Epanọ Wha Sai ro Yerikugbe Ahwo Uviuwou Rai Dhedhẹ

Nọ ọzae avọ aye a tẹ rọo no yọ uviuwou o lahwe no. Dede nọ o roja nọ who re you ọsẹgboni ra jẹ kẹ ae adhẹẹ, aye hayo ọzae ra họ ohwo nọ ọ mae ghare kẹ owhẹ evaọ akpọ na soso obọnana. O sae jọ bẹbẹ kẹ ahwo uviuwou gbe imoni ra jọ re a rri rie ere. Ehrẹ Ebaibol i re fiobọhọ kẹ owhẹ riẹ oghẹrẹ nọ who re ro yerikugbe ai, yọ evaọ oke ovona, whọ be daoma bọ usu ra avọ aye hayo ọzae ra ga ziezi.

1 WHA JẸ ESẸGBINI RAI FIẸ HẸ

OWARE NỌ EBAIBOL NA Ọ TA: “Rọ ọghọ kẹ ọsẹ ra avọ oni ra.” (Ahwo Ẹfisọs 6:2) Makọ epanọ whọ kpako te kẹhẹ, o gbahọ nọ whọ rẹ kẹ ọsẹgboni ra adhẹẹ. Kareghẹhọ re inọ ọzae hayo aye ra yọ ọmọ ohwo jọ re, fikiere o gwọlọ nọ ọ rẹ rẹrote ọsẹgboni riẹ re. “Uyoyou o rẹ re ihri hi,” fikiere jọ oke nọ ọzae hayo aye ra ọ be raha kugbe ọsẹgboni riẹ o kẹ owhẹ uye he.—1 Ahwo Kọrint 13:4; Ahwo Galesha 5:26.

OWARE NỌ WHỌ RẸ SAI RU:

• Whaha eme wọhọ, “Enenẹ ọvo ọsẹgboni ra a re ru omẹ” hayo “Oware ovo nọ me re ru evaọ akpọ na nọ o rẹ were oni ra o rrọ họ”

• Daoma rri ẹme nọ ọ rrọ otọ na wọhọ epanọ ohwo ọdekọ o rri rie

2 WHA WO ẸME-OBỌ

OWARE NỌ EBAIBOL NA Ọ TA: “Ọzae ọ rẹ se ọsẹ gbe oni riẹ ba, ọ vẹ gbalọ aye riẹ, a vẹ jọ uwo ovo.” (Emuhọ 2:24) Ọsẹgboni ra a re gbe roro nọ who ri no otọ rai hi dede nọ whọ rọo no, fikiere a rẹ gwọlọ ta họ owhai obọ.

Whẹ avọ aye ra wha ta kpahe ọnyaba nọ wha re fihọ kẹ esẹgbini rai evaọ ẹme orọo rai, wha vẹ jẹ rọ unu uwowolẹ ta kẹ ae. Wha ta ẹme na kẹ ae vevẹ, rekọ wha tae avọ oma orivo ho. (Itẹ 15:1) Omaurokpotọ, ẹwolẹ gbe odiri nọ wha re wo u ti ru owhai wo emamọ usu kugbe esẹgbini rai je fiobọhọ kẹ owhai “rọ uyoyou thihakọ kẹ ohwohwo.”—Ahwo Ẹfisọs 4:2.

OWARE NỌ WHỌ RẸ SAI RU:

• Otẹrọnọ oghẹrẹ nọ esẹgbini rai a bi dhunu họ ẹme orọo rai o were owhẹ hẹ, ta kẹ ọrivẹ ra evaọ okenọ ofu ọ rrọ owhẹ eva ha

• Wha jiroro oware nọ wha rẹ sai ru kpahe onana