Rehab O Fi Ẹrọwọ Họ Jihova

Ma fake rehọ iẹe nọ ma rrọ okpẹwho Jẹriko. Okpẹwho nana o jọ eva Kenan, yọ ahwo Kenan a be gọ Jihova ha. Okpẹwho nana aye jọ nọ a re se Rehab ọ be rria.

Okenọ Rehab ọ gbẹ jọ ọmaha, o ro yo kpahe epanọ Mosis ọ rọ hẹriẹ ame Abade Ọwawae na je su emọ Izrẹl no igbo Ijipti. O te je yo nọ Jihova o fi obọ họ kẹ ae fi kparobọ evaọ ẹmo kpobi nọ a fi. Whaọ obọnana, o yo nọ emọ Izrẹl a rrọ oria jọ nọ o kẹle Jẹriko.

Owọwọ ẹdẹjọ, ezae ivẹ Izrẹl jọ a tẹ nyae lẹlẹ kiẹ okpẹwho na riwi. A tẹ ziọ uwou Rehab. O te dede ae rehọ re a jọ uwou riẹ. Evaọ aso, ovie Jẹriko o te yo nọ ezae ivẹ jọ e nyaze te kiẹ okpẹwho na riwi, yọ a rrọ uwou Rehab. Fikiere ovie na o te vi ahwo jọ ze ti mu ezae na. Rehab o te si ezae ivẹ na no họ ehru uwou riẹ, jẹ ta kẹ ahwo nọ ovie na o vi ze na nọ: ‘Ezae na a ginẹ jọ etenẹ vẹre, rekọ a nwane nyavrẹ obọ. Wha te le ai obọnana, wha ti le ai mu.’ Kọ whọ riẹ oware nọ o lẹliẹ Rehab si ezae na no?— Fikinọ o fi ẹrọwọ họ Jihova, yọ ọ riẹ nọ ọ te rehọ ẹkwotọ Kenan na kẹ emọ Izrẹl.

Taure ezae na a te ti no uwou Rehab, a ya eyaa kẹe nọ okenọ a te raha Jẹriko, a ti siwi ei avọ uviuwou riẹ. Kọ whọ riẹ oware nọ a ta kẹe nọ o ru?— A ta nọ: ‘Mi ufi owawae nana, re who thuru iei họ unwido ra. Who te ru ere, ohwo kpobi nọ ọ rrọ evaọ uwou ra ọ te zọ.’ Nwanọ epanọ a ta kẹ Rehab na, ere o ru. Kọ whọ riẹ oware nọ o via?—

Nọ edẹ jọ e vrẹ no, emọ Izrẹl a tẹ jẹ nya okpẹwho na wariẹ, yọ a jẹ ta ẹme he. Edẹ ezeza a nya okpẹwho na wariẹ; ẹsiẹvo okpẹdẹ. Rekọ evaọ ẹdẹ avọ ihrẹ, a tẹ nya okpẹwho na wariẹ isiahrẹ. Kẹsena aikpobi a te bo gaga. Jihova o te ru igbẹhẹ okpẹwho na kie fihọ otọ. Rekọ uwou nọ a thuru ufi owawae fihọ unwido riẹ na u dikihẹ. Kọ whọ be ruẹ uwou na evaọ ifoto na?— Rehab avọ uviuwou riẹ a zọ.

Eme who wuhrẹ mi Rehab?— Rehab o fi ẹrọwọ họ Jihova fiki eware iwoma nọ o yo nọ o ru. Who bi wuhrẹ eware iwoma buobu kpahe Jihova re. Kọ who fi ẹrọwọ họ Jihova wọhọ epanọ Rehab o ru na?— Ma riẹ nọ who bi ru ere.