UWUHRẸ 4
O Ru Eva Were Jihova gbe Ọsẹ Riẹ
Didi eyaa Jẹfta ọ be ya kẹ Jihova na?
O lọhọ kẹ ọmọtẹ Jẹfta vievie he, rekọ o ru oware nọ ọsẹ riẹ ọ ya eyaa riẹ na
Kọ whọ be ruẹ ọmọtẹ ọsese nọ ọ rrọ ifoto na?— Ọmọtẹ na yọ ọmọ ọzae jọ nọ a re se Jẹfta. Ebaibol na ọ fodẹ odẹ ọmọtẹ na kẹ omai hi, rekọ ma riẹ nọ o ru eva were Jihova gbe ọsẹ riẹ. Joma wuhrẹ kpahe iẹe avọ Jẹfta, ọsẹ riẹ.
Jẹfta yọ emamọ ohwo, yọ ọ jẹ hai wuhrẹ ọmọtẹ riẹ kpahe Jihova ẹsikpobi. Ọ tẹ jẹ jọ ọzae nọ ọ jọ gaga gbe emamọ osu. Fikiere ahwo Izrẹl a tẹ ta kẹe nọ o su ae nyae họre ewegrẹ rai.
Jẹfta ọ tẹ lẹ se Jihova re o fi obọ họ kẹ ae fi kparobọ. Jẹfta ọ tẹ ya eyaa kẹ Jihova nọ, otẹrọnọ o fi kparobọ, ohwo ọsosuọ nọ o no uwou riẹ ze ti yere iei, ọ te rehọ iẹe kẹ Jihova. Ohwo nana ọ te jọ uwou Ọghẹnẹ ru iruo evaọ edẹ uzuazọ riẹ kpobi. Uwou Ọghẹnẹ o jọ oria nọ ahwo a jẹ hae jọ gọ Ọghẹnẹ evaọ oke yena. Jẹfta o te gine fi kparobọ evaọ ẹmo na.Kọ whọ riẹ ohwo nọ ọ kaki no uwou riẹ ze ti dede iei nọ o kpozi?—
Ẹhẹ, ọmọtẹ riẹ. Ọye ọvo họ ọmọ nọ o yẹ, whaọ obọnana, Jẹfta ọ be te rehọ iẹe kpobọ uwou Ọghẹnẹ no. Onana o lẹliẹ Jẹfta viẹ gaga. Rekọ kareghẹhọ nọ ọ ya eyaa kẹ Jihova no. Ọmọtẹ riẹ ọ tẹ ta kẹe nọ: ‘Ọsẹ mẹ, nọ orọnọ whọ ya eyaa kẹ Jihova no na, ru eyaa ra gba.’
Kukpe kukpe, egbẹnyusu ọmọtẹ Jẹfta a jẹ hae nya bru rie
Ọmọtẹ na ọ jẹ viẹ gaga re, keme ọ rẹ sae jọ obọ uwou Ọghẹnẹ wo ọzae hayo yẹ emọ họ. Rekọ ọ gwọlọ ru eyaa ọsẹ riẹ gba je ru eva were Jihova. Oyena o were riẹ vi ọzae nọ o re wo gbe emọ nọ o re yẹ. Fikiere o te kpobọ uwou Ọghẹnẹ, jẹ rria obei evaọ edẹ uzuazọ riẹ kpobi.
Kọ who roro nọ oware nọ o ru na o lẹliẹ eva were Jihova gbe ọsẹ riẹ?— Ee, eva e were rai gaga. Who te you Jihova je bi yoẹme, whọ te wọhọ ọmọtẹ Jẹfta. Who ve ti ru eva were Jihova gbe ọsẹgboni ra.