UZOU AVỌ 4
Meri O Wo Ọzae He Rekọ O Dihọ
JOSẸF Ọ TẸ TE RIẸ NỌ MERI O DIHỌ
MERI AVỌ JOSẸF A RUỌ ORỌO
Meri o dihọ te emerae ene no. Kareghẹhọ nọ okenọ ọ nwani dihọ no, o te kpobọ Ẹlizabẹt omoni riẹ evaọ obọ Judia. Rekọ obọnana, Meri o zihe ziọ uwou riẹ evaọ obọ Nazarẹt no, yọ eva riẹ e be te rro via. Dai roro epanọ oware na o be kẹe uye te.
Tubẹ mai yoma na, ekapenta jọ nọ a re se Josẹf evaọ ẹwho na ọ sa Meri h’otọ. Yọ Meri ọ riẹ nọ Uzi nọ Ọghẹnẹ o jie kẹ emọ Izrẹl o ta nọ aye nọ ọzae ọ sa h’otọ no, o te keke aro fihọ lele ọzae ọfa wezẹ a rẹ rehọ itho fi ei kpe. (Iziewariẹ 22:23, 24) Fikiere, dede nọ Meri o je gbe-ọfariẹ hẹ, ọ jẹ ruawa kpahe oghẹrẹ nọ ọ te rọ ta ẹme udihọ na kẹ Josẹf, gbe epanọ Josẹf o ti rri ẹme na.
Anwọ emerae esa Meri o ro kpohọ erẹ na, fikiere o rẹ sai mu omai ẹro nọ Josẹf ọ be rọ okpakpa rẹro riẹ. Nọ a ruẹ ẹro, ẹsejọhọ Meri ọ tẹ vuẹe ẹme na yọ o wọhọ nọ ọ daoma ta ẹme na kẹe evaọ oghẹrẹ nọ u re ro mu Josẹf ẹro inọ ẹzi ọfuafo Ọghẹnẹ o ru nọ o ro dihọ. Rekọ, wọhọ epanọ o rẹ sae jọ kẹ ohwo kpobi, ẹme na ọ bẹ Josẹf ẹrọwo.
Josẹf ọ riẹ nọ Meri yọ emamọ ọmọtẹ, nọ a riẹ inọ o wo uruemu ezi. Josẹf o te je you rie gaga. Ghele na, makọ epanọ Meri ọ ta ẹme na rri kpobi kẹhẹ, Josẹf o gbe bi roro nọ ọzae jọ ọ kẹ riẹ eva na. Nọ Josẹf ọ maki rri ẹme na ere na, ọ gwọlọ nọ a rọ itho fi Meri kpe he yọ ọ gwọlọ nọ a ru ei oma vo evaọ ẹgbede he. Fikiere ọ tẹ jiroro nọ ọ rẹ lẹlẹ se iẹe. Evaọ oke yena, a re rri imava nọ e t’ẹme orọo mu no wọhọ ahwo nọ a rọo no, yọ o rẹ gwọlọ nọ a si obe orọo-ofa nọ a tẹ be fa usu utioye na.
Nọ Josẹf o gbe bi roro kpahe ẹme na, ọ tẹ nyai kiẹzẹ. Ẹnjẹle Jihova ọ tẹ romavia kẹe evaọ ewezẹ jẹ ta kẹe nọ: “Ozọ u mu owhẹ hẹ re whọ rehọ Meri aye ra kpobọ uwou ra, keme ẹkwoma ẹzi ọfuafo o ro dieva na họ. O ti yẹ ọmọzae, yọ who re se odẹ riẹ Jesu, keme o re ti siwi ahwo riẹ no izieraha rai.”—Matiu 1:20, 21.
Nọ Josẹf ọ rọwo no owezẹ ze, eva e were riẹ gaga keme ọ ruẹ uzẹme ẹme na no. Ababọ oke oraha, o te ru epanọ ukọ-odhiwu na ọ ta kẹe na. Ọ tẹ rehọ Meri kpobọ uwou riẹ. Owọ nana nọ Josẹf ọ jẹ na o nwane wọhọ ehaa orọo, onọ u dhesẹ kẹ ohwo kpobi nọ aimava a ruọ orọo no. Rekọ Josẹf o lele Meri wezẹ hẹ bẹsenọ o ro yẹ Jesu.
Nọ emerae jọ e vrẹ no, Josẹf avọ Meri nọ o te eyẹ no na a tẹ be wọ re a no Nazarẹt ẹwho rai kpohọ erẹ evaọ obojọ. Bovẹ a be nya evaọ oke nana nọ Meri o te eyẹ no na?