Kọ Ohwo Ọ Sai Ru Iruo Ezi Evaọ Ẹdijala?

Jesu o ru eware buobu evaọ odibọgba riẹ obọ Galili. Rekọ ẹme riẹ na inọ, “o gba omẹ họ nọ me re whowho usi uwoma Uvie Ọghẹnẹ kẹ ewho efa re” u dhesẹ nọ orọnikọ Galili ọvo Jesu ọ te jọ ru iruo riẹ hẹ. Fikiere, ọ tẹ nyae “ta usi uwoma evaọ iwou-egagọ nọ e rrọ Judia.” (Luk 4:43, 44) Onana u fo keme oke nana o jọ amara Asa hayo Ane, yọ ehaa obọ Jerusalẹm na e be kẹle no.

Dede nọ Ebaibol na ọ ta eware buobu kpahe odibọgba Jesu evaọ obọ Galili, ọ nwane ta ẹme kpahe iruo riẹ evaọ obọ Judia tere he. Yọ o tẹ make rọnọ ahwo Judia a gaviezọ kẹe he, onana o whaha e riẹ usiuwoma ota gbe iruo ezi riẹ hẹ evaọ oria kpobi nọ o te.

U kri hi, Jesu ọ tẹ ruọ edhere bi kpobọ Jerusalẹm, okpẹwho nọ ọ mae viodẹ evaọ Judia rọkẹ ehaa Ọnyavrẹ ọrọ ukpe 31 C.E. Evaọ Jerusalẹm, u wo oria jọ nọ u re zurie gaga nọ a re se Unuẹthẹ Igodẹ, oria nọ ẹtẹre Bẹtzeda ọ rrọ. Ahwo buobu nọ e be mọ, te enọ i tuaro, gbe enọ e ko, e rẹ ziọ ẹtẹre nana. Fikieme? Keme ahwo a rọwo nọ ẹvohẹ ọ tẹ rrọ ame ẹtẹre na, ohwo nọ ọ ro riẹ eva kpobi ẹyao riẹ o re kpo.

Nọ Jesu o kpohọ oria nana evaọ Ẹdijala, ọ tẹ ruẹ ọzae jọ nọ ọ be mọ anwọ ikpe 38 soso. Jesu ọ tẹ nọe nọ: “Kọ whọ gwọlọ nọ ẹyao ra o kpo?” Ọzae na ọ tẹ kẹe uyo nọ: “Ọga, me wo ohwo ọvo nọ ọ rẹ wọ omẹ fihọ ẹtẹre na ha nọ ẹvohẹ ọ tẹ rrọ ame na; rekọ nọ mẹ tẹ be nya re mẹ ruọ ame na, omọfa ọ vẹ ruọ aro mẹ.”—Jọn 5:6, 7.

Jesu ọ tẹ ta ẹme jọ nọ o sae jọnọ u gbe ọzae na gbe ohwo kpobi nọ o yo rie unu, inọ: “Kpama! Tọlọ uto ra re whọ nya.” (Jọn 5:8) Ẹsiẹvo na oma riẹ o tẹ nwane ga, ọ tẹ kpama, tọlọ uto riẹ je muhọ ẹnya.

Ukpenọ ahwo Ju nọ a jọ etẹe a lele ọzae na ghọghọ kẹ oware igbunu nana nọ o via na, a te mu ọzae na họ ẹfo inọ: “Nẹnẹ yọ Ẹdijala, fikiere u fo ho re whọ wọ uto ra.” Ọzae na ọ tẹ kẹ ae uyo nọ: “Ohwo nọ o siwi omẹ ọye ọ ta kẹ omẹ nọ, ‘Tọlọ uto ra re whọ nya.’” (Jọn 5:10, 11) U yoma kẹhẹ, ahwo Ju nana a be fo ohwo nọ o bi siwi ahwo evaọ Ẹdijala.

Ahwo na a tẹ nọ ọzae na nọ: “Ono họ ohwo nọ ọ ta kẹ owhẹ nọ, ‘Tọlọ iẹe re whọ nya’?” Fikieme a rọ nọe onọ yena? Keme Jesu ọ “lẹlẹ ruọ udevie ogbotu nọ e jọ etẹe na no,” yọ ọzae nọ o siwi na ọ riẹ odẹ Jesu hu. (Jọn 5:12, 13) Rekọ ọzae na ọ te wariẹ ruẹ Jesu. Uwhremu na evaọ obọ etẹmpol na, ọzae na ọ tẹ ruẹ Jesu je ti vuhumu nọ ọye họ ọnọ o siwi rie evaọ akotọ ẹtẹre na.

Ọzae nọ a siwi na ọ tẹ wariẹ ruẹ ahwo Ju nọ a jẹ nọe kpahe ohwo nọ o siwi rie na. Ọ tẹ vuẹ ae nọ Jesu họ ọnọ o siwi rie. Kẹsena ahwo Ju na a tẹ nya bru Jesu. Kọ a nya bru rie re a riẹ ogaga nọ Jesu o bi ro ru eware igbunu itieye na? Ijo. A nya re a fo ẹe fikinọ o bi ru eware ezi evaọ Ẹdijala. A te tube mu ei họ ekpokpo dede.