Idibo Iruiruo I bi Ru Iruo Eghaghae

PỌL ukọ na o kere se ukoko nọ o jọ Filipai nọ: “Pọl avọ Timoti, erigbo Kristi Jesu, ro se erẹri na kpobi nọ e rrọ usu kugbe Kristi Jesu nọ e rrọ Filipai, gbe esẹro avọ idibo iruiruo.” (Fil. 1:1) Muẹrohọ nọ o yere idibo iruiruo na. Avro ọ riẹ hẹ inọ ezae nana a je ru iruo nọ i wuzou ro fiobọhọ kẹ ekpako nọ e jọ ukoko na oke oyena. Epọvo na o rrọ nẹnẹ re. Idibo iruiruo i bi ru iruo nọ i re fiobọhọ kẹ esẹro na je bi ru nọ eware e be rọ nya kpatiẹ evaọ ukoko na.

² Kọ whọ riẹ idibo iruiruo nọ e rrọ ukoko nọ whọ rrọ? Kọ whọ riẹ iruo nọ a bi ru nọ e be kẹ owhẹ gbe ukoko na soso erere? Ababọ avro, iruo nọ ezae nana i bi ru e be da Jihova ẹro fia. Pọl o kere nọ: “Ezae nọ e be gbodibo evaọ emamọ edhere a bi wo emamọ edikihẹ jẹ be sae ta ẹme ududu ziezi kpahe ẹrọwọ na evaọ Kristi Jesu.”​—1 Tim. 3:13.

EWARE NỌ A JỌ IKEREAKERE NA GWỌLỌ MI IDIBO IRUIRUO

³ O gwọlọ nọ idibo iruiruo a re yeri emamọ uzuazọ nọ u fo Oleleikristi, a rẹ jọ ezae nọ i re ru eware avọ areghẹ, je ru iruo nọ a kẹ rai ziezi. Ma rẹ ruẹ onana vevẹ nọ ma te roro kpahe eware nọ Pọl ọ ta nọ a rẹ nyate evaọ ileta riẹ se Timoti: “Epọvo na re, idibo iruiruo a rẹ jọ ahwo nọ a wo osegboja, a rẹ jọ ahwo eme-ivẹ hẹ, a rẹ jọ enọ e rẹ da udi buobu hu, a re wo uvou-uthethei kẹ erere nọ a rẹ rọ ewhariọ wo ho, a rẹ jọ enọ e be rọ obruoziẹ-iroro ọfuafo yọrọ ẹrọwọ na, onọ o rrọ oware udidi ọrẹri. Ofariẹ, jọ a kake dawo ae sọ a te; kẹsena a vẹ jọ egbodibo, nọ a tẹ kare afuẹwẹ. Idibo iruiruo e rẹ jọ ezae nọ i wo aye ọvo, nọ e be sẹro emọ rai gbe uviuwou rai ziezi.” (1 Tim. 3:8-10, 12) Nọ idibo iruiruo a tẹ nyate itee ikpehru nọ a gwọlọ mi ai na u re ru nọ ahwo a gbẹ rọ poviẹ ukoko na ha fiki oghẹrẹ ezae nọ a kẹ obọdẹ ewha-iruo.

⁴ Te a gbẹ maha hayo a kpako no, idibo iruiruo a re wobọ ziezi evaọ iruo usi uwoma ota na kamara kamara. A rẹ rọ aro kele Jesu wo ajọwha kẹ iruo odibọgba na. A te wo ajọwha otiọye, yọ a bi dhesẹ nọ a wo ọkpọ isiuru nọ Jihova o wo nọ ọ rọ gwọlọ siwi ahwo-akpọ.​—Aiz. 9:7.

⁵ Ezae nọ e rrọ idibo iruiruo a rẹ jẹ jọ emamọ oriruo evaọ ẹgọ, osẹ, ẹmeunu, gbe uruemu rai. A re wo iroro nọ e gba, onọ o rẹ lẹliẹ amọfa kẹ ae adhẹẹ. U te no ere no, a re se usu nọ a wo kugbe Jihova gbe uvẹ-iruo nọ a wo evaọ ukoko na gboja.​—Tait. 2:2, 6-8.

⁶ Ezae nana yọ ahwo nọ a “dawo . . . sọ a te.” Makọ taure a tẹ te rehọ ai mu, a dhesẹ via no inọ a rẹ romakẹ iruo. A te je dhesẹ via nọ a fi iruo Uvie na họ oria ọsosuọ evaọ uzuazọ rai, jẹ be daoma re a te kẹ uvẹ-iruo kpobi nọ o sai rovie fihọ kẹ ai. Emamọ oriruo nọ a rẹ rọ aro kele a ginẹ rrọ kẹ amọfa evaọ ukoko na.​—1 Tim. 3:10.

