Uzou Avọ 26

O Kpozi Uwou no Evaọ Kapaniọm

ENẸNA odẹ Jesu u do thabọ kẹkẹre no, yọ ahwo buobu a tẹ be nya bru ei kpohọ imivu nọ ọ be hẹ jọ. Nọ edẹ jọ e vrẹ no, ọ tẹ rọ ofẹ Abade Galili zihe kpohọ Kapaniọm. Ababọ okioraha usi na o tẹ vaha ruọ okpẹwho na kpobi inọ o kpozi no, ahwo buobu a tẹ nyaze uwou nọ ọ rọ na. Otu Farisi gbe iwuhrẹ Uzi na a te no ugbobọ Jerusalẹm ze.

Ogbotu na a bu te epanọ unuẹthẹ na kpobi o rọ vọ m’unu, yọ uvẹ ovo o gbẹ riẹ re omọfa ọ rueva ha. A ruẹrẹ evie na họ no kẹ oware igbunu jọ nọ o te via. Oware nọ o jọ oke onana via u w’uzou gaga, keme u fiobọhọ k’omai wo ovuhumuo nnọ Jesu o wo ogaga nọ o re ro si oware nọ o be wha uye-oruẹ ahwo ze no jẹ rehọ omakpokpọ ro se ahwo kpobi nọ u te jei.

Nọ Jesu o bi wuhrẹ ogbotu na, ezae ene a tẹ rehọ ohwo nọ okie o kie ze nọ o kiẹzẹ ehru ehwa. A gwọlọ nọ Jesu o siwi ogbẹnyusu rai, rekọ fiki ogbotu na, a be sae rueva ha. Ẹvẹ awhaha ọnana ọ rro te! Rekọ oma o lọhọ e rai hi. A tẹ gadiẹ kpohọ ehru uwou na, a te zue eghogho họ iẹe, a te kie ifi họ ehwa ọzae nọ okie o kie na a te si ei kpotọ kẹle Jesu.

Kọ eva e dha Jesu fikinọ a bru eme riẹ dhe? Vievie! Ukpoye, ẹrọwọ rai u duobọ tei udu gaga. Ọ tẹ ta kẹ ohwo nọ okie o kie na nọ: “A rehọ izieraha ra vrẹ owhẹ no.” Rekọ Jesu ọ sae ghinẹ rehọ izieraha vrẹ? Ikere-ebe gbe otu Farisi na a roro ere he. A tẹ be jọ idu rai roro nọ: “Fikieme ohwo nana ọ jẹ be ta ere? Emeaghọ ọ ta na! Ono ọ rẹ sae rehọ izieraha vrẹ ogbẹrọ nọ Ọghẹnẹ ọvo?”

Nọ ọ riẹ iroro rai, Jesu ọ tẹ ta kẹ ai nọ: “Fikieme wha jẹ be nọ enọ itiena eva eva rai? Ovẹ họ onọ o vẹrẹ ẹta kẹ ọnọ okie o kie na, ‘A rehọ izieraha ra vrẹ owhẹ no’, hayo ‘Kparoma, tọlọ ehwa ra whọ nya’?”

Kẹsena, Jesu ọ tẹ kẹ ogbotu na uvẹ, gbe enọ e be wọso ẹe, re a ruẹ odhesẹvia igbunu nọ u ti dhesẹ udu riẹ nọ ọ rẹ rọ rehọ izieraha vrẹ evaọ otọakpọ jegbe nọ ghinọ ọye họ ọzae nọ ọ mae rro nọ ọ rria no. Ọ tẹ rẹriẹ ova ku ọzae nọ okie o kie na ọ tẹ ta nọ: “Kparoma, tọlọ ehwa ra who kpo obọ uwou ra.” Nwanọ ere o ghine ru, ọ tẹ nya ruọ otafe avọ ehwa riẹ evaọ iraro rai kpobi! Avọ igbunu ahwo na a te jiri Ọghẹnẹ je bo nọ: “Ma te ruẹ utiona ẹdọvo ho!”

Kọ who muẹrohọ nọ Jesu ọ fodẹ izieraha kpahe ẹyao jegbe nọ erọvrẹ izieraha u wobọ kpahe ewo omakpokpọ? Ebaibol na o ru rie vevẹ nọ ọsẹ ọsosuọ mai, Adamu, ọ raha uzi jegbe nọ mai kpobi ma be riuku uzioraha na, koyehọ, ẹyao gbe uwhu. Rekọ evaọ otọ esuo Uvie Ọghẹnẹ, Jesu ọ te rehọ izieraha rọ vrẹ ahwo nọ i you Ọghẹnẹ kpobi jẹ be g’Ọe, yọ evaọ okioye a re ti si eyao kpobi no. Ẹvẹ oyena u ti woma te! Mak 2:1-12; Luk 5:17-26; Matiu 9:1-8; Ahwo Rom 5:12, 17-19.

▪ Ẹvẹ a rọ ruẹrẹ evie họ kẹ eviavia igbunu?

▪ Ẹvẹ ọzae nọ okie o kie na o ro te Jesu oma?

▪ Fikieme mai kpobi a jẹ rọ erahaizi, rekọ ẹvẹ Jesu ọ rọ kẹ ẹruore inọ erọvrẹ izieraha mai gbe omokpokpọ ogbagba o lọhọ?