“A rọ Izieraha Ra Rọvrẹ Owhẹ No”

Ahwo a jọ oria kpobi yo kpahe Jesu no. Ibuobu rai i tube no iwhre sa-sa ze ti yo ẹme riẹ jẹ ruẹ iruo igbunu nọ o bi ru. Rekọ, nọ edẹ jọ e vrẹ no, o te zihe kpobọ Kapaniọm, oria nọ ọ be mae jọ ru iruo riẹ. Usi na inọ o zihe kpobọ Kapaniọm no u te do ruọ ẹwho nana soso, onọ o rrọ akotọ Abade Galili. Onana o wha riẹ ze nọ ahwo a ro zurie ziọ uwou nọ ọ rrọ na. Ejọ evaọ usu rai yọ ahwo Farisi gbe enọ i re wuhrẹ ahwo Uzi na nọ i no Galili, Judia gbe Jerusalẹm ze.

“Ahwo buobu a te kokohọ uwou na te epanọ unuẹthẹ na dede u ro di no, o te mu ae ẹme Ọghẹnẹ họ ewuhrẹ.” (Mak 2:2) Oware jọ nọ o rẹ thọrọ ẹro vievie he o be te via. Onana u ti ru omai vuhumu nọ Jesu o wo ẹgba nọ ọ sai ro si oware nọ o be wha uye-oruẹ kpobi no je fiobọhọ kẹ ohwo kpobi nọ u je rie wo omokpokpọ.

Nọ Jesu o bi wuhrẹ ahwo evaọ ubruwou nọ o vọ kpọhọhwẹ na, ezae ene jọ e tẹ rọ ehwa wọ ọzae jọ nọ okie o kie ze. A gwọlọ nọ Jesu o siwi ogbẹnyusu rai. Rekọ fiki epanọ ubruwou na o vọ te, a be sae “wọe te Jesu oma ha.” (Mak 2:4) Dai roro epanọ onana o be kẹ ae uye te. Fikiere, ezae nana e tẹ gadiẹ kpobọ ehru uwou na je bru eghogho fihọ iẹe. A tẹ rọ ẹmẹrera siobọno ehwa ọzae nọ okie o kie na fihọ eva uwou na.

Kọ eva e dha Jesu fiki oware nọ a ru na? Vievie. Ẹrọwọ ahwo na u gbe rie unu, ọ tẹ ta kẹ ọzae nọ okie o kie na nọ: “A rọ izieraha ra rọvrẹ owhẹ no.” (Matiu 9:2) Kọ Jesu ọ sae ginẹ rọ izieraha rọvrẹ ohwo? Onana o were otu ikere-obe gbe ahwo Farisi nọ a jọ etẹe he, a tẹ be jọ udu rai ta nọ: “Fikieme ọzae nana ọ be rọ ta eme enẹ? Ọ be ta eme-aghọ. Ono ọ rẹ sae rọ izieraha rọvrẹ ohwo, u te no Ọghẹnẹ no?”—Mak 2:7.

Fikinọ Jesu ọ riẹ oware nọ a bi roro, ọ tẹ ta kẹ ae nọ: “Fikieme wha be rọ jọ udu rai roro eware nana? Ovẹ o mae lọhọ, re mẹ ta kẹ ọnọ okie o kie na nọ, ‘A rọ izieraha ra rọvrẹ owhẹ no,’ hayo re mẹ ta nọ, ‘Kpama, wọ ehwa ra re whọ nya’?” (Mak 2:8, 9) Ẹhẹ, fiki idhe ẹtanigbo nọ Jesu o ti dhe na, ọ sae rọ izieraha ọzae na rọvrẹ riẹ.

Kẹsena Jesu o te dhesẹ kẹ ogbotu na gbe enọ e be wọso ẹe na inọ o wo udu nọ ọ rẹ rọ rehọ izieraha ahwo rọvrẹ rae. Ọ tẹ ta kẹ ọzae nọ okie o kie na nọ: “Mẹ be ta kẹ owhẹ nọ, Kpama, wọ ehwa ra, re who kpobọ uwou ra.” Ọzae na ọ tẹ nwane kpama, evaọ iraro rai na ọ tẹ wọ ehwa riẹ ọ tẹ nyavrẹ. Akpọ o te gbe ahwo na kpobi unu. A te bi jiri Ọghẹnẹ bi bo nọ: “Ma re ruẹ oware utiona ẹdẹvo ho.”—Mak 2:11, 12.

Muẹrohọ nọ ẹme nọ Jesu ọ ta na u dhesẹ nọ uzioraha o rẹ wha ẹyao ze, gbe nọ a tẹ rọ izieraha ohwo rọvrẹ riẹ, ẹyao riẹ o re kpo. Ebaibol na ọ ta nọ ọsẹgboni ọsosuọ mai Adamu avọ Ivi a raha uzi, gbe nọ mai kpobi ma reuku uzioraha. Fikiere ma tẹ be reoja oware nọ u re no uzioraha ze, oyehọ ẹyao gbe uwhu. Rekọ evaọ otọ Uvie Ọghẹnẹ, Jesu ọ te rọ izieraha ahwo kpobi nọ i you Jihova jẹ be gọe rọvrẹ rae. Evaọ oke yena, ẹyao ọ gbẹ te jọ ofa ha.—Ahwo Rom 5:12, 18, 19.