Uzou Avọ 4
O Dihọ Ababọ Orọo
MERI o dihọ te emerae esa no. Whọ rẹ kareghẹhọ nọ ọ raha abọ ọsosuọ udihọ riẹ ro weze bru Ẹlizabẹt, rekọ enẹna o zihe ziọ Nazarẹt no. U ti kri hi ahwo kpobi evaọ otẹwho riẹ a vẹ te riẹ nọ o dihọ no. Evaọ uzẹme ọ ghinẹ rọ uye!
Oware nọ o lẹliẹ ẹme na tube yoma viere na họ ọwena jọ nọ a re se Josẹf ọ sa Meri h’otọ no. Yọ ọ riẹ nọ, evaọ otọ uzi Ọghẹnẹ kẹ Izrẹl, aye nọ ọzae ọ sa h’otọ no rekọ ọ tẹ rọ aro koko lele ọzae ọfa wezẹ a rẹ rehọ itho fi ei kpe. Kọ ẹvẹ ọ sai ro gbiku udihọ riẹ kẹ Josẹf?
Nọ Meri o kpohọ erẹ kri te emerae esa no na, o rẹ sai mu omai ẹro nọ oma o be kpakpa Josẹf re ọ rue riẹ. Nọ a ruẹ oma, ẹsejọhọ Meri ọ tẹ vuẹe ẹme na. Ọ rẹ daoma gaga re o ru ei vevẹ nọ ẹkwoma ẹzi ọfuafo Ọghẹnẹ o ro dihọ. Rekọ, wọhọ epanọ whọ rẹ sai roro, onana yọ ẹme nọ ọ rẹ bẹ Josẹf ẹrọwo.
Josẹf ọ riẹ kpahe emamọ uruemu Meri. Yọ uzẹme o you rie i gaga. Ghele na, makọ epanọ ọ ta ẹme rri kpobi, o wọhọ nọ ọzae jọ ọ kẹ riẹ eva no. O make rọ ere, Josẹf ọ gwọlọ nọ a rehọ itho fi ei kpe he hayo re a ru ei oma vo evaọ ẹgbede he. Fikiere ọ tẹ jọ iroro riẹ ku ei họ nọ ọ rẹ lẹlẹ siẹe. Evaọ edẹ eyena, imava nọ e t’ẹme orọo no a re rri rai wọhọ ahwo nọ e rọo no, yọ o gwọlọ orọo-ofa re a te ku okugbe na họ.
Uwhremu na, nọ Josẹf o gbe bi roro kpahe eme enana, ọ tẹ nya i kiẹzẹ. Ẹnjẹle Jihova ọ tẹ roma via kẹe evaọ ewezẹ ta nọ: “Ozọ u mu owhẹ hẹ, epanọ whọ rọ rehọ Meri aye ra, keme ọnọ ọ rọ eva riẹ na, ọ rọ Ẹzi Ẹri; o re ti yẹ ọmọzae, who re tise odẹ riẹ Jesu, keme o re ti siwi ahwo riẹ no izieraha rai.”
Nọ Josẹf ọ rọwo no owezẹ ze, ẹvẹ eva e were riẹ te! Ababọ okioraha ọ tẹ nwani ru epanọ ẹnjẹle na ọ ta. Ọ tẹ rehọ Meri kpohọ obọ uwou riẹ. Owọjẹ ẹgbede onana o tẹ wọhọ ehaa orọo, u te dhesẹ nọ enẹna Josẹf avọ Meri a ghinẹ rọo no. Rekọ Josẹf o lele Meri wezẹ hẹ nọ o dieva Jesu họ no na.
Rri! Meri ọ kẹle eyẹ no, ghele, Josẹf o bi fi ei họ ehru eketekete. Bovẹ a be nya, kọ fikieme a je bi kperẹ kpakiyọ Meri o te eyẹ no? Luk 1:39-41, 56; Matiu 1:18-25; Iziewariẹ 22:23, 24.
▪ Ẹvẹ iroro Josẹf e jọ nọ ọ riẹ kpahe udihọ Meri, kọ fikieme?
▪ Ẹvẹ Josẹf ọ rẹ rọ se Meri kpakiyọ a re rọo ho?
▪ Didi oware ẹgbede o via nọ u dhesẹ nọ Josẹf avọ Meri a ru ehaa orọo no?