IRUO NỌ A BI RU

⁷ Idibo iruiruo i bi ru iruo sa-sa nọ i bi fiobọhọ kẹ inievo-emezae gbe inievo-emetẹ rai, onọ u bi ru esẹro na wo oke ziezi nọ a bi ro wuhrẹ jẹ sẹro inievo na. Nọ a tẹ be ghale iruo kẹ ae, ugboma ekpako na u re roro kpahe onaa hayo eriariẹ omomọvo gbe ẹgwọlọ nọ ọ rrọ ukoko na.

⁸ Dai roro kpahe iruo jọ nọ a bi ru: A sai fi odibo oruiruo jọ họ nọ ọ rẹ rẹrote ebe ukoko na re ma sai wo ebe nọ ma gwọlọ kẹ omobọ mai gbe usi uwoma ota. A re fi efa họ nọ e rẹ rẹrote okerefihotọ igho ukoko na hayo ẹkwotọ na. A re fi ejọ họ nọ e rẹ rẹrote emaekrofonu, rẹrote ekwakwa ikporakporo, ruẹrẹ ahwo họ je kele ahwo, hayo fiobọhọ kẹ ekpako na evaọ idhere efa. Iruo e riẹ buobu nọ a re ru re a rẹrote Ọgwa Uvie na je ru ei fo, fikiere a re se idibo iruiruo na ẹsibuobu re a fiobọhọ ru eware nana.

⁹ Evaọ ikoko jọ, o sae lọhọ re a rehọ iruo nana ọvuọvo kẹ odibo oruiruo ọvuọvo. Evaọ eria efa nọ idibo iruiruo e jọ bu hu, odibo oruiruo ọ sai wo iruo vrẹ ọvo. Evaọ ẹsejọ, idibo iruiruo nọ i bu vrẹ ọvo a sae rẹrote oghẹrẹ iruo jọ. Otẹrọnọ idibo iruiruo i gbe bu te epanọ a sai ro ru iruo nana jọ họ, ugboma ekpako na o sae salọ inievo-emezae efa nọ e họ-ame no nọ e rrọ emamọ oriruo re a fiobọhọ ru iruo nana nọ i wuzou na. A te rọ enẹ wo onaa gbe eriariẹ nọ i ti fiobọhọ evaọ obaro nọ a te te ahwo nọ a re ro mu idibo iruiruo no. Otẹrọnọ inievo-emezae e riẹ hẹ, a sae ta kẹ oniọvo-ọmọtẹ nọ ọ rrọ emamọ oriruo re o fiobọhọ evaọ eware jọ, dede nọ a te rehọ iẹe mu odibo oruiruo ho. Ohwo nọ ọ rrọ emamọ oriruo yọ ohwo nọ uruemu riẹ gbe oghẹrẹ nọ ọ be rọ gọ Ọghẹnẹ u fo oware nọ a rẹ rọ aro kele. Ọ rẹ jọ emamọ oriruo kẹ amọfa evaọ ewuhrẹ ọnya, usi uwoma ota, oghẹrẹ nọ a be jọ uviuwou riẹ yeri, eware arozaha ẹkeriotọ nọ ọ rẹ salọ, osẹ gbe ẹgọ riẹ, gbe eware efa nọ o bi ru.

¹⁰ Evaọ ikoko nọ ekpako e jọ bu tere he, a sae ta kẹ idibo iruiruo nọ i te ziezi re a rehọ abọ enọ ame-ọhọ nọ e ta kpahe iwuhrẹ Ebaibol na rọ kiẹ ohwo nọ ọ gwọlọ họ-ame riwi. Enọ nana e rrọ oria Eme-Ofiba, “Abọ 1: Eware nọ Ileleikristi E Rọwo.” Nọ orọnọ “Abọ avọ 2: Oghẹrẹ nọ Oleleikristi O re Yeri Uzuazọ” u wo eware nọ i duobọte uzuazọ ohwo dẹẹ na, ọkpako ọ rẹ rọ abọ nana kiẹ ohwo riwi.

¹¹ Otẹrọnọ emamọ ẹjiroro jọ ọ riẹ, no oke te oke, ugboma ekpako o sae ruẹ nọ u kiehọ re a rehọ iruo odibo oruiruo jọ kẹ omọfa, a vẹ rehọ ọfa kẹe. O make rrọ ere na, erere ologbo ọ riẹ re inievo na a ru oghẹrẹ iruo ọvona oke krẹkri re a sae riẹ kpahe iruo na ziezi.

