Ẹrẹriẹ na O Dhesẹ Oruaro Kristi Via

Nọ Jesu o je wuhrẹ ahwo evaọ ubrotọ Sisaria Filipai nọ o rehọ enwenọ emaele 15 thabọ no Ugbehru Hẹmọn, ọ ta ẹme jọ kẹ ikọ riẹ nọ u gbe rai unu, inọ: “Uzẹme mẹ be ta kẹ owhai inọ ejọ e rrọ etenẹ na nọ i ti whu vievie he ajokpanọ a ruẹ Ọmọ ohwo nọ ọ be nyaze evaọ Uvie riẹ.”—Matiu 16:28.

Ababọ avro, ilele na a je roro kpahe otofa ẹme Jesu na. Nọ oka ọvo o vrẹ no, Jesu ọ tẹ rehọ ikọ esa riẹ jọ, Pita, Jemis, gbe Jọn, kpobọ ugbehru jọ nọ u kpehru gaga. Ẹsejọhọ o jọ aso keme owezẹ o jẹ dina go ikọ esa na. Nọ Jesu ọ jẹ lẹ, ọ tẹ rẹriẹ evaọ iraro rai. Ikọ na a tẹ ruẹ nọ ovao riẹ u bi lo nwranwranwra kerọ ọre, yọ iwu riẹ e be fo papapa.

Kẹsena ezae ivẹ jọ, “Mosis avọ Elaeja” a tẹ romavia. A te bi lele Jesu ta kpahe “ezihe vrẹ riẹ, onọ o ti rugba kẹle evaọ obọ Jerusalẹm.” (Luk 9:30, 31) U muẹro nọ ezihe vrẹ riẹ na o dikihẹ kẹ uwhu gbe ẹkparomatha riẹ nọ ọ ta ẹme kpahe kẹle na. (Matiu 16:21) Kareghẹhọ nọ ẹme uwhu Jesu na ọ were Pita ha, rekọ ẹme nọ ezae ivẹ na a jẹ ta kugbe Jesu na o dhesẹ nọ uwhu oja nọ o bi ti whu na yọ oware nọ a rẹ whaha vievie he.

Obọnana owezẹ o hiẹ no ikọ na aro no, a te bi rri oware igbunu nọ o be via na jẹ be gaviezọ. Eruẹaruẹ a be ruẹ na, rekọ o jọ wọhọ oware aruakpọ te epanọ Pita ọ rọ ta nọ o re ru oware jọ, ọ ta nọ: “Owuhrẹ, u woma nọ ma rọ rrọ etenẹ. Fikiere joma bọ iwou-udhu esa fihọ etenẹ, ọjọ rọkẹ owhẹ, ọjọ rọkẹ Mosis, ọjọ rọkẹ Elaeja.” (Mak 9:5) Kọ Pita ọ gwọlọ nọ a bọ iwou-udhu na re eruẹaruẹ na e ruẹse nyaharo?

Nọ Pita ọ gbẹ be ta ẹme na, ẹgho ọnwranwra o te ruru ai, urru jọ o tẹ ta ẹme no ẹgho na ze inọ: “Ọnana họ Ọmọ mẹ, oyoyou mẹ na, ọnọ mẹ jẹrehọ. Wha gaviezọ kẹe.” Nọ ilele na a yo urru Ọghẹnẹ, ozọ u te mu ai gaga a te kie vovao tuotọ. Kẹsena Jesu ọ tẹ ta kẹ ae nọ: “Wha kpama. Jọ ozọ u mu owhai hi!” (Matiu 17:5-7) Nọ ikọ esa na a kpama, a tẹ ruẹ nọ Jesu ọvo o kiọkọ etẹe. Eruẹaruẹ na i kuhọ no. Nọ oke u rie no nọ a je no ugbehru na ruọ otọ, Jesu ọ tẹ vẹvẹ ae unu nọ: “Wha ta oware nọ wha ruẹ na kẹ ohwo ọvo ho bẹsenọ Ọmọ ohwo ọ rẹ kparoma no uwhu ze no.”—Matiu 17:9.

Elaeja nọ ọ romavia evaọ eruẹaruẹ na o wha onọ jọ ze. Ikọ na a nọ Jesu nọ: “Kọ fikieme otu ikere-obe na a rọ ta nọ Elaeja ọ te kake nyaze tao?” Jesu ọ tẹ kẹ ae uyo nọ: “Elaeja ọ nyaze no, yọ a vuhu rie he.” (Matiu 17:10-12) Jesu ọ be ta kpahe Jọn Ọhọahwo-Ame na, ọnọ o ru ọkpọ iruo nọ Elaeja o ru. Elaeja ọ ruẹrẹ edhere na họ kẹ Elaesha, yọ Jọn ọ ruẹrẹ edhere na họ kẹ Kristi.

Eruẹaruẹ nana e bọ Jesu avọ ikọ riẹ ga ziezi. Onana yọ ẹmẹvo ọrọ oruaro Kristi evaọ Uvie riẹ. Koyehọ ilele na a ginẹ ruẹ “Ọmọ ohwo nọ ọ be nyaze evaọ Uvie riẹ,” wọhọ epanọ Jesu ọ ya eyaa riẹ. (Matiu 16:28) Nọ a jọ obọ ehru ugbehru na, a “rọ ẹro ruẹ oruaro ulogbo riẹ.” Dede nọ otu Farisi na a gwọlọ nọ Jesu o dhesẹ oka jọ kẹ ae re u mu ai ẹro nọ ọye họ Ovie nọ Ọghẹnẹ ọ salọ, Jesu ọ kẹ rai uvumọ oka ha. Rekọ Jesu ọ kẹ ilele ekpekpe riẹ uvẹ nọ a rọ rehọ ẹro ruẹ ẹrẹriẹ riẹ, onọ u ru eruẹaruẹ nọ e ta kpahe Uvie na gba. Agbẹta nọ Pita o ro kere uwhremu na nọ: “Onana u ru ẹme eruẹaruẹ na mu omai ẹro vi epaọ ọsosuọ.”—2 Pita 1:16-19.