Wuhrẹ Emọ ra

Rehab O Yo Usi Na

MA REHỌ iẹe nọ ma rrọ etoke ikpe 3,500 nọ i kpemu. Ma rrọ ẹwho Jeriko, evaọ Kenan. Ọmọtẹ jọ nọ a re se Rehab ọ be rria ẹwho na. Nọ Mosis o su ahwo Izrẹl no igbo Ijipti jẹ nya otọ oyaya orọ Abade Ọwawae na vrẹ no a ro yẹ Rehab. Iredio, etẹlivisiọne, hayo Itanẹte e jariẹ hẹ rekọ Rehab o yo kpahe iruo igbunu nana dede nọ oria nọ oware na o jọ via u thabọ no ẹwho riẹ. Kọ whọ riẹ epanọ o ro yo kpahe iẹe?—a

O wọhọ nọ ahwo nọ a jẹ hai kpohọ erẹ a wha usi iruo igbunu nana ze. Nọ Rehab ọ be kpako na, ọ kareghẹhọ eware nọ Jihova o ru kẹ ahwo riẹ. O yo eware igbunu efa kpahe ahwo Izrẹl re. A raha ikpe 40 evaọ udhude na, yọ oke yena kpobi na Ọghẹnẹ o fi obọ họ kẹ ai fi ahwo kpobi nọ e wọso ai kparobọ, enẹna a ruọ ẹkwotọ Kenan no. Rehab o yo inọ ahwo Izrẹl a wohọ abọdekọ ethẹ Jọdan nọ u thabọ no Jeriko ho.

Owọwọ ẹdẹjọ, erara ivẹ jọ a te bru Rehab ze keme a riẹ nọ o wo oria nọ erara e rẹ sai wohọ. Rehab o dede i rai rehọ. Evaọ aso, ovie Jeriko o te yo nọ ekiotọ Izrẹl a ziọ Jeriko yọ a kpohọ uwou Rehab. Fikiere ovie na o te vi ahwo bru Rehab, ta kẹe inọ ọ rehọ ezae nọ i wohọ uwou riẹ na ze. Kọ whọ riẹ oware nọ ezae ivẹ na a vuẹ Rehab no, gbe owọ nọ ọ jẹ kpahe oyena?—

Whaọ, taure ahwo nọ ovie o vi na a te ti te obei, yọ ezae ivẹ na a vuẹ Rehab no inọ ae yọ ekiotọ Izrẹl. Fikiere ọ tẹ vuẹ ae nọ a dhere ehruedi uwou na, jẹ ta kẹ ahwo nọ ovie o vi ze na inọ: “Uzẹme, ahwo a bru omẹ ze . . . Nọ a je ti wuhu unuẹthẹ-ẹwho, evaọ aso, ahwo na a tẹ nyavrẹ.” Rehab ọ tẹ ta kẹ ae nọ: “Wha le ai.”

Eme who roro nọ o lẹliẹ Rehab thọ ekiotọ na?— Rehab ọ ta oware nọ o soriẹ ze inọ: “Mẹ riẹ nọ ỌNOWO na ọ kẹ owhai otọ na no . . . Keme ma yo epanọ ỌNOWO na o ro ru ame ethẹ ọwawae na kpọ kẹ owhai no wha je no obọ Ijipti ze.” O yo kpahe etoke ọfa sa-sa nọ Ọghẹnẹ o ro fi obọ họ kẹ emọ Izrẹl fi ewegrẹ rai kparobọ.

O were Jihova gaga inọ Rehab ọ thọ ekiotọ na, wọhọ epanọ ma rẹ ruẹ evaọ obe Ahwo Hibru 11:31. O were riẹ re nọ Rehab ọ lẹ ekiotọ na inọ: ‘Me dhesẹ uyoyou kẹ owhai no, fikiere wha ya eyaa kẹ omẹ inọ oke nọ wha te raha Jeriko wha ti siwi ọsẹ mẹ gbe oni mẹ, inievo-emezae gbe inievo-emetẹ mẹ.’ Ekiotọ na a ya eyaa inọ a ti ru ere otẹrọnọ Rehab o ru epanọ a ta kẹe. Kọ whọ riẹ oware nọ a ta kẹe nọ o ru?—

Ekiotọ na e ta kẹe nọ: ‘Rehọ olulu ọwawae-ọgbagba nana re who thuru ei fihọ unwido ra je koko imoni ra kpobi họ uwou ra. Who te ru ere, ahwo kpobi nọ a rrọ uwou na a te zọ.’ Rehab o ru epanọ a ta kẹe. Kọ whọ riẹ oware nọ o via?—

Ahwo Izrẹl a tẹ te nya te ugbẹhẹ Jeriko. A nya ugbẹhẹ na wariẹ edẹ ezeza, ẹsiẹvo kẹdẹ kẹdẹ ababọ edo. Evaọ ẹdẹ avọ ihrẹ, a nya okpẹwho na wariẹ isiahrẹ, kẹsena a tẹ koyẹ. Ugbẹhẹ na u te kporo kuotọ—rekọ uwou nọ a thuru olulu họ unwido riẹ na u kporo ho! Oware ovo u te Rehab avọ uviuwou riẹ oma ha.—Joshua 2:1-24; 6:1-5, 14, 15, 20-25.

Eme ma rẹ sai wuhrẹ no oware nọ Rehab o ru na ze?— Orọnikọ Rehab o yo kpahe eware nọ Ọghẹnẹ o ru rọ thọ ahwo Izrẹl ọvo ho, rekọ ọyomariẹ o fi obọ họ kẹ ae nọ uvẹ u rovie kẹe. Ẹhẹ, Rehab ọ salọ inọ o re kuomagbe ahwo Izrẹl gọ Jihova! Kọ who ti ru epọvo na?— Ma lẹ nọ ajọ who ru ere.

[Oruvẹ-obotọ]

Enọ:

○ Obọdẹ usi vẹ Rehab o yo okenọ ọ jọ ọmaha?

○ Eme o ru kẹ ekiotọ Izrẹl, kọ fikieme?

○ Didi eyaa Rehab ọ ta kẹ ekiotọ na nọ a yaa kẹe?

○ Ẹvẹ ma rọ riẹ inọ oware nọ Rehab o ru na o were Jihova, kọ ẹvẹ whọ sae rọ raro kele iei?