Ozọ U Mu Ọmọ-Oniọvo Pọl Ho

Joma wuhrẹ kpahe ọmọzae jọ nọ o siwi uzuazọ oniọvo oni riẹ. Oniọvo oni ọmọzae na họ Pọl ukọ na. Ma riẹ odẹ ọmọzae na ha, rekọ ma riẹ nọ o ru oware uwoma jọ, yọ ozọ u mu rie he. Kọ whọ gwọlọ riẹ oware nọ o ru na?—

Pọl ọ jọ uwou-odi evaọ obọ Jerusalẹm. Fiki usiuwoma nọ ọ jẹ ta kpahe Jesu a ro mu ei. Ezae iyoma jọ a gwọlọ kpe Pọl no, fikiere a tẹ gba ẹgwae oyoma jọ. A ta nọ: ‘Joma ta kẹ osu isoja na re a rehọ Pọl ze eva aro ogbẹguae odẹnotha. Ma ti dhere oria jọ evaọ edhere na re okenọ isoja na a te wọ Pọl nya edhere na vrẹ, ma ve kpei no.’

Ọmọ-oniọvo Pọl o te yo kpahe oware nọ ezae na a gwọlọ ru na. Kọ eme o bi ti ru na? O te kpobọ uwou-odi na, ọ tẹ vuẹ Pọl kpahe oware nọ o yo na. Pọl ọ tẹ ta kẹe nọ ọ nyae vuẹ osu isoja na. Kọ who roro nọ o lọhọ kẹe re ọ vuẹ osu isoja na oware na?— Ijo, keme osu isoja na yọ ohwo ologbo. Rekọ ozọ u mu ọmọ-oniọvo Pọl na ha, ọ ta ẹme na kẹ osu isoja na.

Osu isoja na ọ riẹ oware nọ o re ru dẹẹ. O te koko isoja nọ i bu te udhusoi akwa isoi (500) họ re a su Pọl. Ọ tẹ ta kẹ ae nọ a wọ Pọl kpohọ Sisaria aso ọyena. Kọ a sai gine su Pọl te obei?— Ee, ezae iyoma na a sai kpei hi.

Eme who wuhrẹ no iku nana ze?— Whọ jọ ozọ u mu owhẹ hẹ, jọ wọhọ ọmọ-oniọvo Pọl. U fo re ozọ u mu omai hi nọ ma tẹ be ta kpahe Jihova. Kọ ozọ u ti mu owhẹ?— Ozọ u gbe mu owhẹ hẹ, whọ sai siwi uzuazọ ohwo jọ re.