Eyaa Jẹfta

Ahwo Izrẹl a tẹ wariẹ nyasiọ Jihova ba nyae gọ eghẹnẹ erue. Nọ ahwo Ammọn a wọ ẹmo bru ahwo Izrẹl ze, eghẹnẹ erue nọ a jẹ gọ na e sai fiobọhọ kẹ ai hi. Ahwo Izrẹl a reoja evaọ ikpe buobu. Ukuhọ riẹ a tẹ viẹ se Jihova nọ: ‘Ma ruthọ. Ivie siwi omai no obọ ewegrẹ mai.’ Ahwo Izrẹl a te kporo emedhọ rai no jẹ wariẹ mu Jihova họ ẹgọ. Jihova ọ gbẹ gwọlọ nọ ahwo Izrẹl a ruẹ uye he.

Jihova ọ tẹ salọ ọgbaẹmo jọ nọ a re se Jẹfta re ọ thọ ahwo Izrẹl no obọ ahwo Ammọn. Jẹfta ọ tẹ ta kẹ Jihova nọ: ‘Who te fiobọhọ kẹ omai fi kparobọ, mẹ te rehọ ohwo ọsosuọ nọ o no uwou mẹ ze ti dede omẹ kẹ owhẹ.’ Jihova o gine yo olẹ Jẹfta je fiobọhọ kẹe fi ẹmo na kparobọ.

Nọ Jẹfta o te uwou, ohwo ọsosuọ nọ o no uwou ze ti dede iei họ ọmọtẹ riẹ, ọmọ ọvo nọ o wo. O je gbile yọ o bi kporo ojẹjẹ. Kọ eme Jẹfta o ru? Ọ kareghẹhọ eyaa nọ ọ ya kẹ Jihova, ọ tẹ ta nọ: ‘O, ọmọtẹ mẹ! Who kpe omẹ fihọ akpọ no. Mẹ ya eyaa kẹ Jihova. Re me koko eyaa na, mẹ rẹ rehọ owhẹ kpobọ uwou-udhu egagọ nọ o rrọ obọ Shailo.’ Ọmọtẹ riẹ ọ tẹ ta nọ: ‘Ọsẹ mẹ, otẹrọnọ whọ ya eyaa kẹ Jihova, ru ei gba. Taure mẹ tẹ nya, ivie kẹ omẹ uvẹ re mẹ avọ egbẹnyusu emetẹ mẹ ma kpobọ igbehru na evaọ emerae ivẹ.’ Ọmọtẹ Jẹfta ọ rọ edẹ uzuazọ riẹ kpobi gọ Jihova evaọ obọ uwou-udhu na. Kukpe kukpe, egbẹnyusu riẹ a jẹ hai kpobọ Shailo nyae ruẹ e riẹ.