kpare ohwo nọ o whu no zihe ziọ uzuazọ.
Ọghẹnẹ ọ kpare ahwo no uwhu ze evaọ oke nọ u kpemu. Ebaibol na ọ fodẹ imaree nọ a kpare ziọ uzuazọ evaọ oke nọ u kpemu, te emaha te ekpako, te ezae te eyae. Nọ ejọ i whu no, o raha oke taure a tẹ te kpare ae ze he, rekọ ọjọ ọ jọ evaọ uki te edẹ ene.—Jọn 11:39-44.
Ọghẹnẹ ọ gwọlọ wariẹ kpare ahwo nọ a whu no ze evaọ obaro. Jihova o mukpahe uwhu; o rri rie wọhọ ọwegrẹ. (1 Ahwo Kọrint 15:26) O bi rẹro oke nọ o ti ro fi ọwegrẹ yena kparobọ, nọ ọ te rọ rehọ ẹkwoma ekparomatha na si uwhu no otọ. O rrọ isiuru riẹ re ọ kpare ahwo nọ a rrọ ekareghẹhọ riẹ zihe ziọ uzuazọ evaọ otọakpọ na.—Job 14:14, 15.