Uzou Avọ 29
Eruo Iruo Iwoma Evaọ Ẹdijala
ORỌ okpakpọ ọ 31 C.E. Emerae jọ e vrẹ no anwẹ nọ Jesu o ro lele aye na t’ẹme evaọ akotọ ozae evaọ Sameria nọ o je no Judia kpohọ Galili.
Enẹna, nọ o wuhrẹ gaga no evaọ Galili soso na, Jesu ọ tẹ wariẹ ruọ edhere bi kpohọ Judia, oria nọ ọ jẹ ta usiuwoma evaọ iwou-egagọ. A tẹ rehọ ẹme nọ Ebaibol ọ ta kpahe odibọgba Galili riẹ wawo iẹe, o t’ẹme kpahe iruo Jesu evaọ Judia tere he evaọ etoke iweze nana gbe etoke emerae nọ ọ jọ etenẹ raha lele ehaa Ọnyavrẹ nọ u kpo. U muẹro nọ a yoẹme kẹ odibọgba riẹ evaọ Judia te epanọ a jọ obọ Galili ru hu.
Enẹna Jesu ọ ruọ edhere no bi kpohọ okpẹwho Judia, Jerusalẹm, rọ kẹ ehaa Ọnyavrẹ ọ 31 C.E. Evaọ etenẹ, kẹle Unuẹthẹ Igodẹ na họ, ẹtẹre nọ ọ kẹle Bẹtẹsda, oria nọ ahwo buobu nọ e be mọ, ituaro, gbe emo e rẹ ze. A rọwo nọ oma o rẹ ga ohwo nọ ọ rueva ame ẹtẹre na nọ ame na o te bi fi ẹkporo.
O rọ Ẹdijala, Jesu ọ tẹ ruẹ ọzae nọ ọ rọ abotọ ẹtẹre na nọ ọ mọ te ikpe 38 no. Nọ ọ riẹ epanọ ọzae na ọ mọ kri te no, Jesu ọ tẹ nọ nọ: “O ruọ owhẹ re a si owhẹ?”
O te yo kẹ Jesu nọ: “[Ọga], me wo ohwo ho nọ a kiẹ ame na no a fi omẹ họ eva ẹtẹre na, rekọ nọ mẹ [be] tha omọfa ọ vẹ kake rọ omẹ kpotọ.”
Jesu ọ tẹ ta kẹe nọ: “Kparoma, tọlọ ehwa ra, whọ nya.” Oma o tẹ nwane ga ọzae na, ọ tẹ tọlọ ehwa riẹ, o te muhọ ẹnya!
Rekọ nọ ahwo Ju a ruẹ ọzae na, a tẹ ta nọ: “Nẹnẹ ẹdijala u fore whọ tọlọ ehwa ra ha.”
Ọzae na o te yo kẹ ai nọ: “Ohwo nọ o siwi omẹ ọ ta kẹ omẹ nọ, ‘Tọlọ ehwa ra, whọ nya.’ ”
A tẹ nọ nọ: “Ono họ ohwo nọ ọ ta kẹ owhẹ nọ, ‘Tọlọ ehwa ra whọ nya na’?” Jesu o kuomarẹriẹ no etẹe no fiki ogbotu na, yọ ohwo nọ a siwi na ọ riẹ odẹ Jesu hu. Uwhremu na, Jesu avọ ọzae na a te zere oma evaọ etẹmpol na, ọzae na ọ tẹ te riẹ ohwo nọ o siwi rie.
Fikiere ọzae nọ a siwi na ọ tẹ gwọlọ ahwo Ju na ọ tẹ ta kẹ ai nọ Jesu họ ohwo nọ o siwi rie. Nọ a te riẹ onana, ahwo Ju na a tẹ nya bru Jesu. Fikieme? Re a riẹ ogaga nọ o ro ru eware igbunu enana? Ijo. Rekọ re a jọ oma riẹ ruẹ afuẹwẹ jọ fikinọ o bi ru eware iwoma enana evaọ Ẹdijala. A te tube mu ei họ ekpokpo dede! Luk 4:44; Jọn 5:1-16.
▪ Ẹvẹ u kri te no anwẹ nọ Jesu o ro kpohọ Judia?
▪ Fikieme ẹtẹre nọ a re se Bẹtẹsda na ọ jẹ viodẹ tere?
▪ Didi oware igbunu Jesu ọ jọ ẹtẹre na ru, kọ didi uruemu ahwo Ju na a dhesẹ?