¹² A te rri oghẹrẹ nọ eware e rrọ evaọ ukoko, a sae rehọ oghẹrẹ iruo efa jọ kẹ idibo iruiruo nọ ‘ahwo kpobi a be ruẹ ẹnyaharo rai vevẹ.’ (1 Tim. 4:15) Otẹrọnọ ekpako i bu tere he, a sai fi odibo oruiruo họ re ọ jọ ethabọ ọsẹro utu, hayo evaọ ẹsejọ, odibo utu, yọ o re ru iruo riẹ evaọ otọ ekpako na. A rẹ sae kẹ idibo iruiruo oghẹrẹ eme jọ evaọ Ewuhrẹ Uzuazọ gbe Usi uwoma Ota na, a sai tube ru Uwuhrẹ Ebaibol Ukoko na nọ o tẹ gwọlọ ere, jẹ kẹ evuẹ ogbotu. A sae rọ oghẹrẹ iruo efa jọ kẹ idibo iruiruo nọ ẹgwọlọ jọ ọ tẹ riẹ yọ a nyate eware nọ a gwọlọ mi ahwo nọ a re ru iruo na. (1 Pita 4:10) Nọ idibo iruiruo a bi fiobọhọ kẹ ekpako na, a re ru ei no eva ze.

¹³ Dede nọ iruo rai i wo ohẹriẹ no erọ ekpako na, abọjọ iruo Ọghẹnẹ e rrọ, yọ i re fiobọhọ ru eware nya kpatiẹ evaọ ukoko na. Nọ oke o be nyaharo na, otẹrọnọ idibo iruiruo a bi ru iruo rai ziezi, a te je te ahwo nọ a rẹ jọ esẹro gbe iwuhrẹ, a sae rehọ odẹ rai lahwe re a rehọ ae mu ekpako.

¹⁴ Otẹrọnọ whẹ yọ oniọvo-ọmọzae nọ ọ rrọ ikpe ikpegbọ hayo nọ ọ họ-ame obọ, kọ whọ be daoma epanọ who re ro te odibo oruiruo? (1 Tim. 3:1) Nọ ahwo buobu a bi kurẹriẹ ziọ ukoko na kukpe kukpe na, ma gwọlọ ezae nọ i se egagọ Ọghẹnẹ gboja nọ e rẹ rẹrote ewha-iruo ukoko. Whọ sae daoma re who te ẹkwoma isiuru nọ who re ro fiobọhọ kẹ amọfa nọ whọ rẹ daoma wo. Edhere jọ nọ who re ro ru onana họ, oriruo Jesu nọ who re roro kpahe didi. (Mat. 20:28; Jọn 4:6, 7; 13:4, 5) Isiuru ra e te ga nọ who bi wo oghọghọ nọ u re no ẹkẹ ze na. (Iruẹru 20:35) Fikiere, hae fialoma via fiobọhọ kẹ amọfa, hai fiobọhọ evaọ ẹruorote Ọgwa Uvie na, hayo fiobọhọ ru ẹme ọmọ-isukulu evaọ Ewuhrẹ Uzuazọ gbe Usi Uwoma Ota na nọ ohwo nọ a kẹ ẹme na ọ gbẹ riẹ hẹ. Re ohwo ọ daoma epanọ o re ro te o gwọlọ re nọ o re wo ewuhrẹ omobọ riẹ nọ u re fiobọhọ kẹe wo emamọ iruemu. (Ol. 1:1, 2; Gal. 5:22, 23) U te no ere no, oniọvo-ọmọzae nọ ọ be daoma re o te o re dhesẹ via nọ ọ rrọ ohwo nọ a sai fievahọ jẹ romatotọ ru iruo nọ a kẹ riẹ evaọ ukoko na.​—1 Kọr. 4:2.

¹⁵ Ẹzi ọfuafo ọ rẹ rọ idibo iruiruo mu rọkẹ ewoma ukoko na. Ahwo kpobi nọ a rrọ ukoko na a re dhesẹ nọ iruo egaga rai e be da ae ẹro ẹkwoma ẹme nọ a re yo kẹ ae nọ a bi ru iruo nọ a kẹ rai na. Ukoko na o rẹ rọ enẹ dhesẹ nọ a wo edẹro kẹ ọruẹrẹfihotọ nọ Jihova o bi ro ru ahwo uwou riẹ jọ kpatiẹ.​—Gal. 6:10.